ប្រវត្តិរបស់ Anne Jakapong អតីតប្រធាន Miss Universe មុនពេលប៉ូលិសថៃចេញដីកាចាប់ខ្លួន

យោងតាមប្រព័ន្ធផ្សព្វផ្សាយ Anne Jakapong អតីតនាយកប្រតិបត្តិក្រុមហ៊ុន JKN Global និងជាអតីតប្រធាន Miss Universe ទើបតែត្រូវបានតុលាការថៃចេញដីកាចាប់ខ្លួនពីបទមិនចូលខ្លួនទៅតុលាការក្នុងសំណុំរឿងឆបោកប្រាក់ចំនួន ៣០ លានបាត ប្រមាណ៩៣ម៉ឺនដុល្លារ។

យោងតាមពាក្យបណ្តឹងចាប់ពីថ្ងៃទី ២៤ ខែកក្កដាដល់ថ្ងៃទី ៨ ខែសីហាឆ្នាំ ២០២៣ ស្រី Anne និង JKN Global ត្រូវបានចោទប្រកាន់ពីបទផ្តល់ព័ត៌មានមិនពិតដើម្បីទាក់ទាញអ្នកវិនិយោគឱ្យទិញមូលបត្របំណុល។ Anne មានអាយុ ៤៦ ឆ្នាំគឺជាអ្នកជំនួញកែភេទដ៏ល្បីល្បាញនៅក្នុងប្រទេសថៃ។ នៅឆ្នាំ ២០២២ នាងបានទិញ Miss Universe Organization (MUO) ដែលជាអ្នករៀបចំកម្មវិធីប្រកួតបវរកញ្ញាចក្រវាលក្នុងតម្លៃ ២០លានដុល្លារ។ នាងគឺជានាយកប្រតិបត្តិនៃ JKN Global Group ។

ទោះជាយ៉ាងណាក៏ដោយក្រុមហ៊ុននេះបានជួបប្រទះនឹងវិបត្តិហិរញ្ញវត្ថុ ហើយត្រូវដាក់ពាក្យសុំក្ស័យធន ដោយស្នើសុំឱ្យដំណើរការអាជីវកម្មឡើងវិញនៅឆ្នាំ ២០២៤ ។ នៅខែមករាឆ្នាំ ២០២៤ Anne ត្រូវលក់ភាគហ៊ុន ៥០% របស់នាងនៅក្នុង MUO ។ នៅឆ្នាំដដែលនោះ នាងបានចាកចេញពីតំណែងជា CEO របស់ MUO។

នៅខាងក្រៅអាជីវកម្ម Anne បានបង្ហាញខ្លួននៅក្នុងកម្មវិធីទូរទស្សន៍ជាច្រើនដូចជា Project Runway និង Shark Tank Thailand ហើយត្រូវបានគេស្គាល់ថាជា «Queen of Indian Content Distribution»សម្រាប់ការនាំយករឿងភាគបូលីវូដទៅកាន់ប្រទេសថៃ។

មុនពេលក្លាយជាមហាសេដ្ឋី Anne Jakkaphong បានជួបប្រទះភាពក្រីក្រក្នុងវ័យក្មេង។ នៅក្នុងបទសម្ភាសន៍មួយ Anne ស្រក់ទឹកភ្នែកនៅពេលនាងរៀបរាប់ពីពេលវេលាដែលនាងត្រូវបានគេធ្វើបាប និងបៀតបៀនផ្លូវភេទពេលកំពុងសិក្សានៅបរទេស។ បន្ទាប់ពីបញ្ចប់ការសិក្សានៅអាយុ ២១ ឆ្នាំ Anne បានត្រឡប់ទៅប្រទេសថៃដើម្បីកាន់កាប់ហាងជួលវីដេអូរបស់ឪពុកនាង ប៉ុន្តែអាជីវកម្មមិនដំណើរការល្អទេ។

បន្ទាប់មក Anne បានងាកទៅផលិតភាពយន្ត ដែលបានក្លាយជាប្រភពចំណូលដ៏សំខាន់ដំបូងរបស់នាង ដោយដាក់មូលដ្ឋានគ្រឹះសម្រាប់ដំណើររបស់នាង ដើម្បីក្លាយជាសហគ្រិន។ តាមរយៈការនាំចូលមាតិកាអន្តរជាតិមកលក់ឱ្យស្ថានីយទូរទស្សន៍ថៃមួយរយៈក្រោយមក Anne បានបង្កើតក្រុមហ៊ុន JKN Global Media (ក្រោយមក JKN Global Group) ដោយមានដើមទុនដំបូងត្រឹមតែ ២៦,៥០០ ដុល្លារប៉ុណ្ណោះ។ ក្រុមហ៊ុននេះបានពង្រីកយ៉ាងឆាប់រហ័សទៅក្នុងការផលិតខ្សែភាពយន្ត ការផ្សាយពាណិជ្ជកម្ម ការចែកចាយអាហារដែលមានមុខងារ និងបានរក្សាសិទ្ធិកម្មវិធី និងភាពយន្តជាច្រើនពីប្រទេសកូរ៉េ ឥណ្ឌា ចិន ហ្វីលីពីន ទៅកាន់សហរដ្ឋអាម៉េរិក។

តាមប្រភពបានឱ្យដឹងទៀតថា Anne Jakkaphong ធ្លាប់កាន់កាប់ក្រុមហ៊ុនចំនួន ១៥ដែលប្រតិបត្តិការលើប្រព័ន្ធផ្សព្វផ្សាយ ការផ្សាយពាណិជ្ជកម្ម និងទំនិញប្រើប្រាស់។
ក្នុងឆ្នាំ ២០២០ Anne ជាប់ចំណាត់ថ្នាក់ទី ១៤៩ ក្នុងបញ្ជីមហាសេដ្ឋីក្នុងប្រទេសថៃ។ ទស្សនាវដ្ដី Forbes បានចាត់ចំណាត់ថ្នាក់ Anne ថាជាអ្នកកែភេទដែលមានជាងគេទីបីនៅលើពិភពលោក ជាមួយនឹងទ្រព្យសម្បត្តិសុទ្ធប៉ាន់ស្មានចំនួន ២១០លានដុល្លារក្នុងឆ្នាំ ២០២០។

នៅក្នុងខែមិថុនា ឆ្នាំ២០២៥ Anne Jakkaphong បានលាលែងពីតំណែងនាយកប្រតិបត្តិទាំងអស់នៅ JKN បន្ទាប់ពីត្រូវបានចោទប្រកាន់ពីបទរៀបចំរបាយការណ៍ហិរញ្ញវត្ថុ និងពិន័យជាប្រាក់ចំនួន ៤.១ លានបាត និងត្រូវបានហាមឃាត់មិនឱ្យកាន់តួនាទីជានាយក ឬអ្នកគ្រប់គ្រងរយៈពេល ៥៦ ខែ៕