ពេលនិយាយដល់ជ្រុញ មនុស្សភាគច្រើនគិតថា ជ្រុញផ្លាស្ទិចគឺសុវត្ថិភាពជាងជ្រុញឈើ។ តើមូលហេតុអ្វី? មកពីវាងាយស្រួលលាងសម្អាតជាង? ប៉ុន្តែការគិតបែបនេះគឺខុសហើយ ការសិក្សាថ្មីៗបង្ហាញថា ជ្រុញដែលធ្វើពីឈើ ស្អាត និងល្អសម្រាប់សុខភាពជាងជ្រុញផ្លាស្ទិច។
ក្រុមអ្នកវិទ្យាសាស្ត្រនៅសាកលវិទ្យាល័យ UC Davis បានធ្វើការសិក្សានៅពាក់កណ្ដាលឆ្នាំ ១៩៩០ ហើយរកឃើញថា ជ្រុញឈើមានបាក់តេរីតិចជាងជ្រុញផ្លាស្ទិច។ នេះក៏ដោយសារ ជ្រុញឈើមានរន្ធតូចៗដែលអាចបឹតយកបាក់តេរីចូលទៅខាងក្នុង។ បាក់តេរីនៅក្នុងនោះនឹងស្លាប់បន្ទាប់ពីរយពេលខ្លី។ នេះមានន័យថា ផ្ទៃក្តារជ្រុញនៅខាងក្រៅ ស្អាតជាង។ ដើមឈើដែលយកមកធ្វើជ្រុញដូចជា ដើមអុក និង ដើមប៊ីច អាចសម្លាប់បាក់តេរីម្យ៉ាងឈ្មោះថា Listeria បានផងដែរ ខណៈឈើប៊ីច (beech) ក៏មានសមត្ថភាពប្រឆាំង Salmonella ផងដែរ។
ទោះជាយ៉ាងណា ប្រសិនបើអ្នកលាបប្រេងលើបន្ទះជ្រុញ ដូចជា ប្រេងលីនស៊ីដ ឬ ប្រេងខនិច វាអាចនឹងបន្ថយសមត្ថភាពសម្លាប់បាក់តេរីបានយ៉ាងហោចណាស់ ២៤ម៉ោង។
យ៉ាងណាមិញ ជ្រុញផ្លាស្ទិចអាចងាយស្រួលលាងសម្អាតជាង ជាពិសេសដោយប្រើម៉ាស៊ីនលាងចាន ឬសាប៊ូកាត់មេរោគ។ ប៉ុន្តែវាក៏ងាយមានបញ្ហាដូចជា ពេលប្រើកាំបិត វានឹងមានស្នាមជ្រៅ។ បាក់តេរីអាចលាក់ខ្លួននៅក្នុងស្នាមទាំងនោះហើយដែលបន្តដុះដាល។ លើសពីនេះទៅទៀតគឺ បំណែកតូចៗនៃផ្លាស្ទិច ឬហៅថា microplastics អាចកើតឡើងគ្រប់ពេលដែលអ្នកប្រើប្រាស់វា ហើយវាអាចនឹងចូលទៅក្នុងម្ហូបដែលអ្នកញុំា។
អ្នកជំនាញណែនាំថា អ្វីដែលសំខាន់មិនមែនជាប្រភេទជ្រុញទេ ប៉ុន្តែជារបៀបដែលអ្នកលាងសម្អាតវា ដូច្នេះ អ្នកគួរលាងវាជាមួយទឹកក្តៅនិងសាប៊ូរ រួខដាក់វាហាលឲ្យស្ងួតទើបយកមកប្រើប្រាប់ម្ដងទៀត។ ម្យ៉ាងទៀត អ្នកគួរប្រើជ្រុញផ្សេងៗគ្នាសម្រាប់ពេលធ្វើម្ហូប មួយសម្រាប់កាប់សាច់ ឬឆ្អឹង និងមួយទៀតសម្រាប់បន្លែ/ផ្លែឈើ
សរុបមក មិនថាអ្នកប្រើជ្រុញឈើឬផ្លាស្ទិចទេ វាជាជម្រើសរបស់អ្នក ប្រើមួយណាក៏មានសុវត្តិភាពដែរ សំខាន់គឺចេះមានអនាម័យ លាងសម្អាតវាឲ្យបានត្រឹមត្រូវ។ ទោះជាយ៉ាងណា ជ្រុញឈើមានសមត្ថភាពធម្មជាតិក្នុងការសម្លាប់បាក់តេរីបានល្អជាង។ ខណៈជ្រុញផ្លាស្ទិចងាយសម្អាតជាង ប៉ុន្តែអាចនាំឲ្យមានបាក់តេរី និងកំទេចផ្លាស្ទិចលាក់ខ្លួន។
ដូច្នេះពេលអ្នកចាប់ផ្តើមប្រើ ឬប្រើរូច សូមប្រាកដថាអ្នកបានសម្អាតវារួចរាល់ហើយ៕
