តារាចម្រៀង ជី ដេវីត បានប្រកាសបិទមូលធិនិ «អ្នកចម្បាំងឈាមខ្មែរ» ចាប់ពីយប់ថ្ងៃទី១៩ ខែធ្នូ ខណៈ ទេព បូព្រឹក្ស បានបញ្ជាក់ថានាងនិងស្វាមីនឹងបន្តជួយតាមរបៀបអ្នកទាំងពីរបន្តទៀតដោយមិនមើលនឹងភ្នែកនោះទេ។ ងាកមកខាងមូលនិធិនៅ Vin Mart វិញក៏បានប្រកាសឈប់ទទួលស្បៀងជាបន្តទៀតហើយ ប៉ុន្តែពួកគេនឹងនៅតែបន្តជួយ ខណៈបានបញ្ជាក់ថាសប្បុរសជនអាចបន្តយកស្បៀងដាក់នៅខាង Eat More ឬ ប៉ីប៉ី ឌី បាន។
នៅយប់ថ្ងៃទី១៩ ធ្នូ តារាចម្រៀង ជី ដេវីត បានបង្ហោះថា «មូលនិធិ ‘អ្នកចម្បាំងឈាមខ្មែរ’ សូមជម្រាបជូនបងប្អូនអ្នកគាំទ្រនិងបងប្អូនជនរួមជាតិអំពីដំណឹងនៃការ បិទមូលនិធិនៅក្នុងយប់នេះ។ យើងខ្ញុំសូមអរគុណបងប្អូននិងអ្នកគាំទ្រដែលបានចូលរួមបេសកកម្មនេះជាមួយគ្នាដោយក្តីគោរព អ្វីដែលយើងបានធ្វើគឺបានទៅដល់ដៃបងប្អូនភៀសសឹកច្រើនពាន់គ្រួសារ កងពល ព្រមទាំងវីរជនជួរមុខជាច្រើនទីតាំងដោយហុចផ្ទាល់ដៃ ពេលវេលាដ៏លំបាកមួយនេះពួកយើងនឹងអាចឆ្លងផុតដោយកម្លាំងសាមគ្គីជាតិ សូមទទួលយកការគោរពដ៏ខ្ពង់ខ្ពស់ពីយើងខ្ញុំ»។
ការសម្រេចចិត្តប្រកាសបិទមូលនិធិនេះតារាចម្រៀង ទេព បូព្រឹក្ស បញ្ជាក់ថានឹងនៅតែជួយតាមរបៀបពួកគេ។ ម្ចាស់បទ «វីរនារី» បានបញ្ជាក់ថា «មួយរយៈពេលនេះពួកយើងទាំងអស់គ្នាឆ្លងកាត់ការឈឺចាប់ជាច្រើនដោយភ្នែកផ្ទាល់ ប៉ុន្តែយ៉ាងណាក៏បងប្អូនយើងបានរួមគ្នាដោយសាមគ្គីភាព ខ្ញុំមានមោទនភាពដែលបានចូលរួមក្នងពេលដ៏លំបាកនេះជាមួយបងប្អូនតែក៏ដល់ពេលត្រូវបិទនូវមូលនិធិនេះ, តែខ្ញុំនិងស្វាមីនឹងបន្តជួយតាមរបៀបរបស់ខ្ញុំបន្តទៀតដោយមិនមើលនឹងភ្នែកនោះទេ»។
ជាមួយគ្នានេះដែរ អ្នកបង្កើតមាតិកា សាយទី ក៏បានប្រកាសថានៅថ្ងៃសៅរ៍ ទី២០ ជាថ្ងៃចុងក្រោយដែលខាង Vin Mart ទទួលជំនួយ។ តាមរយៈវីដេអូដែល សាយទី បានបង្ហោះលោកបាននិយាយថាដោយសារតែខ្វះស្បៀងក្នុងការបញ្ចេញទៅខាងកងទ័ពនិងជនភៀសសឹក ប៉ុន្តែលោកបានបញ្ជាក់ថាសាធារណជនអាចយកជំនួយទៅកាន់កន្លែងផ្សេងៗដូចជា eat more ឬ Peypey Dy ក៏បាន។
សាយទី បានបញ្ជាក់ថានៅទីនេះ (Vin Mart) គឺមានតែកម្លាំងជួយប៉ុន្តែពុំមានស្បៀងគ្រប់គ្រាន់ដូច្នេះបងប្អូនអាចចូលរួមមកខាង Vin Mart ត្រឹមថ្ងៃទី២០ ធ្នូនេះ។ ទោះយ៉ាងណា អ្នកបង្កើតមាតិការូបនេះបញ្ជាក់ដែរថាប្រសិនជាមានជំនួយច្រើននឹងបន្តទៀតប៉ុន្តែប្រសិនជាមានជំនួយទៀតនឹងបិទតែម្តងដើម្បីបង្វែរទៅកន្លែងផ្សេងហើយពួកគេនឹងនៅតែបន្តជួយបើទោះបីជាបិទនៅទីនេះក្តី៕
