លោក ហេង វិសាល និង ជា ស្រីនា ដែលជាអ្នកជំនួញវ័យក្មេងនិងជា Influencer បានចេញមកបញ្ជាក់ព្រមៗគ្នាក្រោយពីមានគណនីហ្វេកប៊ុកមួយបង្ហោះថានៅលួចប្រើសេវាកម្មរបស់ថៃទាំងធ្លាប់អំពាវនាវឱ្យប្រជាជនខ្មែរពហិការ។ វិសាល និង ស្រីនា ចេញមកសារភាពតែម្តងថារូបទី១គឺហាងរបស់ខ្លួន ហើយការដែលនៅប្រើសេវាកម្មថៃដោយសារតែមានកុងត្រាមិនអាចផ្តាច់ពេលនេះបានទេ។
នៅរសៀលថ្ងៃទី២១ ខែតុលា គណនីហេកប៊ុកមួយបានបង្ហោះរូបភាពដោយភ្ជាប់មកជាមួយនឹងខ្លឹមសារថា « ពេលមានជម្លោះ ពួកគេជាអ្នកមានសម្លេងចូលរួមអំពាវនាវឱ្យប្រជាជនខ្មែរទាំងមូលឈប់ប្រើផលិតផលថៃដើម្បីគាំទ្រកងទ័ពយើង។ ឥឡូសភាពការណ៍ស្ងប់បន្តិចពួកគេបែរជាលួចប្រើប្រាស់ សេវាកម្មទាំងនោះវិញ….»។ 
ការបង្ហោះនេះបានជំរុញឱ្យ ហេង វិសាល និង ជា ស្រីនា ចូលខ្លួនមកបង្ហាញច្បាស់ៗតែម្តងថាជារូបហាងរបស់ខ្លួន។ អ្នកទាំងពីរបានសរសេរដូចគ្នាថា «កុំឱ្យពិបាករក រូបទី១រូបហាងខ្ញុំហ្នឹងហើយ រូបទី២ខ្ញុំអត់ស្គាល់ទេ។ ខ្ញុំមិនដឹងថាគាត់មានចេតនាអ្វីទេ ប៉ុន្តែអ្វីដែលគាត់បានសរសេរខាងលើនេះគឺខុសហើយ ខ្ញុំមិនបានលួចប្រើសេវាកម្មថៃទេ សេវាក្រុមហ៊ុនគាត់នោះពួកខ្ញុំប្រើយូរហើយ តាំងពីមុនឈ្លោះគ្នា ហើយក្រុមហ៊ុនគេមានកុងត្រា មិនអាចផ្តាច់មុនពេលបានទេត្រូវសងគេតែចប់កុងត្រាប្រាកដណាស់ថាផ្តាច់ហើយ»។
អ្នកមានឥទ្ធិពលលើបណ្តាញសង្គមរូបនេះបន្តទៀតថា «ខ្ញុំរាល់ថ្ងៃនៅតែបន្តរជួយបងៗជួរមុខទេ គ្រាន់តែមិនបង្ហោះ ខ្ញុំមានឈាមខ្មែរ ខ្ញុំក៏ចេះឈឺចាប់ដែរ»។
គួរឱ្យដឹងថា ហេង វិសាល និង ជា ស្រីនា ធ្លាប់បានប្រកាសជាសាធារណៈម្តងរួចមកហើយថាបន្ទាប់ពីផលិតផល Skin Care របស់លោកលក់ពីស្តុកពួកគេឈប់បន្តផលិតនៅប្រទេសថៃទៀតហើយដោយបង្វែរទៅរោងចក្រប្រទេសផ្សេង។ កាលពីកន្លងមកនេះ ជា ស្រីនា ក៏ធ្លាប់បានបង្ហើបថាខ្លួនសុខចិត្តចោលលុយកក់ចំនួន៥០%ព្រោះបានតាំងចិត្តរួចហើយថាមិនឱ្យថៃយកលុយពីនាងបានទៀតនោះទេ៕
