រាជធានីភ្នំពេញ ៖ រដ្ឋបាលខេត្តកំពតបានចេញសេចក្ដីប្រកាសមួយ ទាក់ទងនឹងការស្នើសុំក្រសួងមហាផ្ទៃ ឲ្យចាត់វិធានការដាក់វិន័យលើអភិបាលរងស្រុកជុំគិរី ដែលទៅរៀបការប្រពន្ធថ្មី ខណៈមិនទាន់លែងលះជាមួយប្រពន្ធដើមដាច់ស្រាច់ បង្ករឲ្យបញ្ហាគ្រួសារក្លាយជារឿងចម្រូងចម្រាស់ពេញបណ្ដាញសង្គម ប៉ះពាល់ដល់សេចក្ដីថ្លៃថ្នូ និងកិត្តិយសរបស់អង្គភាព។
កាលពីថ្ងៃអង្គារ ទី៣ ខែមិថុនា រដ្ឋបាលខេត្តកំពតបានបង្ហោះសេចក្ដីប្រកាសព័ត៌មាន ដើម្បីជម្រាបជូនសាធារណៈជន បន្ទាប់ពីមានចែករំលែកពេញបណ្ដាញសង្គមនូវរឿងរ៉ាវចម្រូងចម្រាស់ ដែលបុគ្គលមួយរូបឈ្មោះ ហេង ងួនស្រ៊ុន មានតួនាទីជាអភិបាលរងស្រុកជុំគិរីខេត្តកំពត បានប្រព្រឹត្តិអំពើ ដែលធ្វើឲ្យប៉ះពាល់ដល់សេចក្ដីថ្លៃថ្នូខ្លួន និងកត្តិយសអង្គភាព។
នៅក្នុងសេចក្ដីប្រកាសព័ត៌មានខាងលើបានបញ្ជាក់ថា «រដ្ឋបាលខេត្តកំពត សូមមិនគាំទ្រដាច់ខាតចំពោះករណីនេះ ដែលមានចែងក្នុងច្បាប់ស្ដីពី សហលក្ខន្តិកៈមន្រ្តីរាជការស៊ីវិល។ ដូចនេះ រដ្ឋបាលខេត្តកំពតនឹងលើកសំណើរគោរពជូន ទៅក្រសួងមហារផ្ទៃ ដើម្បីចាត់វិធានការវិន័យ ស្របតាមកំហុសឆ្គងដែលមន្ត្រីរូបនេះបានប្រព្រឹត្តិ៕
