ព្រឹត្តិការណ៍ជាប្រវត្តិសាស្រ្ត! កម្ពុជានឹងធ្វើជាម្ចាស់ផ្ទះសម្រាប់កិច្ចប្រជុំដ៏សំខាន់មួយនៅចុងឆ្នាំនេះ

មេដឹកនាំសំខាន់ៗនិងតំណាងថ្នាក់ដឹកនាំប្រទេសជាច្រើនរូប នឹងធ្វើដំណើរមកប្រទេសកម្ពុជា ដើម្បីចូលរួមកំពូលកិច្ចប្រជុំដ៏ធំមួយនៅរាជធានីភ្នំពេញ នាចុងឆ្នាំ២០២៦។ នេះបើយោងតាមសេចក្ដីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ។

តាមរយៈសេចក្តីប្រកាសព័ត៌មានរបស់ក្រសួងការបរទេសនាថ្ងៃទី១៨ ខែកុម្ភៈ បានបញ្ជាក់ថា នៅខែវិច្ឆិកា ឆ្នាំ២០២៦ខាងមុខនេះ រាជធានីភ្នំពេញនឹងធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី (OIF) លើកទី២០ ខណៈព្រឹត្តិការណ៍សំខាន់នេះ នឹងមានការចូលរួមពីសំណាក់ប្រមុខដឹកនាំ និង តំណាងរដ្ឋជាសមាជិកនៃអង្គការអន្តរជាតិហ្វ្រង់កូហ្វូនី (OIF) ព្រមទាំងស្ថាប័នដៃគូនានាជាច្រើន។

បើតាមក្រសួងការបរទេស ប្រធានបទនៃកិច្ចប្រជុំកំពូលហ្វ្រង់កូហ្វូនីលើកទី២០នេះ គឺផ្តោតទៅលើ ការជំរុញកិច្ចសន្ទនាផ្លាស់ប្តូរយោបល់ និងរិះរកដំណោះស្រាយជាក់ស្តែងលើបញ្ហាប្រឈមជាសកលពាក់ព័ន្ធនឹងសន្តិភាព រួមទាំងការអភិវឌ្ឍប្រកបដោយចីរភាព។ ទាំងនេះ ជាចំណុចអាទិភាពបំផុតរបស់សមាជិកអង្គការ OIF។

សម្រាប់កម្ពុជា ព្រឹត្តិការណ៍នេះ ក៏ជាឱកាសដ៏មានសក្តានុពលខ្លាំងមួយជាប្រវត្តិសាស្រ្តក្នុងការទាក់ទាញភ្ញៀវទេសចរ និងវិនិយោគិនបារាំង និងពីបណ្តាប្រទេសនិយាយភាសាបារាំង។

សូមជម្រាបថា អង្គការអន្តរជាតិ OIF នេះត្រូវបានបង្កើតឡើងនៅថ្ងៃទី២០ ខែមីនា ឆ្នាំ១៩៧០ ដោយឥស្សរជនកំពូល៤រូប គឺព្រះបរមរតនកោដ្ឋនិងជាអតីតប្រមុខរដ្ឋកម្ពុជា ព្រះបាទនរោត្តម សីហនុ, អតីតប្រធានាធិបតីសេណេហ្កាល់ លោក Léopold Sédar Senghor, អតីតប្រធានាធិបតីនីហ្សេ លោក Hamani Diori, និងអតីតប្រធានាធិបតីទុយនីស៊ី លោក Habib Bourguiba។

អង្គការនេះ មានទីស្នាក់ការកណ្ដាលនៅទីក្រុងប៉ារីស របស់បារាំង។ ស្របតាមធម្មនុញ្ញ OIF រចនាសម្ព័ន្ធនិងការគ្រប់គ្រងរបស់អង្គការ គឺមានអគ្គលេខាធិការម្នាក់ដែលកាន់តំណែងកំពូល ដោយបច្ចុប្បន្នកាន់ដោយលោកស្រី Louise Mushikiwabo។ អគ្គលេខាធិការត្រូវចាត់តាំងអ្នករដ្ឋបាលម្នាក់ [Administrator] ដើម្បីទទួលខុសត្រូវលើកិច្ចសហប្រតិបត្តិការរបស់អង្គការ។

តាមតួលេខបច្ចុប្បន្នរបស់ OIF រដ្ឋ និងរដ្ឋាភិបាលជាសមាជិកហ្វ្រង់កូហ្វូនី មានចំនួន ៨៨ រាប់បញ្ចូលទាំងប្រទេសកម្ពុជាផងដែរ (ដោយមានសមាជិកពេញសិទ្ធិ៥៤, មិនពេញសិទ្ធិ៧ និងអ្នកសង្កេតការណ៍២៧)។ កម្ពុជាបានចូលជាសមាជិកពេញសិទ្ធិចាប់តាំងពីឆ្នាំ ១៩៩៣ ក្រោយឆ្លងកាត់ជាសមាជិកសង្កេតការណ៍រយៈពេល ២ឆ្នាំ៕