ទង្វើរបស់ កុយ អេនណា បានធ្វើឱ្យមនុស្សជាច្រើនស្ងប់ស្ញែងយ៉ាងខ្លាំងក្នុងនោះក៏មានជនបរទេសពោលសរសើរពីសកម្មភាពរបស់នាងដូចគ្នាក្នុងដំណើរថ្មើរជើងពីរាជធានីភ្នំពេញទៅកាន់ខេត្តសៀមរាប។ ជាមួយគ្នានេះ តារាសម្តែង ខាត់ វៃហាំង បានជួយនឹង អេនណា ព្រមទាំងបានចូលរួមលើកទឹកចិត្តនិងធ្វើដំណើរជាមួយនាងផងដែរ។
នៅថ្ងៃទី១៤ ខែកញ្ញា កុយ អេនណា បានបង្ហោះវីដេអូដូចសព្វមួយដងអំពីសកម្មភាពដំណើរថ្មើរជើងរបស់នាងដើម្បីជម្រាបជូនទស្សនិកជននាងធ្វើដំណើរមកដល់កន្លែងណាហើយ។ អ្វីដែលខុសប្លែកលើកនេះគឺមានវត្តមានរបស់តារាសម្តែង ខាត់ វៃហាំង។ នៅក្នុងវីដេអូខ្លី អេន ណា បង្ហាញថានាងបានជួបជាមួយនឹង ខាត់ វៃហាំង ដោយលោកបានមកចូលរួមគាំទ្រ ឱ្យកម្លាំងចិត្ត ជាពិសេសគឺចូលរួមដើរជាមួយនឹងនាង។
តាមរយៈវីដេអូដែលចែករំលែកតារាសម្តែង ខាត់ វៃហាំង បានជួយកាន់ថង់សម្រាប់ដាក់ថវិកាដែលពលរដ្ឋចូលរួមបរិច្ចាគនៅតាមតំបន់ភូមិឃុំដែលអ្នកទាំងពីរបានធ្វើដំណើរឆ្លងកាត់។ អ្នកទាំងពីរក៏ភ្លក់លៀសហាលតាមផ្លូវជាមួយគ្នាផងដែរ។ ទោះយ៉ាងណា តារាសម្តែង ខាត់ វៃហាំង មិនបានរួមដំណើរថ្មើរជើងជាមួយនឹង កុយ អេនណា រហូតដល់ខេត្តសៀមរាបនោះទេ។
គួរឱ្យដឹងថា មកទល់ថ្ងៃទី១៥ ខែកញ្ញា វាមានរយៈពេល១២ថ្ងៃហើយដែល អេនណា បានធ្វើដំណើរ ថ្មើរជើងពីភ្នំពេញទៅសៀមរាប ខណៈពេលនេះនាងបានមកដល់ខេត្តកំពង់ធំហើយ។ ដ្បិតធ្វើដំណើរថ្មើរជើងតែម្នាក់ឯងក្តីប៉ុន្តែ កុយ អេនណា មិនឯកានោះទេព្រោះមានប្រជាពលរដ្ឋក្មេងចាស់ប្រុសស្រីរង់ចាំនាងតាមផ្លូវជាហូរហែជាមួយនឹងការស្វាគមន៍យ៉ាងកក់ក្តៅពោរពេញដោយអត្ថន័យក្នុងនាមជាប្រទេសតូចតែមានបេះដូងធំ។
សកម្មភាពរបស់ កុយ អេនណា ដែលបានលះបង់សម្រស់ កម្លាំងកាយចិត្ត ដើម្បីរៃអង្គាសថវិកាជួយដល់កុមារ និងជនពិការ រួមទាំងផ្សព្វផ្សាយពីវិស័យទេសចរណ៍កម្ពុជាគឺពិតជាស្តែងពីទឹកចិត្តនាងខ្លាំងណាស់។
ចាប់តាំងពីថ្ងៃចាប់ផ្តើមមកទល់ពេលនេះ កុយ អេនណា បានជួយនឹងអ្នកសិល្បៈមួយចំនួនដែលធ្វើដំណើរឆ្លងកាត់ហើយបានផ្តល់កម្លាំងចិត្តនិងថវិកាមានដូចជា រ៉េត ស៊ូហ្សាណា តារាកំប្លែងពាក់មី ឯកឧត្តម ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ ពូឈីវ ទឹម រដ្ឋា ឯម រៀម ព្រមទាំងអ្នកមួយចំនួនទៀត៕
