ថ្មីៗនេះក្នុងព្រឹត្តិការណ៍ម៉ាកយីហោសម្រស់ Bosco Wong បានចែករំលែករឿងទទួលសំណើរៀបការពីមនុស្សអាថ៌កំបាំង។ ប្រសិនបើពួកគេរៀបការលោកនឹងមានប្រាក់បន្ថែមចំនួន ៥០០លានយ័នប្រមាណជាង៧០លានដុល្លារអាម៉េរិកផ្ទេរទៅក្នុងគណនីផ្ទាល់ខ្លួនរបស់ លោក។
ជននោះបានអះអាងថាជានារីវ័យក្មេងនៃក្រុមហ៊ុនធំមួយ បានទាក់ទងទៅអ្នកគ្រប់គ្រងក្រុមហ៊ុន Bosco Wong ដើម្បីសម្តែងការកោតសរសើរ និងចង់សហការក្នុងការងារ។ ដំបូងឡើយ នាងបានអញ្ជើញតារាប្រុសដែលកើតក្នុងឆ្នាំ ១៩៨០ មកចូលរួមពិធីជប់លៀងអាហារពេលល្ងាចក្នុងតម្លៃ ១.២ លានយ័នបន្ទាប់មកបានប្រែក្លាយវាទៅជាជំនួបឯកជន និងស្និទ្ធស្នាល។ ទីបំផុត បុគ្គលនេះបានស្នើរៀបការជាមួយ Bosco Wong ដោយរៀបចំសម្រាប់គ្រួសារកូនកំលោះនូវថ្លៃបណ្ណាការចំនួន ៥០០លានយ័នឬជាង៧០លានដុល្លារអាម៉េរិក។ ទោះជាយ៉ាងណា តារារូបនេះបានបដិសេធព្រោះមិនចង់រៀបការ ហើយថានេះជាការលេងសើចរបស់អ្នកណាម្នាក់។
ទោះជាយ៉ាងណាក៏ដោយ Bosco Wong នៅតែចែករំលែកព័ត៌មាននេះជាមួយម្តាយរបស់ខ្លួនហើយនិយាយលេងសើចថា «ចាប់ពីពេលនេះតទៅ ហៅខ្ញុំថា កូនប្រសា ៥០០ លាន»។ ជាការឆ្លើយតប ម្តាយរបស់ Bosco Wong បានលាន់មាត់ថា «ឱព្រះជាម្ចាស់អើយ អ្នកមានតម្លៃច្រើនណាស់ តើវាមានតម្លៃ ៥០០លានដុល្លារទេ?»
ជុំវិញរឿងរបស់ Bosco Wong ទទួលបានការចាប់អារម្មណ៍ពីអ្នកគាំទ្រ។ មតិជាច្រើនលើកឡើងថា នេះជាការឆបោកថ្មីមួយដែលមនុស្សជាច្រើនបានជួប មិនមែនតែតារាប្រុសរូបនេះជួបទេ។ សាធារណជនក៏សង្ឃឹមដែរថា អ្នករាល់គ្នានឹងមានការប្រុងប្រយ័ត្នចំពោះការអញ្ជើញដ៏គួរឱ្យទាក់ទាញនេះ។
ទាក់ទងនឹងជីវិតស្នេហារបស់ Bosco Wong មានពាក្យចចាមអារ៉ាមថាកំពុងមានស្នេហាជាមួយនារីម្នាក់ពេលលោកចូលរួមការប្រគំតន្ត្រីរបស់ G-Dragon នៅប្រទេសម៉ាឡេស៊ីកាលពីខែកក្កដា កន្លងទៅ។ ទោះជាយ៉ាងណា លោកបានបដិសេធភ្លាមៗដោយនិយាយថា នាងគ្រាន់តែជាមិត្តភក្តិរបស់លោកដែលបានចូលរួមការប្រគំតន្ត្រីនោះប៉ុណ្ណោះ។
នៅខែកញ្ញា ឆ្នាំ២០២៥ តារាប្រុស TVB រូបនេះបានបង្ហោះរូបថតជាមួយមិត្តស្រីក្នុងថ្ងៃខួបកំណើតរបស់ខ្លួន ដែលបង្កឱ្យមានពាក្យចចាមអារ៉ាមថាទំនាក់ទំនងនេះត្រូវបានប្រកាសជាផ្លូវការ។ នៅពេលនោះ លោកមិនបានឆ្លើយតបដោយផ្ទាល់ទេ។ ពេលចូលរួមក្នុងកម្មវិធីទូរទស្សន៍ Bosco Wong បានបញ្ជាក់ថាលោកនៅលីវនៅឡើយ៕
