អ្នកបង្កើតមាតិកានិងជាអ្នកលក់អនឡាញ សឹក សិលា និង Anna ដែលជាគូស្នេហ៍បានចេញវីដេអូមួយប្រាប់សាធារណជនដែលមានបំណងទៅលេងកម្សាន្តនៅប្រទេសចិនត្រូវតែហ៊ានតថ្លៃ។ ការចេញមកបង្ហាញបែបនេះដោយសារអ្នកទាំងពីរជួបបទពិសោធន៍ទិញខ្សែដៃមួយតម្លៃ១៤០យ័នចុះមកសល់ត្រឹមតែ៣០យ័នគិតជាប្រាក់រៀលប្រមាណ៨០ ០០០រៀលមកនៅត្រឹមតែ១៧ ០០០រៀល។
នៅយប់ថ្ងៃទី២០ ខែមករា លោក សឹក សិលា បានបង្ហោះវីដេអូដោយការហួសចិត្តជាខ្លាំងនិងបានចែករំលែកបទពិសោធន៍ទៅកាន់អ្នកមានបំណងទៅកម្សាន្តនៅចិនត្រូវតែដឹងមុននឹងទិញអីវ៉ាន់នៅ Chengdu ។ អ្នកបង្កើតមាតិការូបនេះបាននិយាយថា ពេលមក Chengdu ដាច់ខាតត្រូវតែតថ្លៃនៅតំបន់រមណីដ្ឋានឬកន្លែងលក់របស់របរអនុស្សាវរីយ៍តាមផ្លូវឬតាមផ្សារ។ លោកបន្តថា លោកបានទៅកន្លែងមួយនៅ Chengdu ហើយលោកបានប៉ះខ្សែដៃមួយខ្សែដោយសារតែស្រស់ស្អាតប៉ុន្តែមិនចង់ទិញនោះទេ។ ភ្លាមនោះអ៊ំស្រីម្នាក់មកចាប់ដៃគូស្នេហ៍លោកជាប់ដោយប្រើសម្តីល្អ គួរឱ្យអាណិតដើម្បីជួយទិញខ្សែដៃរបស់គាត់។
អ្នកលក់អនឡាញរូបនេះបន្តទៀតថា ដោយសារតែខ្សែដៃនោះពួកគេមិនចង់បាននោះទេគ្រាន់តែចង់មើលប៉ុណ្ណោះ តែ Anna បានតថ្លៃចោលដោយដំបូងបានកាត់ថ្លៃ១៤០យ័ន ហើយនាងដើរចេញក៏អ្នកលក់ទាញដៃនាងចូលវិញដោយចុះថ្លៃមកនៅនៅត្រឹម៨០យ័ន ។ ទោះជាយ៉ាងណាអ្នកទាំងពីរបានផ្លាស់ប្តូរខ្សែមួយផ្សេងទៀតដែលអ្នកលក់អះអាងថាមានតម្លៃ៥០យ័នស្មើគ្នាប៉ុន្តែពួកគេតចោលមកនៅសល់ត្រឹមតែ៣០យ័នប៉ុណ្ណោះ។
លោក សឹក សិលា និងគូស្នេហ៍មានការភ្ញាក់ផ្អើលយ៉ាងខ្លាំងនៅពេលខ្សែដៃនៅ Chengdu មានតម្លៃ១៤០យ័នចុះមកនៅសល់ត្រឹមតែ៣០យ័នប៉ុណ្ណោះ។ ជាមួយនឹងបទពិសោធន៍នេះ សឹក សិលា បានផ្តាំទស្សនិកជនថាពេលមកចិនត្រូវតថ្លៃដោយមិនបាច់ខ្លាចចិត្តនោះទេហើយអ្នកលក់ក៏មិនបានខឹងយើងដែរ។
ការចែករំលែកនេះ អ្នកមួយចំនួនដែលធ្លាប់ទៅចិនបានបង្ហាញថាពួកគេក៏ធ្លាប់ជួបប្រទះមិនខុសគ្នាប៉ុន្មានដូចអ្វីដែល សិលា និង Anna បានជួបនោះទេ៕
