Ziyu កាន់តែមានពន្លឺលើអាជីពសិល្បៈឡើងវិញក្រោយល្បីក្នុងរឿង BL

រឿងប្រភេទ BL មានចំណងជើងថា «Revenged love» របស់ប្រទេសចិនបានជំរុញឱ្យ Ziyu កើនឡើងប្រជាប្រិយភាពមិនធម្មតានៅក្នុងអាជីពសិល្បៈបន្ទាប់ពីរូបគេមានជីវិតអួរអាប់កន្លងមក។ Ziyu ត្រូវបានអ្នកគាំទ្រចោមរោមជុំវិញនៅឯព្រលានយន្តហោះបន្ទាប់ពីរូបគេសាងស្នាដៃលេចធ្លោលើការសម្តែងខណៈតារាប្រុសរូបនេះពុំមានអង្គរក្សផ្ទាល់ខ្លួន ជាហេតុធ្វើឱ្យអ្នកគាំទ្រព្រួយបារម្ភដល់សុវត្ថិភាពតារាប្រុស BL រូបនេះ។

យ៉ាងណាមិញទន្ទឹមនឹងការតស៊ូលើអាជីពសិល្បៈនៅក្នុងប្រទេសចិនរបស់ Ziyu មានអ្នកគាំទ្រទៅរោមជុំជិតសឹងតែដកដង្ហើមមិនបានកាលពីពេលថ្មីៗកន្លងមកនេះអ្នកគាំទ្រក៏បានជីកកកាយរឿងអតីតកាលរបស់ Ziyu ដែលតារាប្រុសរូបនេះបានអះអាងថាខ្លួនត្រូវបានសមាជិករួមក្រុម ធ្វើបាបហើយក្រុមហ៊ុនប្រព្រឹត្តដោយអយុត្តិធម៌ដាក់ទៀត។

Zi Yu ជាតារាចម្រៀងនិងជាតារាសម្ដែងជនជាតិចិនមានអាយុ២៣ឆ្នាំ កើតនៅ Lianyungang ខេត្ត Jiangsu ប្រទេសចិន។ Ziyu ធ្លាប់ជាអតីតសមាជិកក្រុមក្មេងប្រុសចិន Guanghe Shaonian ក្រោមការដឹកនាំរបស់ Huakaibanxia Cultural Media។

នៅថ្ងៃទី ៨ ខែធ្នូ ឆ្នាំ ២០២២ Zi Yu បានបង្ហាញឱ្យដឹងថារូបគេត្រូវបានសមាជិករួមក្រុម វាយដំ និងបានណែនាំអំពីការបញ្ចប់កិច្ចសន្យារបស់ខ្លួនជាមួយក្រុមហ៊ុន។ នៅថ្ងៃទី ៨ ខែមករា ឆ្នាំ ២០២៣ Ziyu បានបង្ហើបថា ក្រុមហ៊ុនបានបញ្ជាឱ្យលោករៀបចំបង្វិច និងចាកចេញពីក្រុមហ៊ុន។ នៅថ្ងៃបន្ទាប់គឺនៅថ្ងៃទី ៩ខែមករា ២០២៣ Ziyu បានលាតត្រដាងនៅលើបណ្តាញសង្គមថាគណនី Weibo សំខាន់របស់លោកត្រូវបានក្រុមហ៊ុនកាន់កាប់។

ក្រោយមក Ziyu បានគ្រប់គ្រងគណនីឡើងវិញ ហើយបន្តប្តឹងក្រុមហ៊ុន។ ក្នុងការលាតត្រដាង Ziyu ក៏បានធ្វើការអំពាវនាវជាពិសេសដោយ សង្ឃឹមថាមនុស្សគ្រប់គ្នាអាចប្រឈមមុខនឹងជីវិតនិងអនាគតដោយក្លាហានហើយក្នុងពេលតែមួយការពារខ្លួនឯងហើយប្រើបទពិសោធន៍ផ្ទាល់ខ្លួនរបស់លោកដើម្បីរំលឹកដល់មនុស្សគ្រប់គ្នា។

បន្ទាប់ពីរយៈពេលជាង១ឆ្នាំនៅថ្ងៃទី ១៥ ខែឧសភា ឆ្នាំ ២០២៤ Ziyu បានចេញបទចម្រៀងទោលដំបូងរបស់ខ្លួន ដើម្បីសម្គាល់ការចាប់ផ្តើមនៃជំពូកថ្មី។ ក្នុងការចេញផ្សាយនេះ លោកបានបង្ហាញសារនៃការដើរទៅមុខ ដោយនិយាយថាកុំមើលក្រោយ ហើយទុកពេលឱ្យអតីតកាលកន្លងទៅ។

ការតស៊ូរបស់ Ziyu លើអាជីពសិល្បៈ ចាប់ផ្តើមមានពន្លឺកាន់តែខ្លាំងបន្ទាប់ពីការចេញផ្សាយខ្សែភាពយន្តប្រភេទ BL ធ្វើឱ្យលោកកាន់តែមានប្រជាប្រិយភាពបន្ទាប់ពីខិតខំធ្វើការសព្វមុខបែបយ៉ាងដើម្បីរកប្រាក់ចំណូលសម្រាប់សងការខូតខាតលើកុងត្រាដែលលោកបានបញ្ចប់មុនកាលកំណត់របស់ក្រុមហ៊ុន៕