ក្នុងសម្តែងបែបសហសម័យរបស់តារាចម្រៀងទេព បូព្រឹក្ស នៅលើទឹកដីប្រទេសម៉ាឡេស៊ីក្នុងកម្មវិធី Round Festival ពិតជាបានធ្វើឱ្យមហាជនកោតសរសើរយ៉ាងខ្លាំង។ ទន្ទឹមនឹងមោទនភាពនេះ ទេព បូព្រឹក្ស ថានាងមានអារម្មណ៍ថាភ័យព្រោះជាអម្រែកធ្ងន់មិនមែនមកតែខ្លួនឯងឡើយព្រោះបាននាំវប្បធម៌ខ្មែរមកជាមួយ។
ជឿជាក់ថាប្រិយមិត្តមួយចំនួនធំជ្រាបមកហើយថាតារាចម្រៀង ទេព បូព្រឹក្ស បានតំណាងឱ្យសិល្បករកម្ពុជាចូលរួមក្នុងកម្មវិធី Round Festival ដែលប្រពឹត្តទៅនៅឯប្រទេសម៉ាឡេស៊ី ដែលមានការប្រមូលផ្តុំដោយសិល្បករផ្សេងទៀតពីប្រទេសសមាជិកអាស៊ានរួមទាំងប្រទេសកូរ៉េ។ ការសម្តែងរបស់តារាចម្រៀងរូបនេះដែលនាំយកសិល្បៈវប្បធម៌ខ្មែរបង្ហាញទស្សនីយភាពរបាំអប្សរា ល្ខោនខោល ក្បាច់គុនល្បុក្កតោ ជាដើមពិតជាធ្វើឱ្យប្រជាជនខ្មែរមានក្តីរំភើបសូម្បីតែទស្សនិកជនបរទេសក៏ស្រែកហ៊ោកោតស្ងប់ស្ញែងពីការសម្តែងរបស់ប្រទេសកម្ពុជាផងដែរ។
យ៉ាងណាមិញ នៅពីក្រោយការរៀបចំសម្តែង ទេព បូព្រឹក្ស និងសិល្បករសម្តែងរួមទាំងក្រុមការងារពិតជាដុតដៃដុតជើងយ៉ាងខ្លាំងហើយតារាចម្រៀង ទេព បូព្រឹក្ស បានសារភាពត្រង់ថាៗនាងពិតជាភ័យក្នុងសម្តែងនៅលើឆាកអន្តរជាតិនេះ។
ភរិយាជាទីស្រលាញ់របស់តារាចម្រៀង ជី ដេវីត បានរៀបរាប់ពីអារម្មណ៍របស់ខ្លួននៅថ្ងៃទី២៣ មិថុនា ថា «សួរថាភ័យអត់? អូនភ័យណាស់បងព្រោះអម្រែកនេះធ្ងន់ណាស់បើអូនមកម្នាក់ឯងមិនអីទេតែសំខាន់ ពួកយើងមកជាមួយនឹងមុខមាត់វប្បធម៌ជាតិជាមួយនឹងក្តីសង្ឃឹមរបស់អ្នកគាំទ្រ តែមិនអីទេពេលនេះពួកយើងធ្វើបានហើយ ជោគជ័យហើយ»។
តាមរយៈវីដេអូសកម្មភាពក្រៅឆាក តារាចម្រៀង ទេព បូព្រឹក្ស បានបង្ហាញការភ័យរបស់ខ្លួនស្ទើរតែចង់យំព្រោះតែខ្លាចការផ្លាស់ប្តូរសំលៀកបំពាក់មិនទាន់ក្នុងការសម្តែងបទ ទេវរាជ ព្រោះតែមានវេលាតិចក្នុងការផ្លាស់ប្តូរដើម្បីសម្តែងនៅលើឆាកបន្ត។
ទោះយ៉ាងណា ការខិតខំប្រឹងប្រែងរបស់ ទេព បូព្រឹក្ស រួមទាំងក្រុមទទួលបានភាពជោគជ័យក្នុងការសម្តែងនៅលើឆាកអន្តរជាតិនេះ៕
