ជាថ្មីម្តងទៀត ព្រះនាង នរោត្តម ចេណ្ណា បានចូលរួមក្នុងកម្មវិធីដ៏ពិសេសមួយនៅប្រទេសចិនដោយលើកនេះមានការចូលរួមពីតំណាងជាច្រើនប្រទេសនិងអង្គភាពសារព័ត៌មាន ១៦៥ ស្ថាប័នផ្សេងៗ។ មិនត្រឹមតែប៉ុណ្ណោះក្នុងសន្និសីទ សហប្រតិបត្តិការ និងប្រព័ន្ធផ្សព្វផ្សាយ Belt and Road ឆ្នាំ២០២៥ ព្រះនាង ចេណ្ណា ក៏បានជួបជាមួយនឹង ជា ស្រីនា និង ហេង វិសាល ផងដែរ។
នាល្ងាចថ្ងៃទី១៦ ខែកញ្ញា នៅលើទំព័រហ្វេកប៊ុករបស់ ព្រះនាង ចេណ្ណា បានបង្ហោះវីដេអូមួយដោយភ្ជាប់ជាមួយនឹងខ្លឹមសារថា «ខ្ញុំពិតជាមានកិត្តិយសណាស់ ដែលបានចូលរួមក្នុងសន្និសីទ សហប្រតិបត្តិការ និងប្រព័ន្ធផ្សព្វផ្សាយ Belt and Road ឆ្នាំ២០២៥ នៅទីក្រុងគុនមីង ខេត្តយូណាន សាធារណរដ្ឋប្រជាមានិតចិន ដោយមានការចូលរួមពីតំណាងជាង ២០០ នាក់ មកពី ៨៧ ប្រទេស និងអង្គភាពសារព័ត៌មាន ១៦៥ ស្ថាប័នផ្សេងៗ»។
ព្រះនាង បានបន្ថែមទៀតថា «ក្នុងនាមខ្ញុំជាកូនខ្មែរមួយរូប ខ្ញុំបានចូលរួមចែករំលែកលើវេទិកាអន្តរជាតិ អំពីមិត្តភាពជាយូរអង្វែង រវាងប្រទេសកម្ពុជា និងចិន ដែលបានចាប់ផ្ដើមតាំងពី រជ្ជកាលហ្លួងតាទួត ព្រះបរមរតនកោដិ ព្រះបិតាឯករាជ្យនៃយើង ដែលលោកបានចាត់ទុកប្រទេសចិនដូចជា “ផ្ទះទី២”។ ខ្ញុំសង្ឃឹមយ៉ាងមុតមាំថា មិត្តភាពនេះ នៅតែបន្តរីកលូតលាស់ដូចរុក្ខជាតិ ចាក់ឫសជ្រៅរឹងមាំ បែកមែកសាខា និងពោរពេញទៅដោយផ្លែផ្កា ដែលមានតែភាពផផ្អែម សម្រាប់ប្រជានុរាស្ត្រជំនាន់ក្រោយ»។
វត្តមានរបស់ ព្រះនាង ចេណ្ណា តែងតែទទួលបានការសរសើរពីទស្សនិកជន ខណៈដែលព្រះនាងជារឿយៗតែងតែតំណាងប្រទេសកម្ពុជាចូលរួមផ្សព្វផ្សាយពីវប្បធម៌ខ្មែរនៅក្នុងប្រទេសចិន។ ក្នុងកម្មវិធីលើកនេះ ជា ស្រីនា និង ហេង វិសាល ក៏បានចូលរួមកម្មវិធីនេះដោយបានជួបសំណះសំណាលជាមួយនឹង ព្រះនាង ចេណ្ណា ប្រកបដោយអារម្មណ៍រំភើបរីករាយ។
ជា ស្រីនា បានបង្ហោះនៅលើទិកតុកថា «ថ្ងៃនេះបានមកចូលរួមកម្មវិធី One belt One road នៅ Yunnan ប្រទេសចិន សំខាន់បានមកមើលព្រះនាងសម្តែងផ្ទាល់ទៀត»។ ស្រីនា បានលើកឡើងទៀតថា ព្រះនាងរបស់យើងគឺស្អាតណាស់ ហើយមានទេពកោសល្យ។ នាងតែងរំជួលចិត្តគ្រប់ពេលឃើញ ព្រះនាងសម្តែង។ ខ្ញុំស្រលាញ់ព្រះនាងខ្លាំងណាស់»៕
