ភាពយន្តថ្មីរបស់ Kim Yoo Jung ជាប់ក្នុងភាពចម្រូងចម្រាសនៃការលួចចម្លង

នៅថ្ងៃទី៩ ខែកញ្ញា ផលិតករ Tving បានចេញផ្សាយផ្ទាំងរូបភាពសម្រាប់រឿងភាគកូរ៉េ «Dear X» ជាផ្ទាំងរូបភាពគួរឱ្យចាប់អារម្មណ៍ជាមួយនឹងអក្សរពណ៌ក្រហមដិតនៅលើក្រដាសពណ៌សដែលហែកចេញជារាងអក្សរ X បង្ហាញពីភ្នែកត្រជាក់របស់តួអង្គសំខាន់ Baek Ah Jin ដែលសម្តែងដោយ Kim Yoo Jung ។

ទោះយ៉ាងណា ភ្លាមៗបន្ទាប់ពីផ្ទាំងរូបភាពនេះត្រូវបានចេញផ្សាយ សហគមន៍អនឡាញបានចោទប្រកាន់ខ្សែភាពយន្ត «Dear X» ថាបានលួចចម្លងផ្ទាំងរូបភាព។ មនុស្សជាច្រើនបានចង្អុលបង្ហាញថាផ្ទាំងរូបភាពនៃរឿង «Dear X» គឺស្រដៀងទៅនឹងផ្ទាំងរូបភាពនៃខ្សែភាពយន្តចិនឆ្នាំ ២០១៧ មានចំណងជើងថា «The Devotion of Suspect X» ដែលកែសម្រួលពីប្រលោមលោក។

ឆ្លើយតបនឹងការរិះគន់នេះ តំណាងផលិតកម្មរឿង «Dear X» បានលើកឡើងពីបញ្ហានេះ។ ខាងផលិតកម្មបាននិយាយថា «យើងបានដឹងអំពីភាពស្រដៀងគ្នានេះជាមួយនឹងព័ត៌មានលម្អិតជាក់លាក់មួយ ហើយបានឈប់ប្រើប្រាស់វាភ្លាមៗ។ យើងក៏សម្រេចចិត្តមិនប្រើវានៅពេលអនាគតដែរ»។ ផលិតកររឿង «Dear X» បានសូមទោសសាធារណៈជនចំពោះការមិនបានត្រួតពិនិត្យដំណើរការផលិតដោយយកចិត្តទុកដាក់ ហើយបានសន្យាថានឹងពង្រឹងការត្រួតពិនិត្យដើម្បីធានាថាឧប្បត្តិហេតុបែបនេះមិនកើតឡើងម្តងទៀត។

នៅដើមខែសីហា រឿង «Dear X» បានក្លាយជាប្រធានបទនៃការពិភាក្សានៅពេលដែលឈុតភាពយន្តត្រូវបានបង្ហាញ។ នៅក្នុង Trailer តារាសម្តែង Kim Yoo Jung បានចាប់អារម្មណ៍ជាមួយនឹងរូបរាងដ៏ប្រណីត ទាក់ទាញរបស់នាង និងឈុតឆាករន្ធត់ និងរំភើបមួយចំនួន។ នេះបានបង្កើនការរំពឹងទុករបស់ទស្សនិកជនសម្រាប់ការងារនេះ។ ការដែល «Dear X» រងការចោទប្រកាន់ថាលួចថតបង្ហោះនោះបានធ្វើឱ្យទស្សនិកជនមួយចំនួន មានការបារម្ភចំពោះគម្រោងនេះ។ ទន្ទឹមនឹងនេះ មហាជនខ្លះសង្ស័យថានេះជា «ល្បិចប្រព័ន្ធផ្សព្វផ្សាយ» របស់ផលិតករឬអត់?។

អ្នកគាំទ្ររបស់ Kim Yoo Jung មានការព្រួយបារម្ភដោយសារតែ «Dear X» គឺជាគម្រោងត្រឡប់មកវិញរបស់នាងបន្ទាប់ពីជាងមួយឆ្នាំ ចាប់តាំងពីខ្សែភាពយន្ត Netflix ដែលរងការរិះគន់យ៉ាងខ្លាំងគឺរឿង «Chicken Nugget» ដែលបានចេញផ្សាយនៅក្នុងខែមីនា ឆ្នាំ ២០២៤។ ទស្សនិកជនមានការទន្ទឹងរង់ចាំខ្ពស់ចំពោះរឿង «Dear X» នៅពេលដែល Kim Yoo Jung ផ្លាស់ប្តូររូបរាងរបស់នាង ក្លាយជាស្ត្រីចាស់ទុំ មានមន្តស្នេហ៍ និងអាថ៌កំបាំង គេចចេញពីរូបភាពដែលនាងធ្លាប់សម្តែងកាលពីកន្លងមក៕