អាហារកែច្នៃមួយចំនួននេះប៉ះពាល់ដល់សុខភាពខ្លាំងជាងអ្នកជក់បារីទៀត

ការបរិភោគអាហារកែច្នៃជាច្រើនប្រភេទប៉ះពាល់សុខភាពខ្លាំងជាងការជក់បារីទៅទៀត វាជាមូលហេតុបណ្តាលឱ្យមនុស្សលើពិភពលោកឆាប់ស្លា.ប់ ពីព្រោះរសជាតិរបស់វាដូចគ្នានឹងរសជាតិសិប្បនិម្មិត ហើយគ្មានការស្រាវជ្រាវណាមួយដែលបញ្ជាក់ថា អាហារកែច្នៃផ្តល់ផលល្អសម្រាប់សុខភាពនោះទេ ។ នេះជាការលើកឡើងរបស់អ្នកជំនាញសុខភាពអង់គ្លេស និងជាសាស្ត្រាចារ្យសាកលវិទ្យាល័យ College London ។

លោក Chris Van Tulleken អ្នកជំនាញសុខភាព និងសាស្ត្រាចារ្យសាកលវិទ្យាល័យ College London ប្រទេសអង់គ្លេស និយាយថា ទោះជាអាហារកែច្នៃប៉ះពាល់សុខភាពខ្លាំង ប៉ុន្តែមនុស្សជាច្រើននៅតែចូលចិត្តបរិភោគជារៀងរាល់ថ្ងៃ ដោយមិនចាប់អារម្មណ៍នឹងការថែទាំសុខភាព ។ ការបរិភោគអាហារប្រភេទជាប្រចាំនាំឱ្យប៉ះពាល់សុខភាពរយៈពេលយូរ គឺធ្ងន់ធ្ងរជាងការជក់បារី ។ ទម្លាប់ការបរិភោគអាហារមិនល្អសម្រាប់សុខភាព គឺជាមូលហេតុបណ្តាលឱ្យមនុស្សនៅទូទាំងពិភពលោក ស្លាប់តាំងពីក្មេង ។

លោកបាននិយាយក្នុងកម្មវិធី «Diary of a CEO» ថា ការបរិភោគអាហារកែច្នៃនឹងប៉ះពាល់សុខភាពយ៉ាងធ្ងន់ធ្ងរ និងឆក់យកជីវិតមនុស្សលើពិភពលោក ខ្លាំងជាងការជក់បារី ហើយមិនគួរចាត់ទុកវាជាអាហារទេ គួរតែហៅថា «សារធាតុឆ្លងកាត់ការផលិតដោយរោងចក្រឧស្សាហកម្ម» ដោយសារវាផ្សំដោយសារធាតុគីមី ថ្នាំពណ៌ ដែលគ្រឿងផ្សំនេះគ្មានក្នុងផ្ទះបាយរបស់យើង ថែមទាំងមានបរិមាណកាឡូរី ស្ករ ខ្លាញ់ និងអំបិលខ្ពស់ ដើម្បីរក្សាទុកបានយូរ ។ អាហារទាំងនេះ រួមមាន ៖ ដំឡូងបារាំងបំពង នំកញ្ចប់ អាហារកំប៉ុង សាច់សត្វកែច្នៃ (សាច់ក្រក) អាហារក្លាសេ ភេសជ្ជៈជាតិអាល់កុល និងភេសជ្ជៈផ្អែម ។

បើតាមការស្រាវជ្រាវផ្នែកវិទ្យាសាស្ត្រ គឺការបរិភោគអាហារកែច្នៃ មិនត្រឹមតែបណ្តាលឱ្យមនុស្សនៅលើពិភពលោក កើតជំងឺធាត់ប៉ុណ្ណោះទេ វានឹងនាំមកនូវជំងឺជាច្រើនទៀត ដូចជា ៖ ជំងឺទឹកនោមផ្អែម ប្រភេទទី២, មហារីកពោះវៀនធំ និងជំងឺបេះដូង ។

លទ្ធផលស្រាវជ្រាវផ្នែកវិទ្យាសាស្ត្រ ស្របគ្នានឹងការស្រាវជ្រាវកាលពីឆ្នាំ២០២៤ ដែលបង្ហាញថា ការបរិភោគអាហារកែច្នៃក្នុងបរិមាណច្រើននឹងបង្កើនជំងឺរ៉ាំរ៉ៃ មានបញ្ហាសុខភាពផ្លូវចិត្ត ហើយក៏គ្មានការស្រាវជ្រាវណាមួយដែលបញ្ជាក់ពីអាហារកែច្នៃផ្តល់ផលល្អសម្រាប់សុខភាពនោះទេ ។ អ្នកជំនាញសុខភាពណែនាំឱ្យចៀសវាងការបរិភោគអាហារកែច្នៃទាំងនេះ ដោយសារវាមានរសជាតិសិប្បនិម្មិត មិនថា រសជាតិប្រៃ ផ្អែម និងជូរ ។

គួរបញ្ជាក់ថា អាហារកែច្នៃ គឺជាអាហារដែលបានបំលែងពីសភាពដើមដោយការប្រើប្រាស់វិធីផ្សេងៗ ដូចជា ៖ ការចម្អិន ការបន្ថែមសារធាតុ ការរក្សាទុក និងការវេចខ្ចប់ ដើម្បីអាចរក្សាគុណភាពបានយូរ ឬងាយស្រួលបរិភោគ ។ ការបរិភោគអាហារប្រភេទនេះបើទោះជាងាយស្រួលក្តី ប៉ុន្តែនាំមកនូវជំងឺផ្សេងៗ និងមានហានិភ័យខ្លាំង ៕