អ្នកនាង ដេននី ក្វាន់ ម្តាយល្អហួស បានបង្ហោះសំណេរនៅលើបណ្តាញសង្គមហ្វេកប៊ុក ស្របពេលលទ្ធផលនៃកម្មវិធីប្រកួតបវរកញ្ញាចក្រវាលកម្ពុជាឆ្នាំ២០២៥ នៅមានការជជែកវែកញែក។
នៅថ្ងៃទី១៦ ខែកញ្ញា អ្នកនាង ដេននី ក្វាន់ បានបង្ហោះសំណេរមួយថា «ប្រកួតមានចាញ់មានឈ្នះ តែបើចាញ់ហើយមិនចេះទទួលស្គាល់ការពិតហើយមិនព្រមកែប្រែចំណុចខ្វះខាតទេមួយជីវិតនេះគឺនៅតែចាញ់មនុស្សដែលខ្លាំងពិតប្រាកដមិនមានអំនួតទេមិនឌឺដងចាញ់តែស្ងាត់»។ មុននឹងមានការបង្ហោះនេះ ទាំង ហ្វីយ៉ាតា និង ពេជ្រ វត្តីសារ៉ាវឌ្ឍី គឺសុទ្ធតែទទួលបានការគាំទ្រពីសំណាកម្តាយល្អហួស ហើយអំឡុងពេលប្រកួតផ្តាច់ព្រ័ត្រអ្នកទាំងពីរគឺជាជម្រើសរបស់អ្នកនាង ដេននី ក្វាន់។
គួរឱ្យដឹងថា បន្ទាប់ពីរាត្រីថ្ងៃផ្តាច់ព័្រត្រ អ្នកនាង ដេននី ក្វាន់ គឺបានបង្ហាញការហួសចិត្តទៅកាន់អ្នកគាំទ្រមួយចំនួនស្រែកដាក់អ្នកដទៃឱ្យគេធ្លាក់ដោយទង្វើនេះចាត់ទុក្ខថាគ្មានសុជីវធម៌។ នៅថ្ងៃទី១៣ ខែកញ្ញា អ្នកនាង ដេននី ក្វាន់ បានបង្ហោះថា «ប្រកួតមានចាញ់មានឈ្នះ តែឆ្ងល់ Fan ខ្លះដែលទៅគាំទ្រIdolរបស់ខ្លួនបែរជាស្រែកដាក់ឱ្យបេក្ខភាពផ្សេងៗដែលជាមិនមែន Idol ខ្លួននៅពេលគេប្រកាសលទ្ធផល ស្រែកដាក់ឱ្យគេធ្លាក់ៗ។ មនុស្សអីអត់មានសុជីវធម៌ចឹង? បើខ្ញុំទៅដែរជួបមនុស្សចឹងៗទះឱ្យបែកមាត់ជ្រុះធ្មេញមិនខាន គាំទ្រៗតែIdolខ្លួនឯងទៅ ហើយថីបានមកដាក់បណ្តាសាគេកណ្តាលកម្មវិធីចឹង»។
លទ្ធផលនៃការប្រកួត Miss Universe Cambodia 2025 ម្តាយល្អហួស ថា ហ្វីយ៉ាតា ឈ្នះមកុដគឺស័ក្តិសមបំផុតព្រោះនៅលើឆាក ហ្វីយ៉ាតា ធ្វើបានល្អខ្លាំងណាស់ សមត្ថភាពមកទាំងព្រម ដែលមិនអាចប្រកែកបាន។ ជាមួយគ្នានេះ អ្នកនាង ដេននី ក្វាន់ បានជូនពរ ហ្វីយ៉ាតា ជោគជ័យនៅលើឆាកអន្តរជាតិបន្តទៀត៕
