បូជនីយដ្ឋាននៃការចងចាំ«ទួលស្លែង ជើងឯក និងម-១៣» ត្រូវបានចុះជាបេតិកភណ្ឌពិភពលោក

សូមអបអរសាទរ! បូជនីយដ្ឋានការចងចាំនៃកម្ពុជា ចំនួនបីទីតាំងរួមមាន៖សារមន្ទីរឪក្រិដ្ឋកម្មប្រល័យពូជសាសន៍ទួលស្លែង (ស.២១) មជ្ឈមណ្ឌលប្រល័យពូជសាសន៍ជើងឯក និងអតីតមន្ទីរឃុំឃាំង (ម.១៣) ត្រូវបានចុះបញ្ជីបេតិកភណ្ឌពិភពលោកនាយុគសម័យថ្មី នៅក្នុងសម័យប្រជុំលើកទី៤៧ របស់គណៈកម្មាធិការបេតិកភណ្ឌពិភពលោក កាលពីថ្ងៃសុក្រ ទី១១ ខែកក្កដា នាទីក្រុងប៉ារីស ប្រទេសបារាំង។

យោងតាមសេចក្ដីជូនដំណឹង ស្ដីពីការចុះ«បូជនីយដ្ឋានចងចាំនៃកម្ពុជា៖ ពីទីតាំងឧក្រិដ្ឋកម្មមកជាមណ្ឌលផ្សះផ្សា និង សន្តិភាព» ក្នុងបញ្ជីបេតិកភណ្ឌពិភពលោករបស់អង្គការយូណេស្កូនេះ បានឲ្យដឹងថា គោលបំណងនៃការចុះបញ្ជី «បូជនីយដ្ឋានចងចាំនៃកម្ពុជា» ក្នុងបញ្ជីបេតកភណ្ឌពិភពលោក គឺចង់បង្ហាញពិភពលោក អំពីភាពរឹងមាំ និងប៉ិនប្រសប់របស់ប្រជាជាតិកម្ពុជា ដែលបានប្រែក្លាយ “វាលពិឃា.ដ” មកជា “ទឹកដីសន្តិភាព” មានតម្លៃដ៏ជ្រាលជ្រៅក្នុងជម្រៅចិត្តរបស់ខ្មែរគ្រប់ៗរូប ហើយក៏ជាស្មារតីចងចាំសម្រាប់ពិភពលោកផងដែរ។ ការចុះបញ្ជីនេះ ក៏ជាការរម្លឹកដល់ជនរងគ្រោះទាំងឡាយពីអតីតកាលដ៏ឈឺផ្សារបស់កម្ពុជា ហើយក៏ជាភស្តុតាងនៃការប្ដូរផ្ដាច់ការពារដ៏មុតមាំបំផុតរបស់រាជរដ្ឋាភិបាលកម្ពុជា។

ការទទួលស្គាល់ «បូជនីយដ្ឋានចងចាំនៃកម្ពុជា» ទាំង៣ទីតាំងខាងលើ ជាបេតិកភណ្ឌពិភពលោកនាពេលនេះ គឺជាមោទនភាពដ៏ធំធេងថ្មីមួយទៀតសម្រាប់កម្ពុជា បន្ទាប់ពីការចុះរមណីយដ្ឋានប្រវត្តិសាស្រ្តនានាដូចជា រមណីយដ្ឋានអង្គរ (១៩៩២), ប្រាសាទព្រះវិហារ (២០០៨), តំបន់សបូរព្រៃគុក (២០១៧) និងរមណីយដ្ឋានប្រាសាទកោះកេរ (២០២៣)។

ចាប់ពីពេលនេះតទៅ «បូជនីយដ្ឋានចងចាំនៃកម្ពុជា» នឹងក្លាយជាផ្នែកមួយនៃការចងចាំសម្រាប់ពិភពលោក ហើយក៏ជាទីតាំងដែលមជ្ឈដ្ឋានអន្តរជាតិទូទាំងសកលលោក បានយល់កាន់តែច្បាស់អំពីទុក្ខលំបាករបស់ប្រជាជនកម្ពុជាក្នុងពេលអតីតកាល ព្រមទាំងភាពរឹងមាំរបស់ប្រជាជនកម្ពុជាក្នុងការកសាងសន្តិភាពនិងការអភិវឌ្ឍ ក្រោមពាក្យស្លោក “អរគុណសន្តិភាព”៕