តារារ៉េប វណ្ណដា បានប្រើឥទ្ធិពលសំឡេងរបស់ខ្លួនតាមរយៈតន្រ្តីបង្ហាញពីការឈឺចាប់របស់ខ្លួននិងពលរដ្ឋកម្ពុជាតាមរយៈបទ «១ សីហា» ហើយត្រូវបានបរទេសជាច្រើននាក់យកបទនេះទៅ Reaction ។
កាលពីវេលាជាង១២ ឈានចូលថ្ងៃទី២ សីហា វណ្ណដា បានទម្លាក់បទចម្រៀងមួយបទមានចំណងជើងថា «១ សីហា (August 1st)» និងបានបន្ថែមខ្លឹមសារទៀតថា ០១ សីហាពួកយើងនឹងចងចាំថ្ងៃនេះអស់មួយជីវិត WE WILL NEVER FORGET!»។ អត្ថន័យបទចម្រៀងនេះគឺពោរពេញដោយទុក្ខសោកភាពឈឺចាប់របស់ប្រជាជនកម្ពុជាបន្ទាប់ពីភាគីថៃបញ្ជូនយោធិន២រូបវិលមកប្រទេសកម្ពុជាវិញមានទាំងរបួសនិងបាត់បង់ស្មារតី។ រូបភាពទាំងនេះមិនត្រឹមតែ វណ្ណដា ប៉ុណ្ណោះទេដែលទប់ទឹកភ្នែកមិនជាប់ប៉ុន្តែពលរដ្ឋដទៃទៀតក៏ឈឺចាប់មិនចាញ់គ្នាប៉ុន្មាននោះទេ។
ការរៀបរាប់ពីការបាត់បង់ក្នុងភ្លើងសង្គ្រាម បញ្ហាទុក្ខលំបាក ស្រមោលអតីតកាល និងការស្វែងរកសុខសន្តិភាព របស់ វណ្ណដា តាមរយៈបទចម្រៀងគឺពិតជាធ្វើឱ្យប្រជាជនកម្ពុជារំជួលចិត្តសូម្បីតែជាតិសាសន៍ដទៃក៏សម្តែងក្តីអាណិតមកកាន់ប្រទេសកម្ពុជា ប្រជាជនកម្ពុជា។
មានជនបរទេសជាច្រើនដែលធ្វើ Reaction គឺបានយកបទ «១ សីហា » របស់ វណ្ណដា ទៅ Reaction បើទោះបីជាជាតិសាសន៍ដទៃមិនអាចស្តាប់ភាសាខ្មែរបាន ប៉ុន្តែសំឡេងរបស់ វណ្ណដា និងអត្ថន័យបង្ហាញជាភាសាអង់គ្លេសធ្វើឱ្យពួកគេជ្រួតជ្រាបច្បាស់ពីទំហំឈឺចាប់ អួនណែនរបស់ប្រជាជនកម្ពុជា។
សំឡេងដ៏មានឥទ្ធិពលរបស់ វណ្ណដា គឺពិតជាសាយភាពបានលឿននិងខ្លាំងហើយវីដេអូរបស់តារារ៉េបរូបនេះបាននិយាយអំពីរឿងរ៉ាវជុំវិញជម្លោះព្រំដែនរវាងខ្មែរថៃ ការខូតខាតនៃសម្បត្តិបេតិកភណ្ឌពិភពលោករបស់ប្រាសាទព្រះវិហារគឺបានសាយភាពដល់ជនបរទេស៕
