ផ្លាស់ប្តូរទម្លាប់បន្ទាន់! ហាមដាក់បន្លែ៦ប្រភេទក្នុងទូរទឹកកក ពីព្រោះបាត់បង់រសជាតិ និងអាហារូបត្ថម្ភ

មនុស្សភាគច្រើនតែងតែយល់ខុសថា ការដាក់បន្លែក្នុងទូរទឹកកកនឹងជួយឱ្យបន្លែនៅស្រស់បានយូរ អាចបរិភោគបានច្រើនថ្ងៃ ប៉ុន្តែការពិត មិនមែនបន្លែទាំងអស់សុទ្ធតែអាចទុកក្នុងទូរទឹកកកនោះទេ បន្លែមួយចំនួនឆាប់ត្រជាក់ណាស់ ប្រសិនបើដាក់វាក្នុងទូរទឺកកកកាន់តែយូរថ្ងៃ វាកាន់តែឆាប់រលួយ ។ លើសពីនេះ វាបាត់បង់រសជាតិ និងអាហារូបត្ថម្ភ ព្រមទាំងប៉ះពាល់សុខភាព ។

គ្រូពេទ្យ និងអ្នកជំនាញសុខភាពហាមដាច់ខាតដាក់បន្លែ៦ប្រភេទនេះក្នុងទូរទឹកកក ដោយណែនាំឱ្យទុកវានៅខាងក្រៅដែលមានសីតុណ្ហភាពធម្មតា ដើម្បីរក្សារសជាតិ និងអាហារូបត្ថម្ភ រួមមាន ៖

១-ដំឡូងបារាំង ៖ សីតុណ្ហភាពត្រជាក់នឹងធ្វើឱ្យដំឡូងបារាំងផ្លាស់ប្តូររសជាតិ ឬមានរសជាតិផ្អែមជាងមុន ហើយពេលយកវាទៅបំពងជាមួយខ្លាញ់នឹងបង្កជាសារធាតុមហារីក (Acrylamide) ។ ក្រៅពីនេះ សំណើមក្នុងទូរទឹកកកធ្វើឱ្យវាឆាប់ដុះពន្លក និងប្រមូលផ្តុំសារធាតុពុលសូឡានីន ។

២-ប៉េងប៉ោះ ៖ សីតុណ្ហភាពក្នុងទូរទឹកកកក្រោម១០អង្សារសេ នឹងធ្វើឱ្យសាច់ប៉េងប៉ោះបែកចេញទឹក បាត់បង់រសជាតិ និងបរិមាណវីតាមីន C ធ្លាក់ចុះ ។

៣-តាសក់ ៖ ជាបន្លែឆាប់ត្រជាក់បំផុត ប្រសិនបើដាក់វាក្នុងទូរទឹកកក វានឹងចេញខ្មៅដុំៗ ឆាប់រលួយជាងដាក់នៅខាងក្រៅ ។

៤-ម្ទេសខ្ចី ៖ សំណើមក្នុងទូរទឹកកកនឹងបំផ្លាញសារធាតុស្រទាប់ការពារម្ទេសខ្ចីពីធម្មជាតិ ព្រមទាំងដុះផ្សិតចេញពីខាងក្នុងផ្លែ រហូតដល់ខាងក្រៅផ្លែ ។

៥-ខ្ទឹមស ៖ សំណើមក្នុងទូរទឹកកកនឹងជំរុញដល់ការដុះពន្លក បណ្តាលឱ្យខ្ទឹមសស្ងួតក្រៀមស្វិត និងបាត់បង់ក្លិនឈ្ងុយ ។

៦-ខ្ទឹមបារាំង ៖ សីតុណ្ហភាពត្រជាក់ និងសំណើមក្នុងទូរទឹកកក បណ្តាលឱ្យខ្ទឹមបារាំងមិនអាចប្រឆាំងជាមួយបាក់តេរី, ដុះផ្សិត និងមានសាច់ជ្រាយ ។

សរុបមក គួរទុកបន្លែទាំង៦ប្រភេទនេះនៅកន្លែងស្ងួត មានខ្យល់ចេញ-ចូលគ្រប់គ្រាន់ ពីព្រោះវាមិនត្រឹមតែជួយកាត់បន្ថយកាកសំណល់អាហារ (Food Waste) ក្នុងផ្ទះបាយប៉ុណ្ណោះទេ គឺវានឹងផ្តល់រសជាតិ និងអាហារូបត្ថម្ភដល់អ្នកបរិភោគគ្រប់ពេលវេលា ៕