ថៃភ័យហើយ! ខណៈពលករខ្មែរជាង៨០មុឺននាក់សម្រុកមកផ្ទះវិញអស់ ធ្វើឲ្យថៃខ្វះខាតកម្លាំងយ៉ាងច្រើន

បាងកក៖ អង្គការការងារចំណាកស្រុក (MWG) ប្រចាំនៅប្រទេសថៃ បានបង្ហាញក្ដីកង្វល់ចំពោះស្ថានភាពការងារនៅក្នុងប្រទេសខ្លួន ខណៈពលករខ្មែរប្រមាណជាង 80មុឺននាក់ បាននាំគ្នាត្រឡប់ទៅប្រទេសកំណើតវិញ ជាហេតុដែលធ្វើឲ្យឧស្សាហកម្មការងារនៅក្នុងប្រទេសថៃជួបប្រទះនឹងការខ្វះខាតកម្លាំងពលកម្ម កកស្ទះការងារមិនទាន់អាចដោះស្រាយបាន។ នេះបើយោងតាមការចុះផ្សាយដោយផ្ទាល់នៅលើគេហទំព័ររបស់ MWG។

កាលពីថ្ងៃទី8 ខែសីហា ឆ្នាំ2025 អង្គការ MWG បានដាក់ក្ដីបារម្ភជូនរដ្ឋមន្ត្រីក្រសួងការងារថៃ ទាក់ទងនឹងស្ថានភាពការងារនៅក្នុងប្រទេស ដោយជំរុញឱ្យរដ្ឋាភិបាលរបស់ពួកគេដោះស្រាយបញ្ហាកង្វះកម្លាំងពលកម្មជាបន្ទាន់ បន្ទាប់ពីប្រជាពលរដ្ឋជាង 30មុឺននាក់បានត្រឡប់ទៅផ្ទះវិញ។ ប៉ុន្តែបើតាមការលើកឡើងរបស់ លោក Adisorn Kerdmongkol អ្នកសម្របសម្រួលនៅ MWG និយាយឲ្យដឹងថា តួលេខនៃពលករខ្មែរដែលវិលចូលប្រទេសវិញ គឺលើសពីរបាយការណ៍ទៅទៀត។

អង្គការនេះបានបញ្ជាក់ថា ពួកគេសូមស្នើនូវអនុសាសន៍ចំនួន 10 ចំណុចសម្រាប់ការគ្រប់គ្រងពលករកម្ពុជា រួមមាន ការការពារសុវត្ថិភាពរបស់ពួកគេ ការបើកបណ្តាញចុះឈ្មោះរហ័ស ការលើកលែងពួកគេពីការស្នើសុំទិដ្ឋាការ និងការបង្កើតក្រុមការងារដើម្បីដោះស្រាយបញ្ហាកង្វះកម្លាំងពលកម្មនៅតាមព្រំដែន។

បើតាមរបាយការណ៍ពីរដ្ឋាភិបាលក្រុងបាងកកបង្ហាញថា ពលករខ្មែរសរុបដែលធ្វើការនៅប្រទេសថៃ មានចន្លោះពី 1ទៅ1.5លាននាក់។ ដូចនេះ ការចាកចេញរបស់ពលករខ្មែរ បានបង្កផលប៉ះពាល់ខ្លាំងបំផុតដល់វិស័យកសិកម្មថៃនៅតាមបណ្តាខេត្តនានាដូចជា Chanthaburi ជាដើម ធ្វើឲ្យម្ចាស់កសិដ្ឋានទាំងឡាយកំពុងឈឺក្បាលនឹងវិបត្តិខ្វះកម្លាំងពលកម្មជាខ្លាំង។

គួរជម្រាបថា គិតត្រឹមថ្ងៃទី8 ខែសីហា ឆ្នាំ2025នេះ ពលករខ្មែរចំនួនប្រមាណ 87ម៉ឺននាក់បានវិលត្រឡប់មកកាន់មាតុប្រទេសវិញ ដោយសារជម្លោះព្រំដែនកម្ពុជា-ថៃ។ ជាមួយគ្នានេះ ក្រសួងការងារកម្ពុជា បានសន្យាថា ពលករខ្មែរដែលមកពីថៃទាំងអស់នឹងទទួលបានការងារធ្វើគ្រប់ៗគ្នា៕