ខេត្តក្រចេះមានតំបន់ទេសចរណ៍ និងរមណីយដ្ឋានជាច្រើនកន្លែង ដែលទាក់ទាញភ្ញៀវទេសចរជាតិ-អនុ្តរជាតិមកកម្សាន្តជារៀងរាល់ឆ្នាំ ក្នុងនោះរមណីយដ្ឋានព្រែកកាំពី ស្ថិតនៅភូមិក្បាលជួរ ឃុំសំបុក ស្រុកចិត្របុរី មានចម្ងាយ១៦គីឡូម៉ែត្រពីទីរួមខេត្ត បានទាក់ទាញភ្ញៀវទេសចរមកម្សាន្តច្រើនជាងគេ ជាពិសេស នៅខែមេសា ជាពេលបុណ្យចូលឆ្នាំខ្មែរ ។ ភ្ញៀវទេសចរមកទីនេះអាចអង្គុយលេងពីព្រឹកដល់ល្ងាច និងបរិភោគអាហារលើកញ្ចុះតូចៗដែលត្រូវបានសង់លើផ្ទៃទឹក ព្រមទាំងអាចហែលទឹកលេងយ៉ាងរីករាយ ។
រមណីយដ្ឋានកាំពី ស្ថិតនៅតាមផ្លូវជាតិលេខ៧ ពេលទៅដល់ស្ពានព្រែកកាំពី យើងនឹងឃើញទិដ្ឋភាពមួយដ៏ល្អប្លែក គឺផ្ទៃទឹកទន្លេមេគង្គទាំងមូលបានជ្រៀកជាចំណែកតូចៗដោយពំនូតកោះរាប់ម៉ឺន មានរុក្ខជាតិដុះខៀវស្រងាត់ ។ រមណីយដ្ឋាននេះជាក៏ជាជម្រកសត្វផ្សោត ដែលជាទីពេញនិយមរបស់ភ្ញៀវទេសចរមកលេងផងដែរ ចាប់ពីខែមករា ដល់ខែឧសភា រីឯជម្រៅទឹកចាប់ពី០.៥ម៉ែត្រ ទៅ១.៣០ម៉ែត្រប៉ុណ្ណោះ ទឹកថ្លាដូចកញ្ចក់ និងហូរក្នុងល្បឿនមិនបង្កគ្រោះថ្នាក់ ។ លក្ខណៈអំណោយផលល្អពីធម្នជាតិ ទើបធ្វើឱ្យរមណីយដ្ឋាននេះមានសេវាកម្មផ្សេងៗ ដូចជា ៖ ស្ពានចម្លង កញ្ចុះ កន្លែងលក់ម្ហូបអាហារ ភេសជ្ជៈ និងផ្ញើយានជំនិះ ។
ភ្ញៀវទេសចរនិយមមកកម្សាន្តនៅរមណីយដ្ឋានព្រែកកាំពីនៅរដូវប្រាំង ពីព្រោះទឹកក្នុងទន្លេមេគង្គស្រករាក់អាចអង្គុយលេងលើកញ្ចុះបាន រីឯនៅរដូវវស្សាវិញ ទឹកទន្លេឡើងមានកម្ពស់ខ្ពស់ មិនអាចងូតទឹកបានទេ ។ មុននឹងទៅរមណីយដ្ឋានព្រែកកាំពី ភ្ញៀវទេសចរអាចទិញវត្ថុអនុស្សាវរីយស្អាតៗជាច្រើនដែលអ្នកភូមិធ្វើឡើងពីសាច់ឈើដាក់លក់តាមដងផ្លូវ ដែលបច្ចុប្បន្ន ការិយាល័យទេសចរណ៍ខេត្តបានខិតខំធ្វើឱ្យប្រសើរឡើង និងរៀបចំរមណីយដ្ឋានឱ្យកាន់តែល្អ មានភាពទាក់ទាញកាន់តែខ្លាំង ។
រមណីយដ្ឋានព្រែកកាំពី សាកស័ក្តិសម្រាប់ការដើរកម្សាន្តជាក្រុមគ្រួសារ ឬមកជាមួយមិត្តភក្តិពេលចូលបុណ្យចូលឆ្នាំខ្មែរ ដែលអាចសម្រាកយកខ្យល់អាកាសបរិសុទ្ធពីទន្លេមេគង្គផ្ទាល់ ។ មុនដំបូង ត្រូវចុះជណ្តើរពីថ្នល់ជាតិតាមច្រាំងទន្លេមកក្រោម ទើបមកដល់កញ្ចុះលើផ្ទៃទឹក បន្ទាប់មក ភ្ញៀវទេសចរអាចជួលកញ្ចុះសម្រាកលើអង្រឹង ហើយកុម្ម៉ង់អាហារមកបរិភោគលើផ្ទៃទឹក ប៉ុន្តែសម្រាប់ភ្ញៀវទេសចរក្នុងស្រុកបានខ្ចប់អាហារមកបរិភោគដោយខ្លួនឯង ។
ភ្ញៀវទេសចរក្នុងស្រុកនិយាយស្រដៀងគ្នាថា ពេលមកកម្សាន្តនៅទីនេះខែប្រាំងទោះជាក្តៅបន្តិចមែន ប៉ុន្តែពេលឈានជើងដើរលើស្ពានក្តារលើផ្ទៃទឹកទៅរកកញ្ចុះនោះ ធ្វើឱ្យពួកគេមានអារម្មណ៍ស្រស់ស្រាយណាស់ និងអាចងូតទឹកទន្លេដ៏ថ្លាត្រជាក់មានទឹករាក់ហូរតិចៗ ។
សរុបមក រមណីយដ្ឋានកាពី គឺជារមណីយដ្ឋានទេសចរណ៍ធម្មជាតិដែលមានសម្រស់ទេសភាពទឹកទន្លេដ៏ស្រស់បំព្រង ហើយក៏ជាជម្រកដ៏សុខសាន្តសម្រាប់សត្វផ្សោតទន្លេមេគង្គផងដែរ ។ បច្ចុប្បន្ន រមណីយដ្ឋាននេះបានក្លាយជាតំបន់លំហែកាយមួយដ៏ពេញនិយម និងល្បីល្បាញបំផុតនៅខេត្តក្រចេះ នារដូវប្រាំង ។
គួរបញ្ជាក់ថា ក្រៅពីរមណីយដ្ឋានកាំពី ខេត្តក្រចេះ ក៏មានតំបន់ទេសចរណ៍ជាច្រើនកន្លែងទៀត ដូចជា ៖ វត្តសសរ១០០ ភ្នំសុពណ៌កាឡី សួនស្នេហ៍ថ្មបាំង កោះទ្រង់ ភ្នំសំបុក អន្លង់ផ្សោត និងក្រឡានថ្មគ្រែ ។ ក្រៅពីនេះ ភ្ញៀវទេសចរក៏អាចដើរទស្សនាផ្ទះ និងសំណង់អគារចាស់ៗបន្សល់ពីសម័យបារាំង ដែលមានទីតាំងនៅទីរួមខេត្តក្រចេះតែម្តង ៕
