មិនភ្លេចខ្លួននោះទេ! អ្នកបង្កើតមាតិកា ជន រតនៈ សង្ឃឹមថាថៃនឹងដោះលែងទាហានខ្មែរមកវិញមុនភ្ជុំបិណ្ឌ

រយៈពេល ៣៥ថ្ងៃហើយគិតត្រឹមថ្ងៃទី២ ខែកញ្ញា ឆ្នាំ២០២៥ ដែលទាហានថៃបានចាប់ខ្លួនកងកម្លាំងកម្ពុជាដោយខុសច្បាប់ក្រោយបទឈប់បាញ់ចូលជាធរមានភ្លាមៗកាលពីព្រឹកថ្ងៃទី២៩ ខែកក្កដា ឆ្នាំ២០២៥។ អ្នកបង្កើតមាតិកា ជន រតនៈ បានបង្ហោះសារនៅលើបណ្តាញសង្គមដោយសង្ឃឹមថាកងកម្លាំងកម្ពុជាអាចវិលមកមាតុភូមិវិញមុនពិធីបុណ្យភ្ជុំបិណ្ឌព្រោះសមាជិកគ្រួសារពិតជានឹករលឹកខ្លាំងណាស់។

នៅតែមានការនឹករលឹកមិនភ្លេចខ្លួនដែលទាហានទាំង១៨នាក់ដែលថៃចាប់ខ្លួនទៅដោយខុសច្បាប់មិនទាន់មានការដោះលែងមកវិញអ្នកបង្កើតមាតិកា ជន រតនៈ បានសរសេរបង្ហោះនៅលើបណ្តាញសង្គមនាថ្ងៃទី១ កញ្ញា ថា «គិតម៉េចឥលូវ? ប្រុងអត់ដោះលែងកងទ័ពខ្មែរទេមែន? គិតថាខ្មែរភ្លេចត្រចៀកហើយមែន? តើហេតុផលអីដែលត្រូវទុកពួកគាត់យូរដល់ថ្នាក់នេះ? ដឹងថាគ្រួសារម៉ែឪប្រពន្ធកូនគេ នឹកកូននឹកប្ដីគេទេ? សំខាន់ជិតភ្ជុំទៀតមិនដឹងជាពួកគាត់នឹកផ្ទះ នឹកប្រទេសយើងយ៉ាងណាទេ! សូមឱ្យពួកគាត់មានក្ដីសុខ មានសុខភាពល្អ ឆាប់វិលមកកាន់មាតុភូមិយើងវិញ! ពួកយើងជាប្រជាជនទាំងអស់ពិតជានឹករលឹក និងបារម្ភអស់លោកទាំងអស់គ្នាណាស់ សង្ឃឹមថានឹងបានមកស្រុកយើងវិញមុនភ្ជុំនេះផងចុះ»។

អ្នកបង្កើតមាតិការូបនេះបានបន្ថែមទៀតថា «ឪពុកម្ដាយនឹកកូន ប្រពន្ធនឹកប្ដី កូននឹកឪ លោកអើយលោក មិនដឹងថាសុខទុក្ខយ៉ាងណាទេ យើងជាប្រជាជនបារម្ភគាត់យ៉ាងនឹងហើយ ចុះទម្រាំជាគ្រួសារសាច់ញាតិទៀត តើអន្ទះសារយ៉ាងណាទៅ។ នឹកណាស់បារម្ភណាស់ មិនដឹងថាមួយយប់ៗសម្រាន្តលក់ឬក៏អត់ទេ! មិននឹកស្មានថា២០២៥ ជាឆ្នាំដែលលំបាកសម្រាប់ប្រទេសយើងសោះ កម្សត់ណាស់គេបំពានរហូត»។

គួរបញ្ជាក់ផងដែរថា នៅថ្ងៃទី១ ខែសីហា ឆ្នាំ២០២៥នេះ ទាហានកម្ពុជាចំនួន២រូប ត្រូវបានភាគីថៃប្រគល់ត្រឡប់មកវិញហើយ នៅច្រកទ្វារព្រំដែនអន្ដរជាតិអូរស្មាច់ ខេត្តឧត្តរមានជ័យ ដោយឡែក១៨នាក់ទៀតថៃពុំទាន់ដោះលែងនៅឡើយ៕