Wang Yibo សម្រេចចិត្តបន្តកុងត្រាជាមួយក្រុមហ៊ុន Yuehua

នៅថ្ងៃទី២៧ ខែមីនា Yuehua Entertainment បានប្រកាសថាខ្លួនបានបញ្ចប់ការបន្តកិច្ចសន្យាគ្រប់គ្រងសិល្បករផ្តាច់មុខជាមួយ Wang Yibo។ ក្រុមហ៊ុនបានសង្កត់ធ្ងន់ថា«ការបន្តកិច្ចសន្យានេះមិនត្រឹមតែបន្តរក្សាទំនាក់ទំនងសហប្រតិបត្តិការយូរអង្វែងរវាងលោក Wang និងក្រុមរបស់យើងប៉ុណ្ណោះទេ ប៉ុន្តែវាក៏ជាការបង្ហាញពីកិច្ចសហការកាន់តែជិតស្និទ្ធរវាងការអភិវឌ្ឍអាជីពនាពេលអនាគតរបស់លោកនិងក្រុមផងដែរ»។

យោងតាមប្រព័ន្ធផ្សព្វផ្សាយចិននេះមិនមែនជាការបន្តកិច្ចសន្យាធម្មតាទេ ប៉ុន្តែវាលើកកម្ពស់ Wang Yibo ដោយផ្ទាល់ពី សិល្បករដែលមានកិច្ចសន្យា ទៅជា ដៃគូភាគហ៊ុនដោយបំបែកគំរូភាពជាដៃគូប្រពៃណីរវាងសិល្បករ និងក្រុមហ៊ុនគ្រប់គ្រងនៅក្នុងឧស្សាហកម្មកម្សាន្តចិន។ កាលពីថ្ងៃទី ២៥ ខែមីនា ក្រុមហ៊ុន Yuehua បានប្រកាសពីផែនការមួយដើម្បីផ្តល់ភាគហ៊ុនមានកំណត់សរុបចំនួន ១២.៥ លានហ៊ុនដល់ Wang Yibo ដែលស្មើនឹងប្រហែល ១.៥១% នៃភាគហ៊ុនសរុបដែលបានចេញ ដោយមានតម្លៃប៉ាន់ស្មានជិត ២៥លានដុល្លារហុងកុងប្រមាណ៣.១លានដុល្លារអាម៉េរិក។ ទោះជាយ៉ាងណាក៏ដោយ តម្លៃទិញសម្រាប់ Wang Yibo គឺត្រឹមតែ ០.០១ដុល្លារហុងកុងក្នុងមួយហ៊ុនប៉ុណ្ណោះ ដែលស្ទើរតែជាការផ្តល់ឱ្យដោយឥតគិតថ្លៃ។

ភាគហ៊ុនទាំងនេះនឹងត្រូវបានបែងចែកជាបួនដំណាក់កាល ជាមួយនឹង២៥% ក្នុងមួយដំណាក់កាលក្នុងរយៈពេលបួនឆ្នាំ ហើយតម្រូវឱ្យមានការយល់ព្រមពីភាគទុនិកនៅក្នុងកិច្ចប្រជុំទូទៅ។
ក្រុមប្រឹក្សាភិបាលបានសង្កត់ធ្ងន់ថា ការរក្សា និងការបន្តកិច្ចសន្យារយៈពេលវែងរបស់ Wang Yibo គឺមានសារៈសំខាន់ណាស់សម្រាប់ស្ថិរភាពអាជីវកម្ម។ អត្ថប្រយោជន៍រយៈពេលវែង និងការអនុវត្តប្រកបដោយចីរភាពដែលតារាសម្តែងរូបនេះផ្តល់ជូនមានច្រើនជាងផលប៉ះពាល់តិចតួចលើភាគទុនិកភាគតិច ដូច្នេះវាស្របគ្នាកាន់តែប្រសើរជាមួយនឹងផលប្រយោជន៍រួមរបស់ភាគទុនិកទាំងអស់។ បន្ទាប់ពី Yuehua បានប្រកាសពីការបន្តកិច្ចសន្យាជាមួយ Wang Yibo ដោយជោគជ័យគណនី Weibo របស់សិល្បកររូបនេះក៏បានប្តូរឈ្មោះរបស់ខ្លួនពី «UNIQ – Wang Yibo» ទៅជា «Wang Yibo – YIBO» ផងដែរ។

នៅខែតុលា ឆ្នាំ២០១៤ Wang Yibo បានចុះកិច្ចសន្យាជាផ្លូវការជាមួយ Yuehua Entertainment ហើយបានបង្ហាញខ្លួនជាសមាជិកក្រុមចម្រៀងបុរស UNIQ ខណៈពេលដែលកំពុងបន្តអាជីពសម្តែង។ ក្រោយល្បីល្បាញក្នុងអាជីពសម្តែងកាលពីឆ្នាំ២០១៩ Wang Yibo បានក្លាយតារាល្បីដែលបានជំរុញតម្លៃពាណិជ្ជកម្មរបស់លោក និងលើកកម្ពស់លោកឱ្យក្លាយជាសិល្បករឆ្នើមម្នាក់សម្រាប់ក្រុមហ៊ុន៕