តារាសម្តែង ចន ច័ន្ទលក្ខិណា អតីតប្រធានសមាគមសិល្បករខ្មែរបានសម្តែងការមិនពេញចិត្តចំពោះការលើកឡើងរបស់លោក ឯម រៀម ជាបណ្ឌិតច្នៃម៉ូត ដែលបានលើកឡើងហាក់ដូចជាគាំទ្រឱ្យមានប្រពន្ធដើម ប្រពន្ធចុង។
មហាជនជ្រាបមកហើយថាជុំវិញករណីប្រពន្ធដើមវាយអតីតសង្សារប្តីរហូតត្រូវឃាត់ខ្លួនជាបណ្តោះអាសន្នបានបង្កឱ្យផ្ទុះការជជែកវែកញែកមិនធម្មតា។ ករណីនេះជំទាវ ចន ច័ន្ទលក្ខិណា បានចេញមុខនិយាយអំពីបញ្ហានេះជាច្រើនថែមទាំងបង្ហើបប្រាប់ថាស្រ្តីដែលត្រូវចោទជាប្រពន្ធចុងគឺជាអ្នកសិល្បៈថែមទាំងមានចរិតទៅឌឺដងប្រពន្ធដើមដល់ផ្ទះ ទើបមានរឿងបែបនេះកើតឡើងជាសាធារណៈ ខណៈតារាសម្តែងរូបនេះក៏បានបង្ហោះលិខិតមួយទៀតក្នុងការបញ្ចប់ទំនាក់ទំនងជាមួយនឹងស្វាមីអ្នកដទៃ។
ស្របពេលនេះរឿងនេះបានកើតឡើងគេបានឃើញលោកបណ្ឌិតច្នៃម៉ូត ឯម រៀម បានបង្ហោះសំណេរមួយអំពីប្រពន្ធដើមនិងប្រពន្ធចុងធ្វើឱ្យតារាសម្តែង ចន ច័ន្ទលក្ខិណា មិនពេញចិត្តឡើយ។ នៅថ្ងៃទី ៤ ឧសភា លោក ឯម រៀម បានបង្ហោះរូបពីរសន្លឹកជាមួយនឹងខ្លឹមសារថា «រូបនេះផ្ញើជូន Team ប្រពន្ធចុង និង Team ប្រពន្ធដើម, សូម្បីតែព្រះសិវៈក៏មានមហេសីពីរព្រះអង្គដែរគឺ ព្រះនាងឧម៉ា និង ព្រះនាងហ្គង់ហ៉្គា, ដូចនេះហើយប្រពន្ធចុង និងប្រពន្ធដើម សាងអនាគតជុំគ្នា ដូចក្នុងរូប បើចង់ដឹងច្បាស់ទៅទស្សនាប្រាសាទបាគង ខេត្តសៀមរាប»។
ការលើកឡើងរបស់លោក ឯម រៀម បានជំរុញឱ្យជំទាវ ចន ច័ន្ទលក្ខិណា បានចែករំលែកការបង្ហោះរបស់លោក នៅថ្ងៃទី៥ ឧសភា ដោយតារាសម្តែងរូបនេះបានលើកឡើងយ៉ាងដូច្នេះថា «បងនិយាយបែបនេះ គឺ បងកំពុងគាំទ្រវប្បធម៌ …លួច ឆក់ ជាសាធារណៈក្នុងប្រទេសដែលគោរពឱ្យតម្លៃលើ វប្បធម៌ និង សីលធម៌»។
នៅក្នុងផ្នែកមតិយោបល់វិញមានអ្នកលេងបណ្តាញសង្គមជាច្រើនបានចូលទៅខម្មិនលើការចែករំលែករបស់អតីតប្រធានសមាគមដោយបង្ហាញការគាំទ្រនូវការលើកឡើងខាងលើនិងបង្ហាញការមិនពេញចិត្តចំពោះការលើកឡើងរបស់លោក ឯម រៀម ឡើង៕
