Austin Tukwa អ្នកបង្កើតមាតិកាមួយរូបដែលជនបរទេសអាចនិយាយភាសាខ្មែរបានបង្ហោះវីដេអូមួយបង្កឱ្យមានការចាប់អារម្មណ៍យ៉ាងខ្លាំងពីទស្សនិកជនបន្ទាប់ពីបានជួបសម្ភាសន៍ជាមួយ អាន់យ៉ា មិនកូ(Anya Minko) ជាកូនថៃកាត់អូស្រ្តាលីរស់នៅប្រទេសកម្ពុជាជាង២០ឆ្នាំព្រមទាំងមានស្នាដៃសិល្បៈដ៏ចំណាន។
តាមរយៈវីដេអូដែលបង្ហោះនៅលើបណ្តាញសង្គមកាលពីពេលថ្មីៗនេះរបស់ Austin Tukwa Anya Minko បានរៀបរាប់ថា នាងជាកូនអូស្រា្តលីកាត់ថៃ រស់នៅប្រទេសខ្មែរជាង២០ឆ្នាំមកហើយ។ នាងមកដល់ស្រុកខ្មែរកាលពីអាយុ៣ឆ្នាំក្នុងឆ្នាំ ១៩៩៦ ខណៈនាងមានឪពុកជាជនជាតិអូស្ត្រាលី និងមានម្តាយជាជនជាតិថៃ។
ការរស់ជាង២០ឆ្នាំនៅលើទឹកដីដ៏ស្រស់ស្អាតនេះ Anya បានបង្ហាញថានាងគឺជាសិល្បករខាងគូរគំនូរនិងធ្វើការនៅអង្គការមួយពាក់ព័ន្ធនឹងខាងអប់រំកសិកម្ម នៅក្នុងប្រទេសកម្ពុជា។ ដ្បិតថាមិនមានឈាមជ័រខ្មែរ ប៉ុន្តែ Anya បានធ្វើឱ្យមនុស្សជាច្រើនភ្ញាក់ផ្អើលព្រោះនាងជាកូនថៃកាត់អូស្រ្តាលី តែអាចនិយាយភាសាខ្មែរបានយ៉ាងសាហាវ។ 
ស្របពេលបង្ហាញប្រវត្តិរបស់ខ្លួនជាកូនកាត់ថៃ ខណៈបច្ចុប្បន្នប្រទេសខ្មែរនិងថៃមានជម្លោះព្រំដែនជាមួយគ្នាប៉ុន្តែមហាជននៅតែបង្ហាញការស្រលាញ់ចូលចិត្តចំពោះវិចិត្រកររូបនេះ។ បើតាមអត្ថបទសម្ភាសន៍មួយនៅពេលដែលនាងពេញវ័យ Anya Minko បានចាកចេញទៅសិក្សានៅក្រៅប្រទេសហើយត្រឡប់មកកម្ពុជាវិញនៅឆ្នាំ ២០២៣ ដើម្បីធ្វើការងារអភិវឌ្ឍន៍ ហើយសម្រេចចិត្តបន្តការស្រលាញ់សិល្បៈគំនូរនេះ។ ទោះបីជាកូនកាត់ក្តីប៉ុន្តែ Anya Minko បាននិយាយថាប្រទេសកម្ពុជាតែងតែជាផ្ទះ ដែលជាកន្លែងដែលនាងបានចំណាយពេលស្ទើរតែពេញមួយជីវិតរបស់ខ្លួនហើយឥឡូវនេះហាក់ដូចជាកន្លែងដែលនាង មានបំណងចង់ក្លាយជាអ្នកសិល្បៈក្នុងប្រទេសនេះ។ តាមរយៈស្នាដៃគំនូររបស់ Anya Minko បានធ្វើឱ្យមនុស្សជាច្រើនកោតសរសើរស្នាដៃនាង៕
