តារាពហុជំនាញអ្នកនាង ខាត់ សុឃីម បាននិយាយនៅក្នុងបទសម្ភាសន៍អំពី វណ្ណដា បានផ្តល់ភាពភ្ញាក់ផ្អើលមកកាន់ខ្លួនដែលជារៀមច្បង។ ក្រៅពីការសរសើរ វណ្ណដា ឱ្យតម្លៃរៀមច្បងអ្នកនាងថានេះជាមេរៀនមួយសម្រាប់អ្នកជំនាន់ក្រោយ បើគ្មានសិស្សច្បងក៏គ្មានសិស្សប្អូនដែរ នេះជាគំរូដ៏ល្អមួយ។
នៅក្នុងកម្មវិធី 3 fun ដែលបានចាក់ផ្សាយកាលពីកន្លងមកថ្មីៗនេះអ្នកនាង ខាត់ សុឃីម និងកូនប្រុសដែលមានឈ្មោះថា ស្កាយ បានចូលរួមពីរនាក់ម្តាយកូនដោយបាន ចែករំលែកពីរឿងរ៉ាវដែលទស្សនិកជនមួយចំនួនពុំធ្លាប់បានដឹងកាលពីមុនរវាងអ្នកទាំងពីរជាពិសេសពេលដែលអ្នកនាង ខាត់ សុឃីម ពរពោះកូនប្រុសហើយមានការសម្តែង នៅក្រៅប្រទេសនិងលាក់មិនឱ្យមានអ្នកណាដឹង។
តារាពហុជំនាញរូបនេះក៏បានចែករំលែកកាលពីអ្នកនាងចូលរួមក្នុងការប្រគំតន្រ្តីនៅខេត្ត បាត់ដំបងហើយត្រូវបាន វណ្ណដា កាន់បាច់ផ្កាយកមក Surprised នៅលើឆាក។ អ្នកនាង ខាត់ សុឃីម បានបង្ហាញថាសិស្សប្អូនទាំងអស់កម្រនឹង Surprised មកកាន់ខ្លួនណាស់។ អ្នកនាង ខាត់ សុឃីម ថាមិនដឹងសិស្សច្បងដទៃទៀតមានអារម្មណ៍យ៉ាងណានោះទេ ប៉ុន្តែសម្រាប់អ្នកនាងផ្ទាល់ហើយសិស្សប្អូនដែលជា វណ្ណដា ទៀតពិតជាមិននឹកស្មាន នោះទេ អ្នកនាងពិតជាសប្បាយចិត្តខ្លាំងណាស់។
តារាចម្រៀង ខាត់ សុឃីម បានបន្ថែមទៀតថា ខ្លួនមានការសប្បាយចិត្តខ្លាំងនៅពេលដែល ប្អូនឱ្យតម្លៃមកកាន់រៀមច្បង ហើយនេះគឺជាមេរៀនមួយសម្រាប់អ្នកជំនាន់ក្រោយ បើគ្មានសិស្សច្បងក៏គ្មានសិស្សប្អូនដែរដូច្នេះគឺទៅព្រមគ្នា។ នេះជាការគោរពមួយដ៏ល្អ តាស់តឿនដល់ក្មេងជំនាន់ក្រោយដែលភេ្លចខ្លួន ច្រើនតែមើលងាយចាស់ៗធ្វើឱ្យគាត់ដឹង។ ទង្វើរបស់ វណ្ណដា ដែលជា Superstar គោរពដល់សិស្សច្បងនេះ អ្នកនាង ខាត់ សុឃីម ថាគឺជាគំរូមួយដ៏ល្អមួយ៕
