ថៃ​កំពុងតាមឃ្លាំមើលសកម្មភាពរបស់ថ្នាក់ដឹកនាំកម្ពុជាលើឆាកអន្តរជាតិ

ប្រទេសថៃពេលនេះហាក់កំពុងព្រួយចិត្តយ៉ាងខ្លាំង បន្ទាប់ពីត្រូវបានប្រមុខរាជរដ្ឋាភិបាលកម្ពុជាប.កស្បែកមុខជាសាធារណៈប្រាប់ទៅកាន់បណ្ដាញសារព័ត៌មានរបស់ពិភពលោក រហូតលេចលឺដំណឹងមកថា រដ្ឋមន្ត្រីការបរទេសថៃ ស៊ីហាសាក់ ភួងកេតកែវ កំពុងពុងតាមដានយ៉ាងដិតដល់នូវសកម្មភាពរបស់ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ដែលកំពុងមានការប្រាស្រ័យទាក់ទងល្អនៅលើឆាកអន្តរជាតិ។

យោងតាមការចេញផ្សាយរបស់សារព័ត៌មាន The Nation បានឲ្យដឹងថា ក្រសួងការបរទេសថៃកំពុងតាមដានជិតស្និតចំពោះសកម្មភាពអន្តរជាតិរបស់ នាយករដ្ឋមន្ត្រីកម្ពុជា សម្ដចេធិបតី ហ៊ុន ម៉ាណែត ជាពិសេសកិច្ចខិតខំប្រឹងប្រែងរបស់លោកក្នុងការដោះស្រាយស្ថានភាពព្រំដែនថៃ-កម្ពុជា។ ជាមួយគ្នានេះ ក្រសួងក៏កំពុងពិនិត្យឡើងវិញនូវសំណើរបស់កម្ពុជាទៅកាន់ប្រធានាធិបតីបារាំង អេម៉ានុយអែល ម៉ាក្រុង សម្រាប់ឯកសារប្រវត្តិសាស្ត្រទាក់ទងនឹងព្រំដែនផងដែរ។ នេះបើតាមការបញ្ជាក់របស់លោក ស៊ីហាសាក់ ភួងកេតកែវ រដ្ឋមន្ត្រីក្រសួងការបរទេសក្នុងអំឡុងពេលសម្ភាសន៍ជាមួយអ្នកយកព័ត៌មាននៅវិមានរដ្ឋាភិបាល កាលពីថ្ងៃអង្គារ ។

តាមក្រសួង អាជ្ញាធរថៃកំពុងតាមដានកិច្ចប្រជុំរបស់នាយករដ្ឋមន្រ្តីកម្ពុជា ជាមួយមេដឹកនាំបរទេស និងការចូលរួមក្នុងវេទិកាអន្តរជាតិផ្សេងទៀត ដើម្បីវាយតម្លៃផលប៉ះពាល់ដែលអាចកើតមានលើទំនាក់ទំនងទ្វេភាគី ព្រោះបើតាមការកត់សម្គាល់ ក្នុងរយៈពេលប៉ុន្មានខែថ្មីៗនេះ សម្ដេច ហ៊ុន ម៉ាណែត បានបង្កើនការផ្សព្វផ្សាយផ្នែកការទូត ដោយធ្វើការចរចាជាមួយដៃគូក្នុងតំបន់ និងសកលលោក ខណៈបញ្ជាក់ជានិច្ចនូវការប្តេជ្ញាចិត្តរបស់កម្ពុជា ក្នុងការដោះស្រាយជម្លោះតាមរយៈយន្តការផ្លូវច្បាប់ និងសន្តិភាព។



ការណ៍នេះផ្ទុយស្រឡះពីភាគីថៃ ដែលមន្ត្រីថៃតែងតែនិយាយថា ពួកគេចូលចិត្តការចរចាទ្វេភាគី ហើយនៅតែប្រុងប្រយ័ត្នចំពោះចលនាស្វែងរកការសម្របសម្រួលពីអន្តរជាតិរបស់រាជរដ្ឋាភិបាលកម្ពុជាជានិច្ច។



តែទោះជាយ៉ាងនេះក្ដី ក្រុមអ្នកវិភាគថៃបាននិយាយយកល្អជំនួសប្រទេសខ្លួនថា វាជារឿងធម្មតាទេដែលក្រសួងការបរទេសតាមដានសកម្មភាពការទូតកម្រិតខ្ពស់របស់ប្រទេសជិតខាង ជាពិសេសក្នុងអំឡុងពេលនៃភាពតានតឹងផ្នែកនយោបាយកាន់តែខ្លាំងឡើងបែបនេះ។

សូមជម្រាបថា ព័ត៌មានស្ដីអំពីក្រសួងការបរទេសថៃដែលកំពុងតាមមើលសកម្មភាពរបស់ថ្នាក់ដឹកនាំកម្ពុជា បានឆ្លុះបញ្ចាំងពីភាពភ័យខ្លាចដែលកំពុងកើតមានសម្រាប់ប្រទេសថៃ ខណៈសម្លេងរបស់នាយករដ្ឋមន្រ្តីកម្ពុជា កំពុងតែសាយភាយគ្រប់ប្រព័ន្ធផ្សព្វផ្សាយអន្តរជាតិធំៗ ដោយបណ្ដាញសារព័ត៌មាននីមួយៗចុះផ្សាយព្រោងព្រាតថា៖ ភាគីថៃនៅតែបន្តកាន់កាប់តំបន់ជាច្រើនលើទឹកដីកម្ពុជា បើទោះជាបីជាមានការសម្របសម្រួលលើកិច្ចព្រមព្រៀងសន្តិភាពរបស់លោក Donald Trump ក្តី៕