ពេជ្រ សូលីកា រំជួលចិត្តខ្លាំងនិងអំពាវនាវសប្បុរសជួយ ឆលី

តារាចម្រៀងល្បីឈ្មោះ ពេជ្រ សូលីកា បានបង្ហាញអារម្មណ៍រំជួលចិត្តយ៉ាងខ្លាំងបន្ទាប់ពីទទួលដំណឹងថាកុមារ ឆលី កាលពីយប់មិញនេះត្រូវចូលសង្គ្រោះបន្ទាន់បន្ទាប់ពីដុំសាច់ដុះវិញ។ មិនត្រឹមតែប៉ុណ្ណោះ សូលីកា ក៏បានអំពាវនាវដល់សប្បុរសជននានាចូលរួមបរិច្ចាគទៅកាន់កុមារ ឆលី។

កាលពីយប់ថ្ងៃទី១៥ មិថុនា ម្តាយរបស់ ឆលី បានបង្ហោះនៅលើបណ្តាញសង្គមបាន ប្រាប់ពីអាការៈរបស់កូនប្រុសរបស់ខ្លួនត្រូវចូលសង្គ្រោះបន្ទាន់បន្ទាប់ពីក្អួតមើលលែងឃើញ។ នៅព្រឹកថ្ងៃទី១៦ មិថុនា នេះម្តាយរបស់ ឆលី ក៏បានបញ្ជាក់ថែមទៀតថា ឆលី កំពុងនៅលើឡានពេទ្យសង្រ្គោះទៅព្រំដែន។ ដំណឹងនេះបានធ្វើឱ្យមហាជនរំជួលចិត្ត និងអាណិតដល់ ឆលី យ៉ាងខ្លាំង។

ដំណឹងនេះក៏បានធ្វើឱ្យតារាចម្រៀង ពេជ្រ សូលីកា ដែលធ្លាប់ទៅលេងនិងជួយ ឆលី កន្លងមកបង្ហាញអារម្មណ៍តក់ស្លុតរួមទាំងបានអំពាវនាវសប្បុរជនជួយដល់ ឆលី ព្រោះវ័យរបស់ ឆលី គួរតែមានភាពរីករាយដូចកុមារឯទៀត។ តារាចម្រៀងរូបនេះ បានសរសេរនៅលើបណ្តាញសង្គមយ៉ាងដូច្នេះថា «នៅពេលដែលមីងទទួលដំណឹងថា ក្មួយវះកាត់ទទួលបានជោគជ័យ មីងពិតជារំភើបសប្បាយចិត្តជំនួសក្មួយខ្លាំងណាស់កូន។
មីងពិតជាចង់ឃើញក្មួយធំធាត់រស់នៅដូចក្មេងគេដទៃ ចង់លេងអ្វីដែលក្មួយចង់លេង ចង់ញុំអ្វីដែលក្មួយចង់ញុំា។ ប៉ុន្តែគ្រាន់តែមីងទទួលបានដំណឹងទាំងយប់ មីងមានការតក់ស្លុតចិត្តជាខ្លាំង ក្មេងតូចដ៏អភ័ព្វរបស់មីង ដុំសាច់ ឆលី ( ដុះឡើងមកវិញ ) ត្រូវការសង្គ្រោះជាបន្ទាន់»។

អ្នកនាង ពេជ្រ សូលីកា ថា ឆលី ស្ថិតក្នុងវ័យមួយដែលត្រូវទៅសាលាត្រូវមានមិត្តភក្កិដូច ក្មេងដទៃចង់ញ៉ាំអ្វីដែលខ្លួនចង់តែមិនអាច។ ជាមួយគ្នា នេះ ពេជ្រ សូលីកា បានអំពាវនាវ ទៅដល់បងប្អូនទាំងអស់គ្នា ជួយទៅដល់ក្មេងប្រុសម្នាក់នេះតាមលទ្ធភាពដែលអាចជួយ បានដោយក្តីស្រឡាញ់ដែលបងប្អូនមានចំពោះ ឆលី ៕