កម្ពុជា សម្រេចលើកលែង«ទិដ្ឋការ»សាកល្បងសម្រាប់ពលរដ្ឋចិនរយៈពេល៤ខែនៅឆ្នាំ២០២៦

(ភ្នំពេញ)៖ រាជរដ្ឋាភិបាលកម្ពុជា បានសម្រេចផ្តល់ការលើកលែងទិដ្ឋាការ ឬ VISA សាកល្បង សម្រាប់ពលរដ្ឋចិន ដែលធ្វើដំណើរពីប្រទេសចិនមកកម្ពុជា អាចស្នាក់នៅចំនួន ១៤ថ្ងៃ ក្នុងអំឡុងពេល ៤ខែ នៅឆ្នាំ២០២៦ ដោយអ្នកដំណើរត្រូវការបំពេញតែ E-arrival card ប៉ុណ្ណោះ ពុំតម្រូវឱ្យមានពាក្យស្នើសុំ និងបង់កម្រៃសេវាអ្វីទាំងអស់ ។

យោងតាមលិខិតរបស់ទីស្តីការគណៈរដ្ឋមន្ត្រីនាព្រឹកថ្ងៃទី៣ ខែធ្នូនេះ ការអនុវត្តផ្ដល់ការលើកលែងទិដ្ឋាការសាកល្បងសម្រាប់ពលរដ្ឋចិន គឺរយៈពេលស្នាក់នៅចំនួន ១៤ថ្ងៃ ក្នុងអំឡុងពេល ៤ខែ គិតចាប់ពីថ្ងៃទី១៥ ខែមិថុនា ដល់ថ្ងៃ ទី១៥ ខែតុលា ឆ្នាំ២០២៦ ដោយពុំតម្រូវឱ្យមានពាក្យស្នើសុំ និងពុំមានបង់កម្រៃអ្វីឡើយ ពោលគឺគ្រាន់តែបំពេញ E-arrival card ។

តាមលិខិតខាងលើ ក្នុងអំឡុងពេលសុពលភាពនៃការអនុវត្ត ភ្ញៀវចិនអាចអញ្ជើញមក កម្ពុជាប៉ុន្មានលើកក៏បាន។

បន្ថែមលើនោះ រាជរដ្ឋាភិបាលកម្ពុជា ក៏បានអនុញ្ញាតឱ្យក្រសួងការបរទេសកម្ពុជា ដាក់ស្នើទៅរដ្ឋាភិបាលចិន ដើម្បីពិនិត្យ ឱ្យបន្ធូរបន្ថយ និងសម្រួលនីតិវិធីនៃការស្នើសុំទិដ្ឋាការដល់ទេសចរខ្មែរទៅប្រទេសចិនដូចគ្នា ដើម្បីឈានដល់ការអនុវត្តការលើកលែងទិដ្ឋាការបដិការតែម្ដងនាពេលអនាគត។

ទន្ទឹមនឹងនេះ ដើម្បីឲ្យការអនុវត្តខាងលើទទួលបានប្រសិទ្ធភាពខ្ពស់ រាជរដ្ឋាភិបាលកម្ពុជាបានជំរុញឱ្យក្រសួងស្ថាប័នជំនាញពាក់ព័ន្ធ សហការជាមួយវិស័យឯកជននានា ដើម្បីធ្វើការផ្សព្វផ្សាយទៅគោលដៅចិន ប្រទេសចិន ឱ្យបានទូលំទូលាយ និងឆាប់រហ័ស៕