ទូរទឹកកកពុំមែនជាកន្លែងសុវត្ថិភាពដែលអាចដាក់បន្លែគ្រប់មុខបានទេ អ្នកជំនាញផ្នែកចំណីអាហារហាមដាច់ខាតដាក់បន្លែ៤ប្រភេទនេះក្នុងទូរទឹកកក ហើយណែនាំឱ្យដាក់វានៅកន្លែងស្ងួតដើម្បីកុំឱ្យឆាប់ខូច និងរក្សាគុណភាពបន្លែ ។ ចំណុចសំខាន់ ការដាក់បន្លែទាំងនេះនៅក្រៅទូរទឹកក គឺមិនប្រឈមនឹងការដុះផ្សិត និងបញ្ចេញសារធាតុពុលដល់ថ្លើម ឬប្រឈមជំងឺមហារីក ។
ការស្រាវជ្រាវបង្ហាញថា ទូរទឹកកកមិនមែនជាកន្លែងមានសុវត្ថិភាពដូចការគិតទេ ហើយការដាក់បន្លែមួយចំនួនក្នុងទូរទឹកកកអាចធ្វើឱ្យមានគ្រោះថ្នាក់ដល់សុខភាពពេលបរិភោគវា ។ មនុស្សភាគច្រើនជ្រាបពីគ្រោះថ្នាក់ដោយសារការដាក់សាច់សត្វ និងត្រីស្រស់ៗក្នុងទូរទឹកកក ដែលប្រអប់សាច់សត្វគ្មានគំរបត្រឹមត្រូវ ប៉ុន្តែពួកគេបែរជាពុំជ្រាបថា ការដាក់បន្លែមួយចំនួនក្នុងទូរទឹកកកក៏ប៉ះពាលសុខភាពដែរ ។
អ្នកជំនាញផ្នែកចំណីអាហារណែនាំថា គួរដាក់បន្លែទាំង៤នេះក្នុងទូរម្ហូប ជំនួសការដាក់ក្នុងទូរទឹកកក ពីព្រោះអាចធ្វើឱ្យមេរោគលូតលាស់ និងធ្វើឱ្យរសជាតិ ឬភាពស្រស់ៗរបស់បន្លែផ្លាស់ប្តូរ ។
១-ខ្ទឹមបារាំង ៖ ពុំចាំបាច់ដាក់ខ្ទឹមបារាំងក្នុងទូរទឹកកកទេ ដើម្បីកុំឱ្យម្សៅក្នុងខ្ទឹមបារាំងក្លាយជាស្ករធ្វើឱ្យវាឆាប់ស្អុយ ។ គួរដាក់វានៅកន្លែងស្ងួតមានសីតុណ្ហភាពមិនលើស១៨អង្សារសេ ប៉ុន្តែបើខ្ទឹមបារាំងបកសំបក ឬហាន់រួចហើយអាចដាក់វាក្នុងប្រអប់បិទឱ្យជិត ទើបដាក់ក្នុងទូរទឹកកក ។.png)
អ្នកជំនាញផ្នែកសុវត្ថិភាពចំណីអាហារនៅសាកលវិទ្យាល័យ Arizona និយាយថា ខ្ទឹមបារាំងអាចរក្សាទុករហូតដល់៣ខែ ឬ៦ខែ បើទុកវានៅកន្លែងស្ងួត និងមានខ្យល់ចេញ-ចូលល្អ ។ គួរយកវាចេញពីថង់ផ្លាស្ទិក ពីព្រោះក្នុងថង់ផ្លាស្ទិកគ្មានខ្យល់ នឹងធ្វើឱ្យមានសំណើមក្នុងថង់បង្កមេរោគផ្សេងៗធ្វើឱ្យវាឆាប់ស្អុយ ។
២-ខ្ទឹមស ៖ ខ្ទឹមសក៏ដូចខ្ទឹមបារាំងដែរ ហើយមានវិធីទុកដាក់ដូចគ្នា ។ ការដាក់ខ្ទឹមសក្នុងទូរទឹកកកនឹងធ្វើឱ្យវាដុះពន្លកយ៉ាងឆាប់រហ័ស និងមានរសជាតិល្វីងក្នុងអាហារ ប៉ុន្តែវាគ្មានគ្រោះថ្នាក់ដល់សុខភាពខ្លាំងទេ ។
.png)
៣-ខ្ញី ៖ មើមខ្ញីពុំទាន់បកសំបកអាចរក្សាទុកបានច្រើនសប្តាហ៍នៅកន្លែងស្ងួត និងត្រជាក់ ប៉ុន្តែសីតុណ្ហភាពទាប និងសំណើមក្នុងទូរទឹកកកនឹងធ្វើឱ្យខ្ញីពុំទាន់បកសំបកឆាប់ស្អុយ និងដុះផ្សិត ។ ក្រៅពីនេះ វានឹងកាត់បន្ថយជាតិហឹររបស់ខ្ញី ធ្វើឱ្យរសជាតិអាហារផ្លាស់ប្តូរ ។
ការស្រូបក្លិនផ្សិតពីសំបកខ្ញីអាចធ្វើឱ្យកណ្តាស់ តឹងច្រមុះ កន្ទួលស្បែក ឬកើតជំងឺហឺត ។ ផ្សិតលើសំបកខ្ញីខ្លះទៀតធ្វើឱ្យក្អួតចង្អោរ មានបញ្ហារំលាយអាហារ ប៉ះពាល់ថ្លើម-តម្រងនោម និងកាត់បន្ថយសមត្ថភាពប្រឆាំងមេរោគពេលបរិភោគអាហារ ។
៤-តាសក់ ៖ តាសក់មានសំណើមខ្លាំងអាចធ្វើឱ្យជ្រាយ និងស្អុយយ៉ាងឆាប់រហ័ស បើទុកវាក្នុងទូរទឹកកកមានសំណើម ។ ការដាក់តាសក់ក្នុងប្រអប់បិទគំរបមិនជិតក្នុងទូរទឹកកក ប្រឈមនឹងមេរោគ Salmonella និង E. coli ដែលធ្វើឱ្យតាសក់រលួយ ។ ក្រៅពីនេះ កុំដាក់តាសក់នៅក្បែរផ្លែប៉ោម ចេក និងប៉េងប៉ោះ ពីព្រោះសារធាតុអេទីឡែននឹងធ្វើឱ្យតាសក់ឆាប់ខូច ៕
