ការផ្លាស់ប្តូររបស់ Esther Yu បន្ទាប់ពីរឿងអា.ស្រូវអស់រយៈពេល២ខែ

ថ្ងៃទី ៨ ខែតុលា ពាក្យគន្លឹះ « Esther Yu» ស្រាប់តែឡើងដល់ប្រធានបទពេញនិយម ១ នៅលើ Weibo ។ មូលហេតុនៃការផ្លាស់ប្តូរនេះ គឺមកពីការបង្ហោះរបស់ Esther Yuកាលពីពេលថ្មីៗនេះ។ ជាពិសេសគណនី Studio របស់នាងបានបង្ហោះការស្វាគមន៍ពិធីបុណ្យពាក់កណ្តាលរដូវស្លឹកឈើជ្រុះនៅលើ Weibo ប៉ុន្តែគណនីផ្ទាល់ខ្លួនរបស់តារាស្រីរូបនេះបានស្ងប់ស្ងាត់ទាំងស្រុង។

សង្គមអនឡាញគិតថានេះជាសញ្ញាមិនធម្មតាមួយព្រោះតួឯកស្រីរូបនេះត្រូវបានគេដឹងថាជាអ្នកសិល្បៈម្នាក់ដែលតែងតែចែករំលែកជីវិតប្រចាំថ្ងៃរបស់នាង ដូច្នេះវាពិបាកយល់ណាស់ថាហេតុអ្វីបានជានាងមិនធ្វើចលនាណាមួយក្នុងអំឡុងពេលថ្ងៃឈប់សម្រាកធំ។

នៅថ្ងៃទី ៣០ ខែកញ្ញា ស្ទូឌីយោបានប្រកាសកាលវិភាគខែតុលា របស់ Esther Yu ប៉ុន្តែតារាស្រីរូបនេះមិនមានសកម្មភាពសាធារណៈទេ។ កាលវិភាគរបស់នាងគឺសម្រាប់តែថត និងថតសំឡេងប៉ុណ្ណោះ ហើយនាងមិនបានចូលរួមជាមួយក្រុមការងារភាពយន្ត ឬចូលរួមក្នុងព្រឹត្តិការណ៍ផ្លូវការណាមួយផ្សេងទៀតឡើយ។ កន្លងមកភាពយន្តរឿង « A Journey to Glow» សម្តែងដោយ Esther Yu និង Wang Anyu ស្រាប់តែផ្អាកការថតនៅពាក់កណ្តាលខែកញ្ញា បើទោះបីជាសហគមន៍អ្នកគាំទ្ររបស់តារាស្រីរូបនេះ បានរៀបចំសកម្មភាពជាច្រើនដើម្បីលើកទឹកចិត្ត និងគាំទ្រ idol របស់ពួកគេ។
យោងតាមប្រព័ន្ធផ្សព្វផ្សាយចិន Esther Yu កំពុងប្រឈមមុខនឹងវិបត្តិដ៏ធំបំផុតនៃអាជីពរបស់នាង នៅពេលដែលរឿងអាស្រូវជាបន្តបន្ទាប់ទាក់ទងនឹងគ្រួសាររបស់នាងបានផ្ទុះឡើងចាប់តាំងពីខែសីហា។ ក្រុមហ៊ុនឪពុករបស់ Esther Yu ត្រូវបានគេសង្ស័យថាមានការបំពានអាជីវកម្ម ការគេចពន្ធ…ចំណែកឯនាងក៏រងនូវការចោទប្រកាន់ពីមិត្តរួមការងារហើយត្រូវបានមនុស្សជាច្រើននៅក្នុងឧស្សាហកម្មនេះលាតត្រដាងចំពោះអាកប្បកិរិយាមិនល្អរបស់នាង។

ប្រឈមមុខនឹងរឿងអាស្រូវជាបន្តបន្ទាប់ Esther Yu បានជ្រើសរើសនៅស្ងៀម។ គណនីបណ្ដាញសង្គមទាក់ទងនឹងតារាស្រីរូបនេះបានឈប់ធ្វើបច្ចុប្បន្នភាព។ នៅក្នុងខែកញ្ញា Weibo របស់ Esther Yu បានចែករំលែកសារឡើងវិញចំនួន ៦ប៉ុណ្ណោះ ហើយគ្មានការបង្ហោះដើមឡើយ។ ទោះជាយ៉ាងណាក៏ដោយ ការស្ងប់ស្ងាត់ទាំងស្រុងរបស់ Esther Yu ក្នុងរយៈពេលពីរខែកន្លងមកនេះ បើទោះបីជាមានការចោទប្រកាន់យ៉ាងធ្ងន់ធ្ងរ គឺជាដាវមុខពីរក៏ដោយ។

អ្នកគាំទ្រនៅតែគាំទ្រ Esther Yu ដោយនិយាយថា នាងមិនចាំបាច់បញ្ជាក់ពីភាពគ្មានកំហុសរបស់នាងទេ ព្រោះអ្នកចោទជាអ្នកត្រូវផ្តល់ភស្តុតាង។ អ្នកគាំទ្រក៏លើកឡើងពីការពិតដែលមិត្តរួមការងារមួយចំនួនបានបញ្ជាក់ពីបុគ្គលិកលក្ខណៈ និងវិជ្ជាជីវៈរបស់ Esther Yu ។ផ្ទុយទៅវិញ អ្នកខ្លះបានរិះគន់តារាស្រីរូបនេះថាមានចេតនានៅស្ងៀមដើម្បីបញ្ចៀសបញ្ហា និងបង្វែរការទទួលខុសត្រូវ។

ប្រព័ន្ធផ្សព្វផ្សាយជឿជាក់ថាគណនី Studio Esther Yu ដែលបង្ហោះរូបនាងគឺជាការផ្លាស់ប្តូរមួយដើម្បីសាកល្បងមតិសាធារណៈក្នុងការរៀបចំសម្រាប់ការត្រឡប់មកវិញរបស់ខ្លួន។ តាមពិតទៅរូបថតរបស់តារាស្រីរូបនេះ មិនមែនជារូបថតថ្មីនោះទេប៉ុន្តែគ្រាន់តែជារូបថតក្រោយឆាកនៃការផ្សាយពាណិជ្ជកម្មកាលពីមុនសម្រាប់ម៉ាកយីហោ៕