ប្រិយមិត្តមួយចំនួនជ្រាបមកហើយថា តារាចម្រៀង ណូលី ធ្លាប់បានបង្ហើបប្រាប់មហាជនថាលោកឡើងច្រៀងមួយបទបានចំនួន២០០០ដុល្លារក្នុងថ្ងៃមង្គលកូនកំលោះកម្ពុជានិងកូនក្រមុំវៀតណាមដែលល្បីខ្លាំងនៅលើបណ្តាញសង្គម។ ទោះជាយ៉ាងណាតម្លៃខ្លួនដែលតារាចម្រៀងរូបនេះទទួលបានចំនួន២០០០ដុល្លារគឺជារឿងមិនពិតឡើយ។
«ភាសាបេះដូង» ពីសំនៀងរបស់តារាចម្រៀង ណូលី អំពីគូស្នេហ៍ឆ្លងប្រទេសរវាងកូនកំលោះ អាន ឡុងហួរ និងកូនក្រមុំជាវៀតណាម ង្វៀន ធីយៀន បានទាញការចាប់អារម្មណ៍យ៉ាងច្រើនប៉ុន្តែក៏រងនូវភាពចម្រូងចម្រាសដូចគ្នា។ ការជជែកវែកញែកនេះបានចាប់ផ្តើមនៅពេលដែល តារាចម្រៀង ណូលី បានបង្ហើបពីតម្លៃខ្លួនបាននូវទឹកប្រាក់ចំនួន២០០០ដុល្លារក្នុងមួយបទ ហើយត្រូវបានអ្នកលេងបណ្តាញសង្គមបញ្ចេញមតិរិះគន់សំឡេងរបស់លោកថាសំឡេងដូចភេទទី៣សោះបាន២០០០ដុល្លារដែរ។ ការរិះគន់នេះទៀតសោតភរិយាតារាចម្រៀងរូបនេះក៏បានចេញមុខតបតជំនួសស្វាមីដូចគ្នា។
បន្ទាប់ពីរឿងនេះបានសាយភាយធ្វើឱ្យកូនកំលោះកើតទុក្ខមិនសុខចិត្តពីព្រោះតួលេខដែល ណូលី បង្ហាញជាសាធារណពុំត្រឹមត្រូវឡើយរហូតដល់តារាចម្រៀងរូបនេះបានចេញមកបញ្ជាក់សាជាថ្មីអំពីតម្លៃខ្លួនពុំមែនតួលេខ២០០០ដុល្លារនោះទេ ផ្ទុយមកវិញគឺលោកទទួលបានតម្លៃខ្លួនរហូតដល់ទៅជិត៤០០០ដុល្លារឯណោះ។ នេះបើតាមការបញ្ជាក់របស់ ណូលី នៅលើ Story Facebook។
ដ្បិតតែសំឡេងរបស់លោករងការវែកញែកប៉ុន្តែ តារាចម្រៀង ណូលី ហាក់ត្រូវប៉ាន់ទីផ្សារបទចម្រៀងសម្រាប់គូស្នេហ៍យ៉ាងច្រើន។ កន្លងមកលោកធ្លាប់ផលិតបទចម្រៀងសម្រាប់អាពាហ៍ពិពាហ៍សម្រាប់ខ្លួននិងអ្នកដទៃបានជាច្រើនដូចជាបទ «ពន្លឺច័ន្ទថ្លា» «ចាំជាតិ» «មួយលានជាតិ» និងបទ «ស្រលាញ់អូនរយពាន់ម៉ឺនឆ្នាំ» ជាដើម៕
