អនុវត្ត៧ចំណុចនេះនៅពេលព្រឹកដើម្បីឱ្យមានសុខភាពល្អ និងអារម្មណ៍ស្រស់ស្រាយ

ការទនុវត្តទម្លាប់ពេលព្រឹក ពិតជាមានសារៈសំខាន់ខ្លាំងណាស់ ដើម្បីឱ្យមានសុខភាពល្អ និងអារម្មណ៍ស្រស់ស្រាយ ពីព្រោះថ្ងៃខ្លះ មនុស្សម្នាក់ៗតែងតែមានអារម្មណ៍ខ្វាយខ្វល់ពេលភ្ញាក់ពីដំណេក ។ នេះជាការណែនាំខ្លះៗដើម្បីបំបាត់អារម្មណ៍តប់ប្រមល់ពេលព្រឹក ឬខ្ចិលក្រោក បើអនុវត្តតាមការណែនាំទាំងនេះធានាថា យើងនឹងមានអារម្មណ៍ល្អពេលព្រឹក ស្រស់ស្រាយ ចិត្តជ្រះថ្លា និងត្រៀមខ្លួនបំពេញការងារបានល្អ ។

១-ក្រោកទៀងទាត់ពេលវេលា ៖ ការក្រោកទៀងទាត់ពេលវេលាពេលព្រឹកមានសារៈសំខាន់ណាស់សម្រាប់សុខភាព ដូចជា ៖ ចូលសម្រាន្តនៅម៉ោង១០យប់ និងក្រោយម៉ោង៦ព្រឹក ។ គួរតែក្រោកឱ្យបានទៀងទាត់បែបនេះជារៀងរាល់ថ្ងៃ មិនថាថ្ងៃសៅរ៍-អាទិត្យ ដើម្បីឱ្យរាងកាយចងចាំពេលវេលាសម្រាន្ត និងភ្ញាក់ស្វ័យប្រវត្តិ ដោយពុំចាំបាច់ដាក់នាឡិកាដាស់ ។

២-ឈរក្រោមកំដៅថ្ងៃពេលព្រឹក ៖ ពេលរាងកាយត្រូវកំដៅថ្ងៃ រាងកាយនឹងដឹងដោយខ្លួនឯងថា ដល់ពេលវេលាភ្ញាក់ពីដំណេក ។ កំដៅថ្ងៃពេលព្រឹកជួយឱ្យយើងមានអារម្មណ៍ស្រស់ថ្លា និងចង់ទៅបំពេញការងារ ។

៣-ផឹកទឹក ៖ ពេលក្រោកឡើងត្រូវផឹកទឹកយ៉ាងហោចណាស់ ចាប់ពី១កែវ ទៅ២កែវ ពីព្រោះរយៈពេល៨ម៉ោងដែលយើងសម្រាន្តលក់ គឺរាងកាយពុំទទួលបានទឹកសោះ ។ ហេតុនេះ ធ្វើឱ្យស្ងួតក និងឈឺក ដោយសាររាងកាយខ្វះជាតិទឹក ។

៤-ហាត់ប្រាណ ៖ គួរហាត់ប្រាណពេលព្រឹក យ៉ាងហោចណាស់៣០នាទី ដើម្បីឱ្យរាងកាយមានសុខភាពល្អ និងត្រៀមខ្លួនសម្រាប់ថ្ងៃថ្មី ។

៥-សរសេរបញ្ហានានាលើក្រដាស ៖ ចូរសរសេរពីភាពតានតឹងផ្សេងៗ ឬសរសេរបញ្ហានានាដែលយើងបារម្ភ ពុំអាចដោះស្រាយបាន ។ បន្ទាប់មក ចូរបោះក្រដាសនេះចោលដើម្បីដោះស្រាយបញ្ហាផ្សេងៗនៅក្នុងចិត្ត ។

៦-បរិភោគអាហារពេលព្រឹក ៖ ការបរិភោគអាហារពេលព្រឹកនឹងផ្តល់អត្ថប្រយោជន៍ដល់សុខភាព ជាពិសេស ការបរិភោគបបរ សាច់ក្រក ស៊ុតចៀន និងផ្លែឈើ ដើម្បីឱ្យរាងកាយទទួលបានថាមពល និងការពារការឈឺក្រពះ ។

៧-គិតរឿងល្អៗ ៖ ពេលព្រឹកត្រូវតែគិតពីរឿងល្អៗ និងបំបាត់អារម្មណ៍មួរម៉ៅឱ្យអស់ ដូចជា ៖ ថ្ងៃនេះ គឺជាថ្ងៃល្អ ឬជាថ្ងៃសំណាង ដើម្បីឱ្យថាមពលល្អៗចូលមករកយើង ។

ក្រៅពីនេះ អាចស្តាប់ចម្រៀងតិចៗពេលធ្វើអ្វីមួយពេលព្រឹក ពីព្រោះតាមឯកសារវេជ្ជសាស្ត្របញ្ជាក់ថា ការស្តាប់ចម្រៀងអាចជំរុញសារធាតុដូប៉ាមីនក្នុងខួរក្បាល ដែលជាសារធាតុធ្វើឱ្យយើងមានសេចក្តីសុខ និងរីករាយ ។ ការងូតទឹកពេលព្រឹកក៏សំខាន់ដែរ ដើម្បីបង្កើនទំនុកចិត្ត បំបាត់ភាពតានតឹង និងដាស់រាងកាយឱ្យភ្ញាក់ ។

សរុបមក ការអនុវត្តទាំង៧ចំណុចនេះពិតជាផ្តល់នូវអត្ថប្រយោជន៍បំផុតសម្រាប់សុខភាព ដែលគួរតែសាកល្បងអនុវត្តតាមឱ្យបានរៀងរាល់ថ្ងៃ យើងនឹងឃើញថា សុខភាពនឹងល្អប្រសើរជាងមុន ។ ការថែទាំសុខភាពបានល្អ គឺជាទ្រព្យដ៏មានតម្លៃពុំអាចកាត់ថ្លៃបានរបស់មនុស្សម្នាក់ៗ ៕