រាជធានីភ្នំពេញ ៖ មិនមែនថ្ងៃទី១០ ខែកក្កដា ឆ្នាំ២០២៥ នោះទេដែលជាថ្ងៃបើកដំណើរជាផ្លូវការនូវអាកាសយានដ្ឋានថ្មីអន្តរជាតិតេជោ ពោលគឺបានផ្លាស់ប្ដូរទៅថ្ងៃទី៩ ខែកញ្ញា ឆ្នាំ ២០២៥ខាងមុខនេះ។
យោងតាមសេចក្ដីជូនដំណឹងរបស់រដ្ឋលេខាធិការអាកាសចរណ៍ស៊ីវិលនៅថ្ងៃទី២៣ខែឧសភា ឆ្នាំ២០២៥ បានឲ្យដឹងថា អាកាសយានដ្ឋានអន្តរជាតិតេជោ លំដាប់ថ្នាក់ 4F នឹងដាក់«ប្រតិបត្តិការ»ជាផ្លូវការចាប់ពីថ្ងៃទី៩ ខែកញ្ញា ខាងមុខតទៅ ខណៈ «ពិធីសម្ពោធ» បើកឱ្យប្រើប្រាស់អាកាសយានដ្ឋាននេះ នឹងត្រូវប្រារព្ធធ្វើនៅថ្ងៃទី២០ ខែតុលា ឆ្នាំ២០២៥។ ការកំណត់បែបនេះ គឺយោងតាមចំណារដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ ព្រះរាជាណាចក្រកម្ពុជា ចុះថ្ងៃទី២១ ខែឧសភា។
គួរឲ្យដឹងថា អាកាសយានដ្ឋានអន្ដរជាតិតេជោ ត្រូវបានសាងសង់គ្របដណ្ដប់លើផ្ទៃដី ២ ៦០០ ហិកតា មានទីតាំងស្ថិតនៅស្រុកកណ្ដាលស្ទឹង ខេត្ដកណ្ដាល និងមានចម្ងាយប្រមាណ ២០ គីឡូម៉ែត្រពីរាជធានីភ្នំពេញ។ ចំពោះទុនវិនិយោគសម្រាប់ការសាងសង់គឺមានប្រមាណ១ ៥០០ លានដុល្លារអាមេរិក។
អាកាសយានដ្ឋាននេះត្រូវបានចាត់ថ្នាក់ ជាអាកាសយានដ្ឋាន 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។ បើតាមការចុះផ្សាយរបស់សារព័ត៌មាន CNN កន្លងមកបានបង្ហាញថា វានឹងក្លាយជាស្ថាបត្យកម្មដ៏មានឥទ្ធិពលមួយ ក្នុងចំណោមស្ថាបត្យកម្មចំនួន១១ លើពិភពលោកឆ្នាំ២០២៥៕
