កូនប្រុសទី២របស់ឧកញ៉ា ព្រាប សុវត្ថិ មានឈ្មោះថា សុវត្ថិ មុន្នីនាគ ឬហៅថា N.John ត្រូវបានសាធារណជនមានការជជែកវែកញែកច្រើនដោយសារតែលោកបានចេញវីដេអូខ្លីពីបទចម្រៀង «Sweet Love» ដែលសហការជាមួយនឹងតារាបរទេសម្នាក់ត្រៀមនឹងចេញក្នុងពេលខាងមុខនេះ។ ឃើញមានការរិះគន់ច្រើនទៅកាន់ N.John ពិធីករល្បីឈ្មោះ ជា វណ្ណារិទ្ធបានពន្យល់ទៅកាន់មហាជនរួមទាំងលើកទឹកចិត្តកូនខ្មែរកំពុងសាងឈ្មោះនៅសហរដ្ឋអាម៉េរិក។.png)
គេចាំបានថា កាលពីថ្ងៃទី២៥ ខែកក្កដា N.John បានចេញវីដេអូខ្លីនៃបទ «Sweet Love» ប៉ុន្តែត្រូវបានមហាជនរិះគន់ចាស់ដៃព្រោះគិតថាការចេញចម្រៀងនេះគឺខុសកាលៈទេសៈព្រោះតែប្រទេសកម្ពុជាកំពុងមានសង្គ្រាមក្តៅគគុកជាមួយនឹងថៃ ដែលប្រទេសថៃចូលមកឈ្លានពានកម្ពុជា។ រងការរិះគន់យ៉ាងច្រើនលើសលប់ N.John បានកែប្រែស្ថានការណ៍វិញដោយចេញមកបង្ហោះពីប្រទេសកម្ពុជាមិនត្រូវការសង្គ្រាមនោះទេ ហើយ MV ចម្រៀងរបស់លោកក៏បានលើកពេលចេញផ្សាយផងដែរ។
យ៉ាងណាមិញ N.John បានបង្កឱ្យមានការជជែកវែកញែកម្តងទៀតនៅពេលលោកចេញផ្សាយវីដេអូខ្លីៗពីបទ «Sweet Love» កាលពីថ្ងៃទី១៣ សីហា ស្របពេលមានដំណឹងថាថៃនឹងបើកការវាយប្រហារឈ្លានពានមកកម្ពុជាម្តងទៀត ទើបធ្វើឱ្យអ្នកលេងបណ្តាញសង្គមហ្វេកប៊ុកចាត់ទុកថាលោកចេញចម្រៀងខុសកាលៈទេសៈម្តងហើយម្តងទៀត។
ទោះជាយ៉ាងណា ទន្ទឹមនឹងមានការរិះគន់ចំពោះកូនប្រុសទី២ឧកញ៉ា ព្រាប សុវត្ថិ ចេញចម្រៀង «Sweet Love» នេះពិធីករ ជា វណ្ណារិទ្ធ បានពន្យល់ទៅកាន់សាធារណជនថា N.John ស្ថិតក្រោមការគ្រប់គ្រងរបស់ស្ថាប័នបរទេសដូច្នេះគេជាអ្នកចាត់ចែង។
លោក ជា វណ្ណារិទ្ធ បានលើកឡើងនៅយប់ថ្ងៃទី១៤ សីហា ថា «សុំនិយាយរឿង N.John កូនប្រុសពូសុវត្ថិបន្តិច។ ខ្ញុំបានឮមកថា Acc & Page របស់គាត់ បរទេសជាអ្នកកាន់ ដូច Kpop អ៊ីចឹង។ គាត់នៅផ្ដោតរៀនហ្វឹកហាត់ក្នុងស្ថាប័នបរទេសមួយហ្នឹង ដូច្នេះគាត់ស្ថិតនៅក្រោមការគ្រប់គ្រងរបស់គេ។ គ្រប់ Vìdeo ទាំងអស់ ត្រូវបាន Schedule គឺតម្រូវឱ្យ Release តែម្ដង ។ ពេលគាត់បានល្បីល្បាញគេស្គាល់ពាសពេញ ក៏អាចជួយលើកស្ទួយមុខមាត់ប្រទេសយើងផងដែរ។ អ៊ីចឹងសូមអ្នកទាំងអស់គ្នា Understand him ផងចុះណា៎ ខ្មែរស្រឡាញ់ខ្មែរ ប្រឹងបន្តទៀត Bro @n.johnworld»។
មិនត្រឹមតែពិធីករ ជា វណ្ណារិទ្ធ ប៉ុណ្ណោះទេដែលបង្ហាញការយល់ចិត្តទៅកាន់ N.John ដែលកំពុងបម្រើអាជីពសិល្បៈនៅលើទឹកដីសហរដ្ឋអាម៉េរិក ពេជ្រ វត្តីសារ៉ាវឌ្ឍី ម្តាយក្មេក ហេង វិសាល អ្នកបង្កើតមាតិកា ឡាយ ប៊ុនឡេង ក៏បានចែករំលែកបន្តអត្ថបទរបស់លោក ជា វណ្ណារិទ្ធ ផងដែរ៕
