ចិនរកឃើញវិធីដាក់បន្ទះឈីបចូលខួរក្បាល ដែលចំណាយពេលតែ ១០នាទី និងមិនបាច់វះកាត់លលាដ៍ក្បាល

ចិនបញ្ចេញកញ្ចប់ទុន ១៦៣លានដុល្លារ ពី Tencent & Alibaba បង្កើតឈីបខួរក្បាលតាមសរសៃឈា.ម.ក មិនបាច់វះកា.ត់បើកលលាដ៍ក្បាលដូច Neuralink របស់លោក Elon Musk និងប្រើពេលតែ ១០នាទីប៉ុណ្ណោះ ខណៈបច្ចុប្បន្នកំពុងសាកល្បងលើសត្វចៀម ដើម្បីត្រៀមខ្លួនប្រជែងជាមួយបច្ចេកវិទ្យានាំមុខរបស់សហរដ្ឋអាមេរិក។
________

អាមេរិកភ្លេចៗខ្លួន ចិនស្ទុះមកតាមប្រកៀកពីក្រោយហើយ! ថ្មីៗនេះក្រុមហ៊ុន StairMed ទទួលបានទុន ១៦៣ លានដុល្លារ ពីមហាយក្ស Tencent និង Alibaba ដើម្បីដាក់ឱ្យប្រើប្រាស់បច្ចេកវិទ្យាផ្សារភ្ជាប់ខួរក្បាល និងកុំព្យូទ័រ (BCI) ជំនាន់ថ្មី ដែលអាចដាក់បញ្ចូលទៅក្នុងខួរក្បាលបានក្នុងពេលត្រឹមតែ ១០ នាទី តាមរយៈសរសៃឈាមក ដោយមិនបាច់វះកាត់ខួងបើកលលាដ៍ក្បាលដូចបច្ចេកវិទ្យា Neuralink របស់លោក Elon Musk នោះឡើយ។
 
យោងតាមការចុះផ្សាយរបស់សារព័ត៌មានបច្ចេកវិទ្យា Fossbytes ក្រុមហ៊ុនអាជីវកម្មថ្មី ដែលមានមូលដ្ឋាននៅទីក្រុងស៊ាងហៃ ឈ្មោះថា StairMed Technology បានបង្កការភ្ញាក់ផ្អើលយ៉ាងខ្លាំង តាមរយៈការរៀបចំវិធីសាស្ត្រវះកាត់វាយលុកកម្រិតស្រាល ដោយបញ្ចូលបន្ទះឈីបតាមរយៈសរសៃឈាមវ៉ែននៅត្រង់ក រួចរុញវាឡើងទៅកាន់តំបន់បញ្ជាចលនានៃខួរក្បាល។ វិធីសាស្ត្រនេះជួយកាត់បន្ថយហានិភ័យនៃការឆ្លងមេរោគ ការបំផ្លិចបំផ្លាញជាលិកាខួរក្បាល និងមិនបន្សល់ទុកនូវស្លាកស្នាមរបួសធំដុំដល់អ្នកជំងឺឡើយ។ របកគំហើញនេះត្រូវបានបង្កើតឡើងក្នុងគោលបំណងចាប់យកសញ្ញាគំនិតពីខួរក្បាល រួចបំប្លែងវាទៅជាបញ្ជាអេឡិចត្រូនិច ដើម្បីជួយសង្គ្រោះ និងស្តារសមត្ថភាពឡើងវិញដល់អ្នកជំងឺខ្វិន ឬដាច់សរសៃឈាមខួរក្បាល ឱ្យអាចបញ្ជាដៃជើងសិប្បនិម្មិត ឬបញ្ជាកុំព្យូទ័របានដោយគ្រាន់តែប្រើ «គំនិត»។
 
ទោះជាយ៉ាងណា របាយការណ៍ស៊ើបអង្កេតបន្ថែមបានទម្លាយការពិតថា រយៈពេល ១០ នាទីនេះ គ្រាន់តែជាផ្ទាំងស៊ីប ឬគោលដៅដែលក្រុមហ៊ុនចង់សម្រេចឱ្យបាននាពេលអនាគតប៉ុណ្ណោះ ព្រោះបច្ចុប្បន្នបច្ចេកវិទ្យារបស់ក្រុមហ៊ុន StairMed មួយនេះ ទើបតែស្ថិតក្នុងដំណាក់កាលពិសោធន៍នៅលើ «សត្វចៀម» តែប៉ុណ្ណោះ និងមិនទាន់បានចាប់ផ្តើមការសាកល្បងគ្លីនិកលើរាងកាយមនុស្សនៅឡើយទេ។ លើសពីនេះ ក្រុមអ្នកជំនាញបានកត់សម្គាល់ថា គំនិតនៃការបញ្ចូលបន្ទះឈីបតាមសរសៃឈាមនេះ មិនមែនជារបកគំហើញថ្មីស្រឡាងដំបូងបង្អស់របស់ចិនឡើយ ដោយសារក្រុមហ៊ុនបច្ចេកវិទ្យាវេជ្ជសាស្ត្ររបស់សហរដ្ឋអាមេរិកឈ្មោះថា Synchron បានបង្កើតឧបករណ៍ “Stentrode” ដើរមុនចិនមួយជំហានបាត់ទៅហើយ ដោយពួកគេបានដាក់បញ្ចូលឈីបតាមសរសៃឈាមទៅក្នុងខួរក្បាលអ្នកជំងឺចំនួន ១០ នាក់រួចរាល់មកហើយ នៅក្នុងដំណើរការសាកល្បងគ្លីនិកនៅក្នុងប្រទេសសហរដ្ឋអាមេរិក និងអូស្ត្រាលី ចាប់តាំងពីឆ្នាំ២០២៣។
​
ជារួមមក បច្ចេកវិទ្យាឈីបខួរក្បាលតាមសរសៃឈាមរបស់ក្រុមហ៊ុនចិន StairMed នៅពេលនេះ គឺជាការបង្ហាញពីមហិច្ឆតារបស់ចិន ក្នុងការរុញច្រានខ្លួនឯងឡើងមកប្រកួតប្រជែងដណ្ដើមយុទ្ធសាស្ត្របច្ចេកវិទ្យាខួរក្បាលជាមួយសហរដ្ឋអាមេរិកយ៉ាងស្វិតស្វាញ។ ទោះបីជាចិនកំពុងដើរក្រោយអាមេរិកមួយជំហានផ្នែកការសាកល្បងលើមនុស្សក្តី ប៉ុន្តែលំហូរទុនវិនិយោគរាប់រយលានដុល្លារពីមហាយក្ស Tencent និង Alibaba នឹងក្លាយជាកម្លាំងចលករដ៏ខ្លាំងក្លាមួយ ក្នុងការធ្វើឱ្យសមរភូមិបច្ចេកវិទ្យា BCI ពិភពលោកកាន់តែមានភាពកក្រើក និងវិវត្តលឿនជាងមុន៕