គ្រោះធម្មជាតិផ្ទួនៗ! ថៃប្រកាសអាសន្នលើខេត្ត ៤២ ទៀត ដោយរងឥទ្ធិពលខ្យល់ ព្យុះប៊ូឡូយ

បាងកក៖ ក្រសួងឧតុនិយមថៃ (TMD) នៅព្រឹកថ្ងៃទី ២៩ ខែកញ្ញា ឆ្នាំ ២០២៥ នេះបានចេញសេចក្តីព្រមានអំពីអាកាសធាតុគ្របដណ្តប់លើខេត្តចំនួន ៤២ រួមទាំងរាជធានីបាងកក និងតំបន់ជិតខាង ក្រោមឥទ្ធិពលរបស់ព្យុះប៊ូឡូយ (Bualoi) ដែលនឹងមានហានិភ័យភ្លៀងធ្លាក់ខ្លាំងបណ្តាលឲ្យកើតទឹកជំនន់ភ្លាមៗ បាក់ដី ទឹកហូរច្រោះពីលើភ្នំ និងទឹកទន្លេកើនឡើងខ្ពស់។

ស្របពេលដែលប្រទេសកំពុងរងទុក្ខនិងគ្រោះធម្មជាតិដែលមានស្រាប់ នាយកដ្ឋានឧតុនិយមថៃ បានព្យាករណ៍ថា ក្នុងរយៈពេល ២៤ ម៉ោងបន្ទាប់ ប្រទេសថៃនឹងមានភ្លៀងធ្លាក់ខ្លាំងនៅតំបន់ជាច្រើន ដោយមានភ្លៀងធ្លាក់ខ្លាំងនៅផ្នែកខ្លះនៃភាគឦសាន និងខាងកើត ជាពិសេសខេត្តបឹងកាន សាខុនណាខន នគរផាន ឧដុនថានី ខនកែន កាឡាស៊ីន មុកដាហាន ច័ន្ទបុរី និងត្រាត អាចរងផលប៉ះពាល់ខ្លាំងជាងគេ។

ចំណែកឯ ស្ថានភាពរលកនៅសមុទ្រ Andaman និងឈូងសមុទ្រថៃវិញ ព្យុះប៊ូឡូយ អាចបណ្ដាលដែលមានភ្លៀងធ្លាក់ខ្លាំង ខ្យល់កន្ត្រាក់ និងមានកម្លាំងរលកពីមធ្យមទៅក្នុងកម្រិតកម្ពស់២-៣ម៉ែត្រឯណោះ។

គួរបញ្ជាក់ផងដែរថា ព្យុះប៊ូឡូយ បានវាយប្រហារវៀតណាមដីគោគ ជាមួយនិងកម្លាំងខ្យល់ជាង ១៤០គីឡូម៉ែត្រក្នុងមួយម៉ោង។ ព្យុះនេះ បានទៅដល់ដីគោកវៀតណាមកាលពីល្ងាចថ្ងៃសៅរ៍ ដោយវាយប្រហារចំតំបន់ Hoang Sa រួចបន្តបោកបក់លើខេត្ត Ha Tinh និង Quang Tri មុននឹងថយកម្លាំងពេលទៅដល់ភាគខាងជើងប្រទេសឡាវ។

ឥទ្ធិពលព្យុះ Bualoi បានបង្កើតជាបាតុភូតខ្យល់កន្ត្រាក់ ភ្លៀងធ្លាក់ខ្លាំង ជំនន់ភ្លាមៗ បំណាក់ដី និងបណ្តាលឲ្យទឹកទន្លេហក់ឡើងខ្ពស់៕