កម្រណាស់! ឱក សុគន្ធកញ្ញា ហូរទឹកភ្នែកឈឺចាប់នូវទង្វើរបស់ថៃធ្វើដាក់ទាហានខ្មែរ

ព្រឹត្តិការណ៍១សីហា ដែលកងកម្លាំងថៃដោះលែងទាហានខ្មែរពីរនាក់នៅតែបង្កឱ្យប្រជាជនខ្មែរចងចាំមិនភ្លេចហើយនៅតែមានភាពឈឺចាប់ចំពោះការប្រព្រឹត្តរបស់ថៃ។ ជាក់ស្តែងតារាចម្រៀង ឱក សុគន្ធកញ្ញា កម្រនឹងហូរទឹកភ្នែកបង្ហាញអារម្មណ៍ទន់ខ្សោយឱ្យទស្សនិកជនឃើញណាស់ប៉ុន្តែការឈឺចាប់ដ៏មិនអាចភ្លេចបានអមជាមួយនឹងបទ វណ្ណដា ទៀតធ្វើឱ្យ តារាចម្រៀងរូបនេះស្រក់ទឹកភ្នែក។

នៅយប់ថ្ងៃទី១៣ សីហា អ្នកនាង ឱក សុគន្ធកញ្ញា បានបង្ហោះវីដេអូមួយនៅលើបណ្តាញសង្គមទិកតុកដោយបានដាក់បទចម្រៀងរបស់ វណ្ណដា មានចំណងជើងថា «១សីហា»ជាមួយនឹងចំណងជើងថា «ពួកយើងនៅតែឈឺចាប់»។ ក្នុងវីដេអូនេះ អ្នកនាង ឱក សុគន្ធកញ្ញា ស្ថិតនៅក្នុងរថយន្តកំពុងធ្វើដំណើរតាមផ្លូវ ប៉ុន្តែបានស្តែងឱ្យទស្សនិកជនឃើញពីភាពឈឺចាប់របស់កំពូលតារាចម្រៀងរូបនេះ។

ទោះបីជាមិនបញ្ជាក់ ប៉ុន្តែមហាជនជ្រាបច្បាស់ពីទំហំឈឺចាប់មិនមែនតែតារាចម្រៀង ឱក សុគន្ធកញ្ញា តែប្រជាពលរដ្ឋនៅតែឈឺចាប់ចំពោះទង្វើរបស់ថៃធ្វើដាក់ទាហានខ្មែរខណៈមកទល់ពេលនេះកងកម្លាំងថៃនៅមិនព្រមដោះលែងកងកម្លាំងកម្ពុជាដែលនៅសល់ឱ្យវិលមកមាតុភូមិនៅឡើយ។

ទឹកភ្នែករបស់អ្នកនាង ឱក សុគន្ធកញ្ញា ដែលពោរពេញដោយឈឺចាប់នេះ ទស្សនិកជនដទៃទៀតបានលើកឡើងស្រដៀងៗគ្នាថាពួកគេនៅតែឈឺចាប់ដូចគ្នា។ អ្នកមួយចំនួនក៏បានកត់សម្គាល់ដែរថានេះគឺជារឿងដ៏កម្ររបស់អ្នកនាង ឱក សុគន្ធកញ្ញា បង្ហាញរូបភាពទឹកភ្នែកបែបនេះឱ្យទស្សនិកជនឃើញណាស់។

គួរបញ្ជាក់ផងដែរថា កាលពីថ្មីៗមកនេះអ្នកនាង ឱក សុគន្ធកញ្ញា ក៏បានបង្ហោះសារមួយនៅលើបណ្តាញសង្គមហ្វេកប៊ុកអំពីបេះដូងខ្មែរ ឈាមខ្មែរ ពោរពេញទៅដោយសច្ចៈធម៌ គុណធម៌ ស្អាតស្អំ មិនកុហកភូតភរ មិនក្លែងបន្លំ មិនចេះសម្តែង។ លើសពីនេះតារាចម្រៀងក្នុងទ្រនំរស្មីហង្សមាសរូបនេះថាប្រជាជនខ្មែរ ធ្វើចេញពីចិត្ត សាមគ្គីភាព ស្រឡាញ់ និងឱ្យតម្លៃគ្នាដើម្បីជាចំណែកមួយក្នុងប្រទេសជាតិនាពេលនេះ៕