ប្រយ័ត្នកើតជំងឺមហារីកថ្លើមដោយសារការបរិភោគអាហារចម្អិនដោយខ្លាញ់ចាស់

មនុស្សភាគច្រើនចូលចិត្តបរិភោគអាហារបំពង ឬចៀន ដូចជា ៖ សាច់មាន់បំពង សាច់ជ្រូកចៀន ប្រហិតចៀន និងចេកចៀន ប៉ុន្តែតើជ្រាបទេថា អាហារចៀនដោយខ្លាញ់ដែលប្រើប្រាស់ជាច្រើនលើកបង្កផលប៉ះពាល់សុខភាពធ្ងន់ធ្ងរ ។ ខ្លាញ់ចាស់ ឬខ្លាញ់ខូចគុណភាពមានពណ៌ខ្មៅ បែកពពុះ ក្លិនមិនល្អ និងចេញផ្សែងយ៉ាងច្រើនពេលកំពុងចម្អិនអាហារ ។ ការប្រើប្រាស់ខ្លាញ់ចាស់ប្រឈមនឹងកើតជំងឺមហារីកថ្លើម លើសឈាម សរសៃឈាមបេះដូង និងមហារីកសួត ។

គ្រូពេទ្យតៃវ៉ាន់បានដាស់តឿនពីការប្រើប្រាស់ខ្លាញ់ចម្អិនអាហារជាច្រើនលើកធ្វើឱ្យប្រឈមនឹងជំងឺមហារីក និងផលប៉ះពាល់សុខភាព ដែលមនុស្សភាគច្រើនមើលរំលងពីគ្រោះថ្នា.ក់នេះ ។ លោកគ្រូពេទ្យបញ្ជាក់ថា សុខភាពសំខាន់ខ្លាំងណាស់ មិនថាការជ្រើសរើសបរិភោគអាហារ ការសម្រាន្តលក់ ហាត់ប្រាណ និងសូម្បីតែវិធីចម្អិនអាហារ ក៏ធ្វើឱ្យប៉ះពាល់សុខភាពដែរ ។

លោក លៀវ ជីទីង គ្រូពេទ្យឯកទេសផ្នែកជំងឺឈាម និងមហារីកនៅមន្ទីរពេទ្យតៃវ៉ាន់ ឱ្យដឹងថា បុរសម្នាក់អាយុ៥០ឆ្នាំ បានកើតជំងឺមហារីកថ្លើម ដោយសារចូលចិត្តយកខ្លាញ់ដែលប្រើប្រាស់ជាច្រើនលើកមកចម្អិនអាហារជាញឹកញាប់ ពីព្រោះអ្នកជំងឺចង់សន្សំសំចៃការចំណាយ មិនចង់ទិញខ្លាញ់ថ្មីមកចម្អិនអាហារ ។

ការយកខ្លាញ់ចាស់ឆ្លងកាត់ការចម្អិនអាហារជាច្រើនលើកមកចម្អិនអាហារដើម្បីសន្សំសំចៃប្រាក់ វានឹងបង្កជាសារធាតុគ្រោះថ្នាក់ និងមានអាស៊ីតក្នុងខ្លាញ់ ដែលប៉ះពាល់សុខភាពយ៉ាងខ្លាំង ។ ទោះជាមូលហេតុជំងឺមហារីកថ្លើមមានលក្ខណៈស្មុគស្មាញ ប៉ុន្តែការប្រើប្រាស់ខ្លាញ់ដដែលៗចម្អិនអាហាររយៈពេលយូរ ក៏ជាហានិភ័យមួយដែរ ក្រោយពីអ្នកជំងឺដឹងថា ខ្លួនកើតមហារីកថ្លើម ក៏មានអារម្មណ៍សោកស្តាយយ៉ាងខ្លាំងដោយសារការសន្សំសំចៃប្រាក់ពុំទិញខ្លាញ់ថ្មី ។

ក្រុមគ្រួសារជាច្រើនបានរក្សាទុកខ្លាញ់ចាស់ៗសម្រាប់ចម្អិនអាហារបន្តទៀតដើម្បីសន្សំសំចៃការចំណាយ ប៉ុន្តែការចម្អិនអាហារដោយខ្លាញ់ចាស់នេះនឹងប្រឈមជាមួយសារធាតុផ្សេងៗដែលបង្កគ្រោះថ្នាក់ដល់សុខភាព ។

ហេតុនេះ គួរចៀសវាងប្រើប្រាស់ខ្លាញ់ចាស់ដែលឆ្លងកាត់ការចម្អិនអាហារជាច្រើនលើក និងផ្លាស់ប្តូរខ្លាញ់ចម្អិនអាហារឱ្យបានញឹកញាប់ ករណីចៀនសាច់សត្វប្រឡាក់អំបិល និងមានគ្រឿងផ្សំផ្សេងៗ ។ ខ្លាញ់ចម្អិនអាហារ ពុំគួរប្រើប្រាស់លើសពី២ដងទេ ហើយការដាក់ខ្លាញ់ថ្មីចូលទៅក្នុងខ្លាញ់ចាស់ដើម្បីចម្អិនអាហារ គឺធ្វើឱ្យខូចខ្លាញ់ និងបង្កសារធាតុគ្រោះថ្នាក់ ៕