អេមអស់ទាស់! Zhao Lusi ក្លាយជាតារាដែលមានប្រជាប្រិយភាពបំផុតលើវេទិកានេះ

ថ្មីៗនេះវេទិកា Xiaohongshu បានប្រកាសថា Zhao Lusi គឺជាតារាដែលមានប្រជាប្រិយបំផុតនៅក្នុងខែសីហា។ គណនីរបស់នាងបានកើនឡើងចំនួនអ្នកតាមដានចំនួន ៤.៣១ លាននាក់ ប្រធានបទពិភាក្សាឈានដល់ ១.៤៥ លាននាក់ និងការស្វែងរកដែលពាក់ព័ន្ធឈានដល់ ៦៤.២៩លាននាក់។

ទោះបីជានាងដកឃ្លាពីវិស័យសិល្បៈជាបណ្ដោះអាសន្ន មិនបានចូលរួមសម្តែងភាពយន្ត និងមិនមានភាពយន្តថ្មីៗចាក់ផ្សាយក៏ដោយ ក៏ Zhao Lusi នៅតែជាតារាសម្ដែងដែលទទួលបានការចាប់អារម្មណ៍ជាពិសេសនៅលើបណ្ដាញសង្គម។ បច្ចុប្បន្នគណនី Xiaohongshu របស់នាងមានអ្នក Follow ដល់ទៅ ១៩ លាននាក់ ដែលជាចំនួនខ្ពស់បំផុតក្នុងចំណោមតារាចិន។

លើសពីនេះ គណនី Douyin របស់នាងមានដល់ទៅ ៤៦.៤ លាននាក់ ហើយ Instagram របស់នាងមានអ្នក Follow ដល់ទៅ ៦.១ លាននាក់ បើទោះបីជាមិនឧស្សាហ៍បង្ហោះរូបញឹកញាប់ក៏ដោយ។ ការបង្ហោះរបស់តារាស្រីរូបនេះ ផ្តោតសំខាន់ទៅលើសកម្មភាពប្រចាំថ្ងៃ ដូចជាដើរលេងក្នុងសួន ដើរទិញអីវ៉ាន់ ដើរលេងជាមួយមិត្តភ័ក្តិ… ប៉ុន្តែនៅតែត្រូវបានគេស្រឡាញ់ចំពោះសម្រស់ដ៏លេចធ្លោ ការរួមផ្សំសម្លៀកបំពាក់ និងការតុបតែងខ្លួនប្លែកៗ។

កាលពីមុន Zhao Lusi បានធ្វើឱ្យគ្រប់គ្នាភ្ញាក់ផ្អើលនៅពេលដែលនាងសម្រេចចិត្តលុបគណនី Weibo របស់នាងដែលមានអ្នកតាមដានច្រើនជាង ៣១ លាននាក់។ នេះត្រូវបានគេមើលឃើញថាជាការតវ៉ាយ៉ាងខ្លាំងពីតារាស្រីប្រឆាំងនឹងក្រុមហ៊ុនគ្រប់គ្រងរបស់នាង គឺ Galaxy Cool Entertainment ។ នាងក៏បានបញ្ជាក់ដែរថា នាងចង់ស្វែងរកសន្តិភាព ជាជាងត្រូវគេប្រឌិតឥតឈប់ឈរ និងបង្ខូចកេរ្តិ៍ឈ្មោះតាមអ៊ីនធឺណិត។

នៅដើមខែសីហា Zhao Lusi បានធ្វើឱ្យមានការជជែកវែកញែកយ៉ាងច្រើន នៅពេលនាងនិយាយចោទប្រកាន់ក្រុមហ៊ុនគ្រប់គ្រងរបស់នាងថាបានគាបសង្កត់ និងបង្កគ្រោះថ្នាក់ដល់សុខភាព និងហិរញ្ញវត្ថុរបស់នាង។ នៅពេលដែល Zhao Lusi បានធ្លាក់ខ្លួនឈឺក្នុងខែធ្នូ ឆ្នាំ ២០២៤ ក្រុមហ៊ុនបានសន្យាថានឹងទទួលខុសត្រូវ ប៉ុន្តែនៅទីបញ្ចប់រូបនាងខ្លួនឯងត្រូវសងសំណងសម្រាប់កិច្ចសន្យាផ្សាយពាណិជ្ជកម្មដែលត្រូវបានលុបចោល និង ភាពយន្តដែលមិនទាន់បញ្ចប់។ សិទ្ធិរបស់ Zhao Lusi ក្នុងដំណើរការស្ទូឌីយ៉ូផ្ទាល់ខ្លួនរបស់នាងក៏ត្រូវបានដកហូតដោយក្រុមហ៊ុនផងដែរ។ តារាស្រីរូបនេះបានស្នើម្ដងហើយម្ដងទៀតឱ្យដោះស្រាយបញ្ហាកិច្ចសន្យា ប៉ុន្តែមិនបានទទួលចម្លើយដែលពេញចិត្ត។

Zhao Lusi ជឿជាក់ថា ចេតនារបស់ក្រុមហ៊ុនគឺចង់បង្ខំនាងឱ្យបញ្ចប់កិច្ចសន្យាដោយស្ម័គ្រចិត្ត ដើម្បីទទួលបានសំណងដ៏ច្រើនសន្ធឹកសន្ធាប់។ អ្នកខាងក្នុងឧស្សាហកម្មប៉ាន់ប្រមាណថា ប្រសិនបើ Zhao Lusi បញ្ចប់កិច្ចសន្យាមុន៥ឆ្នាំ នាងអាចប្រឈមនឹងសំណងរហូតដល់ ៤០០ លានយន់។

ថ្មីៗនេះ Zhao Lusi បានបើកក្រុមហ៊ុន Chengdu Ma Ning Enterprise Management Co., Ltd. ដោយមានដើមទុនធម្មនុញ្ញចំនួន ១០០,០០០ យន់។ វិស័យប្រតិបត្តិការរួមមាន អាជីវកម្មអនឡាញ ការលក់រាយសម្លៀកបំពាក់ គ្រឿងបន្លាស់ម៉ូត ការលក់រាយស្បែកជើង និងទំនិញមួយចំនួនទៀត។ អ្នកតំណាងស្របច្បាប់គឺជាឪពុករបស់តារាសម្តែងរូបនេះខណៈដែល Zhao Lusi កាន់កាប់ភាគហ៊ុន ៩០% ។

យោងតាមក្រុមហ៊ុន Tencent ភាពយន្ត «Love’s Ambition» របស់ Zhao Lusi និងជាមួយតារាប្រុស William Chan ត្រូវបានគេរំពឹងថានឹងចាក់ផ្សាយនៅខែកញ្ញា បន្ទាប់ពីផ្អាកអស់រយៈពេលជាងកន្លះឆ្នាំ។ បន្ទាប់ពីជាប់ពាក់ព័ន្ធនឹងរឿងអាស្រូវជាច្រើនអ្នកគាំទ្រជឿថាអាជីពរបស់ Zhao Lusi កំពុងបង្ហាញសញ្ញានៃការប្រសើរឡើង៕