Charmaine Sheh និង Bosco Wong ឈ្នះពានរង្វាន់ធំនៅក្នុងកម្មវិធីពានរង្វាន់ TVB

តារាសម្តែងហុងកុង Charmaine Sheh និង Bosco Wong បានឈ្នះពានរង្វាន់តារាម្តែងប្រុស/ស្រីឆ្នើមបំផុតនៅក្នុងពិធីប្រគល់រង្វាន់ប្រចាំឆ្នាំរបស់ TVB។ កម្មវិធី TVB Awards ឆ្នាំ ២០២៥ បានធ្វើឡើងនៅយប់ថ្ងៃទី ៤ ខែមករា ដោយចំណុចលេចធ្លោគឺរឿងភាគ រាជនីសារព័ត៌មាន វគ្គ២ (The Queen of News 2) ដែលបានឈ្នះពានរង្វាន់សំខាន់ៗជាច្រើន។

តារាសម្តែងសំខាន់ពីររូបនៃរឿងភាគនេះគឺ Bosco Wong និង Charmaine Sheh បានឈ្នះពានរង្វាន់ជាតារាសម្តែងប្រុស/តារាសម្តែងស្រីដែលមានប្រជាប្រិយភាពបំផុត និងតារាសម្តែងប្រុស/តារាសម្តែងស្រីឆ្នើម។ The Queen of News 2 វិលជុំវិញសម្ពាធការងារ និងជីវិតដែលអ្នកធ្វើការក្នុងឧស្សាហកម្មប្រព័ន្ធផ្សព្វផ្សាយប្រឈមមុខ។ ថ្លែងពេលទទួលបានពានរង្វាន់តារាសម្តែងប្រុសល្អបំផុត Bosco Wong បាននិយាយថា TVB គឺជាកន្លែងដែលលោកធំធាត់ ជាកន្លែងដែលលោកត្រូវបានបង្កើតឡើង។ បើគ្មាន TVB ទេ នោះនឹងគ្មាន Bosco Wong ទេ។

តារាសម្ដែងរូបនេះបានថ្លែងអំណរគុណដល់ម្ដាយរបស់លោក ដោយបានបង្ហាញថាសុខភាពរបស់ម្តាយរបស់លោកមិនល្អ ហើយបានប្រាប់គាត់ឱ្យ «ស្នាក់នៅផ្ទះហើយមើលពិធីប្រគល់រង្វាន់»។ Bosco Wong បានបង្កឱ្យមានការចាប់អារម្មណ៍យ៉ាងខ្លាំងនៅលើបណ្ដាញសង្គម និងទំព័រអ្នកគាំទ្របន្ទាប់ពីឈ្នះពានរង្វាន់តារាសម្ដែងប្រុសឆ្នើមជាលើកដំបូងបន្ទាប់ពីការតែងតាំងចំនួន ១០ ដង។
Charmaine Sheh បានបង្កើតកំណត់ត្រាមួយដោយឈ្នះពានរង្វាន់តារាសម្តែងស្រីឆ្នើមរបស់ទូរទស្សន៍ TVB ចំនួន៤ដង។ នាងបាននិយាយថា «យប់នេះនឹងក្លាយជាយប់ដែលមិនអាចបំភ្លេចបានសម្រាប់ខ្ញុំ។ អ្នកឈ្នះនៅថ្ងៃនេះគឺ Man Wai Sam តួនាទីរបស់ Charmaine Sheh ក្នុងរឿង The Queen of News 2 ដែលជាតួអង្គដែលបាននាំខ្ញុំចូលទៅក្នុងការសន្ទនាជាមួយទស្សនិកជន និងធ្វើឱ្យពួកគេចាប់អារម្មណ៍។តារាវ័យ ៥០ ឆ្នាំរូបនេះបានលើកទឹកចិត្តតារាសម្ដែងជំនាន់ក្រោយថា៖ «ប្រវត្តិសាស្ត្រត្រូវបានបង្កើតឡើងដោយមនុស្ស ដរាបណាអ្នកមិនបោះបង់ អ្នកនឹងបង្កើតប្រវត្តិសាស្ត្រ»។

Charmaine Sheh បានចូលប្រឡូកក្នុងវិស័យកម្សាន្តក្នុងឆ្នាំ ១៩៩៧ បន្ទាប់ពីឈ្នះពានរង្វាន់លេខពីរក្នុងកម្មវិធីប្រកួតបវរកញ្ញាហុងកុង។ នាងគឺជាតារាសម្តែងដ៏លេចធ្លោម្នាក់នៅលើកញ្ចក់ទូរទស្សន៍ TVB ក្នុងទសវត្សរ៍ឆ្នាំ ២០០០។ នៅពេលដែលនាងចាកចេញពី TVB ក្នុងឆ្នាំ ២០១៦ មនុស្សជាច្រើនជឿថានាងនឹងបាត់បង់ «ប្រព័ន្ធគាំទ្រ» របស់នាង ហើយមិនអាចរីកចម្រើនបន្ថែមទៀតក្នុងអាជីពរបស់នាងបានទេ ព្រោះហួសពីចំណុចកំពូលរបស់នាង។ ទោះជាយ៉ាងណាក៏ដោយ តារាស្រីរូបនេះបានបង្ហាញពីសមត្ថភាពរបស់នាង និងរក្សាតំណែងរបស់នាងនៅក្នុងឧស្សាហកម្មកម្សាន្ត។ តារាស្រីរូបនេះបច្ចុប្បន្ននៅលីវបន្ទាប់ពីមានទំនាក់ទំនងស្នេហាជាង ១០ ដង ។

Bosco Wong មានអាយុ ៤៥ ឆ្នាំ បានចូលរួមក្នុងវិស័យកម្សាន្តអស់រយៈពេល ២៧ ឆ្នាំមកហើយ ហើយមានភាពល្បីល្បាញដោយសារការសម្តែងជាច្រើនរបស់ TVB ។ ក្រៅពីការសម្តែងតារាប្រុសរូបនេះ ក៏ចូលរួមក្នុងអាជីវកម្មម្ហូបអាហារ និងភោជនីយដ្ឋាន និងការផលិតខ្សែភាពយន្តផងដែរ។
នៅក្នុង បទសម្ភាសន៍មួយ ក្នុងឆ្នាំ ២០២៥ តារាសម្តែងរូបនេះបានបង្ហាញថាលោកនៅលីវអស់រយៈពេលជាច្រើនឆ្នាំហើយមិនចង់បានស្នេហាទេ៕