អនុប្រធានទី១ ព្រឹទ្ធសភាកម្ពុជា ទាត់ចោលការផ្សាយរបស់កាសែត The Nation ពីទីក្រុងហ្សឺណែវ

ទីក្រុងហ្សឺណេវ៖ ឯកឧត្តម អ៊ូច បូរិទ្ធ អនុប្រធានទី១ ព្រឹទ្ធសភាកម្ពុជា បានធ្វើការទាត់ចោលទាំងស្រុងចំពោះការចុះផ្សាយរបស់កាសែតថៃ The Nation ថាគណៈប្រតិភូកម្ពុជាសុំពន្យាពេលកិច្ចប្រជុំទ្វេភាគី ដែលបានគ្រោងទុកជាមួយគណៈប្រតិភូថៃក្នុងកិច្ចប្រជុំលើកទី ១៥១ នៃមហាសន្និបាត IPU។ លោកបានបញ្ជាក់ថា កម្ពុជាគ្មានគម្រោងណាមួយក្នុងការជួបប្រជុំគ្នាទ្វេភាគីជាមួយថៃនៅទីនេះឡើយ។

តាមរយៈកិច្ចសម្ភាសន៍ផ្ទាល់ពីទីក្រុងហ្សឺណែវ ប្រទេសស្វុីស ក្នុងឱកាសទៅចូលរួមកិច្ចប្រជុំមហាសន្និបាត IPU នៅមជ្ឈមណ្ឌលសន្និសីទអន្តរជាតិ ចាប់ពីថ្ងៃទី១៩ ដល់ថ្ងៃទី២៣ ខែតុលា ឆ្នាំ២០២៥ ឯកឧត្តម អ៊ូច បូរិទ្ធ អនុប្រធានទី១ ព្រឹទ្ធសភាកម្ពុជា បានថ្លែងថា៖ ការផ្សព្វផ្សាយរបស់កាសែតថៃ The Nation គឺគ្មានការពិតទាំងស្រុង គណៈប្រតិភូកម្ពុជាគ្មានគម្រោងណាមួយដែលបានរៀបចំឲ្យមានការជួបប្រជុំគ្នារវាងគណៈប្រតិភូកម្ពុជា និងគណៈប្រតិភូថៃនោះទេ។

ឯកឧត្តមបានបន្ថែមទៀតថា ការផ្សព្វផ្សាយរបស់កាសែត The Nation គឺជាការបំភ្លៃដើម្បីបង្កើតឲ្យមានរឿងរ៉ាវយល់ច្រឡំគ្នា និងបង្កជាបញ្ហា ប៉ុន្តែតាមការពិតគ្មានរឿងអ្វីទាល់តែសោះ មិនត្រឹមតែប៉ុណ្ណោះទេ សូម្បីតែតួនាទីរបស់ឯកឧត្តមដែលជា «អនុប្រធានទី១» ព្រឹទ្ធសភាកម្ពុជា ក៏កាសែតមួយនេះសរសេរមិនត្រូវ បែរជាដាក់ថា «អនុប្រធានទី២» ផងដែរ។

គួរជម្រាបថា ការចេញមកបញ្ជាក់របស់ឯកឧត្តមដូចខាងលើនេះ គឺបន្ទាប់ពីសារព័ត៌មានថៃ ដែលមានជាពិសេសកាសែត The Nation បានចុះផ្សាយព័ត៌មានដែលមានខ្លឹមសារប្រឌិតថា «គណៈប្រតិភូសភាកម្ពុជា បានពន្យារពេលកិច្ចប្រជុំទ្វេភាគី ដែលបានគ្រោងទុកជាមួយគណៈប្រតិភូថៃ ក្នុងកិច្ចប្រជុំលើកទី ១៥១ នៃសហភាពអន្តរសភា (IPU) នៅទីក្រុងហ្សឺណែវ ដោយមិនប្រាប់ហេតុផល និងគ្មានកំណត់» ទាំងដែលជាក់ស្ដែងកម្ពុជាមិនដែលមានគម្រោងជួបប្រជុំទ្វេភាគីជាមួយថៃ ក្នុងមហាសន្និបាត IPU នេះទាល់តែសោះ៕