បន្ទាប់ពីតារាចម្រៀង ទេព ពិសិដ្ឋ បានចេញបកស្រាយពីរឿងនៅក្នុងរង្វង់គ្រួសារបានធ្វើឱ្យមហាជន និង អ្នកនៅក្នុងចង្កោមសិល្បៈរំជួលចិត្តយ៉ាងខ្លាំងនិងចេញមកផ្តល់កម្លាំងចិត្តយ៉ាងច្រើនកុះករ។ ងាកមកកាន់ Goofy វិញទោះបីជារូបគេមិនបង្ហោះចំឈ្មោះប៉ុន្តែគេដឹងថាសំណេររបស់អ្នកចម្រៀងរ៉េបរូបនេះចង់សម្តៅទៅកាន់ ទេព ពិសិដ្ឋ ដែលស្ថិតនៅក្នុងភាពតានតឹងទោះបីជាពេលនេះមិត្តភាពរបស់អ្នកទាំងពីរប្រេះឆាមើលមុខគ្នាមិនចំក៏ដោយ។
នៅរសៀលថ្ងៃទី២ ខែកុម្ភៈ Goofy បាននិយាយនៅលើគណនីហ្វេកប៊ុកផ្ទាល់ខ្លួនថា «ទោះបីពួកគេឈ្លោះគ្នាតែគេមិនដែលមានចិត្តគុំគួនម្តងណាឡើយព្រោះតែមិត្តសម្លាញ់មានចំណែកធ្វើឱ្យគេស្គាល់ហ៊ីបហបហើយគ្រប់គ្នាបានស្គាល់ឈ្មោះ Goofy ។ Goofy បាននិយាយពាក្យក្នុងចិត្តថា «គ្នាមិនហ៊ាននិយាយអ្វីច្រើនក្នុងពេលនេះ តែសង្ឃឹមឯងនៅចាំពេលពួកយើងហូបបាយខ្លោចជុំគ្នា ហើយពេលដែលពួកយើងនៅជុំគ្នាដំបូងនៅTKឯងដឹងហើយថាមានអីញុំាហ្នឹងគ្នាមិនដែលភ្លេចអនុស្សាវរីយ៍ទាំងអស់ហ្នឹងទេ»។
អ្នកចម្រៀងរ៉េប Goofy បាននិយាយថារូបគេបានមើលឃើញចិត្តស្មោះត្រង់ដែលចង់សម្តៅដល់ ទេព ពិសិដ្ឋ តាំងពីជិះម៉ូតូមកយកគេនៅផ្ទះជួលមកម្ល៉េះ។ Goofy តែងតែកោតសរសើរស្នាដៃមិត្តសម្លាញ់របស់ខ្លួនព្រោះតែស្នាដៃខុសប្លែកពីគេ។ ទោះបីជាពេលនេះអ្នកទាំងពីរមិនមើលមុខគ្នាមិនចំក្តីប៉ុន្តែគេនៅតែមានមោទនភាពចំពោះ ទេព ពិសិដ្ឋ ហើយកោតសរសើរពីការខំប្រឹងនឹងដំណើរជីវិត។
ចុងក្រោយនៃសំណេរ Goofy បានជូនពរមិត្តសម្លាញ់ដែលកម្សត់កម្រជាមួយគ្នាឱ្យកាន់តែជោគជ័យលើវិស័យសិល្បៈកាន់តែខ្លាំងជាងនេះទៅទៀត និងបានផ្តល់កម្លាំងចិត្តឱ្យ ទេព ពិសិដ្ឋ ឱ្យកាន់តែរឹងមាំ។
គួរបញ្ជាក់ផងដែរថា នៅក្នុងបទចម្រៀង «20 Out Now » របស់ ទេព ពិសិដ្ឋ និង NPN បានបញ្ជូលឈ្មោះ Goofy ដែលជាមិត្តសម្លាញ់នៅក្នុងបទចម្រៀង។ អំឡុងពេល Goofy ប្រកួតផ្តាច់ព្រ័ត្រនៅក្នុងកម្មវិធីប្រលងចម្រៀងរ៉េប ទេព ពិសិដ្ឋ ក៏បានទៅចូលរួមលើកទឹកចិត្តដោយផ្ទាល់ផងដែរ។ យ៉ាងណាមិញ ក្រោយមកអ្នកទាំងពីររស់នៅដាច់ដោយឡែកលែងភ្ជាប់ទំនាក់ទំនងល្អដូចមុនផងដែរ៕
