Jungkook សមាជិក BTS បានចេញការព្រមានមួយនៅពេលដែលអ្នកគាំទ្រឈ្លក់រង្វេងទីពីរបានព្យាយាមលួចចូលផ្ទះរបស់លោកបន្ទាប់ពីចេញពីយោធា។ អ្នកគាំទ្រនោះមានអាយុ៤០ឆ្នាំត្រូវបានចាប់ខ្លួនខណៈពេលដែលព្យាយាមលួចចូលផ្ទះរបស់តារាចម្រៀងរូបនេះ។
ក្នុងការផ្សាយបន្តផ្ទាល់ថ្មីៗនេះ Jungkook បាននិយាយអំពីឧប្បត្តិហេតុនេះដោយមានអាកប្បកិរិយាខឹងសម្បារ និងបានព្រមានយ៉ាងខ្លាំង។ Jungkook បាននិយាយថា នៅពេលខ្លួនត្រឡប់ពីកន្លែងហាត់ប្រាណ លោកបានឃើញការផ្សាយពាណិជ្ជកម្មខ្លួនឯងនៅលើជណ្តើរមួយក្នុង Yongsan ហើយគ្រោងនឹងចាប់ផ្តើមការផ្សាយបន្តផ្ទាល់នៅទីនោះ។ ប៉ុន្តែបើគិតពីហេតុការណ៍ដែលមានអ្នកលួចចូលផ្ទះកាលពីថ្ងៃទី៣០ ខែសីហា ធ្វើឱ្យភ័យខ្លាចបន្តិច។ Jungkook រៀបរាប់ថា នៅពេលដែលស្ត្រីអាយុ៤០ឆ្នាំព្យាយាមលួចចូលផ្ទះ លោកកំពុងមើលកាមេរ៉ាឃ្លាំមើល។
Jungkook បាននិយាយថា «ខ្ញុំកំពុងសង្កេតមើលស្ថានភាព ហើយបានឮសំលេងរំខាន ហើយបានឃើញស្រ្តីនោះព្យាយាមបើកទ្វារ។ ការពិតគឺស្រ្តីនោះបានបើកទ្វាររួចហើយ ប៉ុន្តែប៉ូលិសមកភ្លាមៗ។ ខ្ញុំបានឃើញរឿងទាំងមូល។ ស្រ្តីនោះថែមទាំងអះអាងថាជាមិត្តរបស់ខ្ញុំ»។
តារាចម្រៀងរូបនេះបានព្រមានអ្នកគាំទ្រដែលរឹងទទឹងថា ប្រសិនបើពួកគេព្យាយាមចូលទៅក្នុងចំណតរថយន្តនៃអគារអាផាតមិនរបស់លោក ពួកគេនឹងត្រូវបិទទ្វារ ហើយអ្វីៗនឹងត្រូវថតទុកក្នុងកាមេរ៉ាទុកជាព័ស្តុតាងដើម្បីបញ្ជូនទៅប៉ូលិស។ បន្ទាប់មក Jungkook បានបន្ថែមយ៉ាងម៉ឺងម៉ាត់ទៅកាន់ ARMY ថា ៖ «ARMY គឺដូចជាគ្រួសារ និងមិត្តភក្តិរបស់ខ្ញុំ។ ពិតណាស់ ខ្ញុំពិតជាដឹងគុណខ្លាំងណាស់សម្រាប់ការគាំទ្ររបស់អ្នកគ្រប់គ្នា… ប៉ុន្តែតើអ្នកធ្វើនេះដើម្បីអ្វី? ប្រសិនបើអ្នកមិនចង់ត្រូវបានគេនាំទៅប៉ុស្តិ៍ប៉ូលិស កុំសូម្បីតែចូលទៅ»។
គួរឱ្យដឹងថានៅយប់ថ្ងៃទី៣០ ខែសីហា ស្ត្រីម្នាក់អាយុ ៤០ ឆ្នាំបានតាមឡានចូលទៅក្នុងចំណតនៃអគារផ្ទះល្វែងរបស់ Jungkook ហើយត្រូវបានចាប់ខ្លួនដោយបុគ្គលិកសន្តិសុខដែលបន្ទាប់មកបានទូរស័ព្ទទៅប៉ូលិស។ ពេលចាប់ខ្លួនស្ត្រីរូបនេះបានក្លែងបន្លំថាជាផ្ទះមិត្តភក្តិរបស់ខ្លួន។
នេះមិនមែនជាលើកទីមួយទេដែល Jungkook បានព្រមានទៅកាន់អ្នកគាំទ្រឈ្លក់រង្វេង ងប់ងល់ហួសព្រំដែន។ កាលពីខែមិថុនា ជាថ្ងៃដែល Jungkook ត្រូវបានរំសាយចេញពីយោធា ស្ត្រីជនជាតិចិនម្នាក់ក្នុងវ័យ ៣០ ឆ្នាំក៏ត្រូវបានចាប់ខ្លួន។ ស្រ្តីនោះត្រូវបានចោទប្រកាន់ពីបទប៉ុនប៉ង រំលោភបំពាន៕
