ដ្បិតរងភាពចម្រូ.ងចម្រា.សឧកញ៉ា ព្រាប សុវត្ថិ ពោលទន្ទឹងរង់ចាំ MV របស់ N.John

ដូចប្រិយមិត្តមួយចំនួនជ្រាបមកហើយថា សុវត្ថិ មុន្នីនាគ ឬ N.John ត្រូវបានអ្នកលេងបណ្តាញសង្គមបញ្ចេញមតិរិះគន់និងមានការវែកញែកមិនសំចៃក្រោយពេលលោកទម្លាក់បទប៉ះចំតែថ្ងៃមិនល្អមានរឿងក្តៅគគុកនៅតាមបន្ទាត់ព្រំដែន។ ដ្បិតថាមហាជនមានការមិនពេញចិត្តច្រើនប៉ុន្តែក្នុងនាមលោកឧកញ៉ា ព្រាប សុវត្ថិ ជាឪពុកវិញគឺពោលចង់ឃើញ N.John ទម្លាក់ MV ឆាប់ៗ។

កាលពីពេលកន្លងមកថ្មីៗនេះបទចម្រៀង «FEEL LIKE THIS» របស់ N.John មានវាសនាមិនខុសគ្នាប៉ុន្មានពីបទចម្រៀង «Sweet Love » នោះទេដែលរងការរិះគន់ពីមហាជន។ អ្នកមួយចំនួនថែមទាំងស្នើដល់ឧកញ៉ា ព្រាប សុវត្ថិ ជាឪពុកជួយមើលកូនប្រុស និងប្រាប់កុំឱ្យចេញបទចម្រៀងខុសកាលៈទេសៈបែបនេះ។ អ្នកខ្លះក៏លើកឡើងពីភាពស៊យរបស់ N.John ព្រោះជាច្រើនដង ហើយដែលអ្នកកាន់ផេកដាក់ថ្ងៃចេញបទចម្រៀងចំតែថ្ងៃដែលថៃឈ្លានពានខ្មែរមានរឿងក្តៅគគុក។

ទោះបីជាមានការរិះគន់ចំពោះខ្លួន N.John នៅបន្តសកម្មភាពរបស់ខ្លួនយ៉ាងមោះមុតទៅតាមកាលកំណត់ដោយថ្មីៗនេះលោកក៏បានបង្ហោះរូបភាពមួយចំនួនក្នុងការថត MV បទចម្រៀងខាងលើនេះ ខណៈ Official Audio ក៏បានចេញជាផ្លូវការ។ នៅយប់ថ្ងៃទី២៦ ខែកញ្ញា ម៉ោងនៅកម្ពុជាក្រុមការងារ N.John ក៏បានបង្ហោះវីដេអូខ្លីពីការថត MV ផងដែរ។

បន្ទាប់ពីឃើញពីការខិតខំប្រឹងប្រែងរបស់កូនប្រុសតស៊ូលើវិថីសិល្បៈរស់នៅស្រុកគេឆ្ងាយពីគ្រួសារ ក្នុងនាមជាឪពុក តារាចម្រៀងឧកញ៉ា ព្រាប សុវត្ថិ បន្តជំរុញលើកទឹកចិត្តកូនប្រុស។ ទំព័រផេកឧកញ៉ា ព្រាប សុវត្ថិ បានចែករំលែកវីដេអូ N.John អមមកជាមួយនឹងពាក្យពេចន៍ថា «លោកពុកចង់មើល MV ចេញឆាប់ៗ»។

ជាការកត់សម្គាល់តាមរយៈរូបភាពដែល N.John បង្ហោះនៅលើបណ្តាញសង្គមក្នុងការថត MV «FEEL LIKE THIS» គឺអាវរបស់លោកមានភ្ជាប់មកជាមួយនឹងទង់ជាតិកម្ពុជាផងដែរ។ នេះមានន័យថាពីមួយជំហានទៅមួយជំហានការខិតខំរបស់ N.John មិនត្រឹមតែសម្រេចក្តីស្រមៃខ្លួនឯងប៉ុន្តែក៏លើកស្ទួយពីមុខមាត់ប្រទេសកម្ពុជាជាកូនខ្មែរមួយរូបដែលមានសមត្ថភាពដូចនេះ៕