Zhao Lusi សូមទោសនិងមានសំណងត្រឡប់ទៅអ្នកគាំទ្រវិញដោយសារតែការសម្តែងមិនបានដូចតាមការប្រកាស

Zhao Lusi ត្រូវលួងចិត្តអ្នកគាំទ្ររបស់ខ្លួនជាមួយនឹងពាក្យសូមទោសហើយសន្យាថាឱ្យអ្នកគាំទ្ររបស់ខ្លួនទាក់ទងទៅស្ទូឌីយ៉ូ ដើម្បីទទួលបានសំណងជាអំណោយ វិញក្រោយពីនាងមិនបានសម្តែងតាមកាលកំណត់ធ្វើឱ្យអ្នកគាំទ្រកើតទុក្ខមិនសុខចិត្ត។

នៅក្នុងកម្មវិធី «Flow Gourd Music Festival» តារាសម្តែង Zhao Lusi បង្ហាញខ្លួនក្នុងនាមជាតារាកិត្តិយសចុងក្រោយ ដោយនាងត្រូវបានកំណត់ពេលដំបូងឱ្យច្រៀងរយៈពេល ៣០ នាទី។ ទោះជាយ៉ាងណាក៏ដោយដោយសារតែក្រុម Sunset Rollercoasterយឺត ហើយអ្នករៀបចំ មិនបានសម្របសម្រួល នោះពេលវេលាសម្តែងរបស់ Zhao Lusi ត្រូវបានកាត់បន្ថយដោយផ្ទាល់។ នាងបានច្រៀងតែ២បទប៉ុណ្ណោះ និងមានរយៈពេលសម្តែងសរុប៧នាទី។ អ្នកគាំទ្រ ជាច្រើនស្រក់ទឹកភ្នែកនៅនឹងកន្លែង ហើយស្រែកដាក់ថា៖ «សងថ្លៃសំបុត្រវិញ!»។

Zhao Lusi បានច្រៀងបទ «You R» និង «With You»។ ដើមឡើយនាងគ្រោងនឹង ច្រៀងបទថ្មី «Look Yourself» ជាសាធារណៈជាលើកដំបូង ដែលធ្វើឱ្យអ្នកគាំទ្រជាច្រើន ទន្ទឹងរង់ចាំ។ ទោះជាយ៉ាងណាក៏ដោយ Sunset Rollercoaster ដែលកំពុងសម្តែងមុនពេល នាងត្រូវបានពន្យារពេលដោយសារបញ្ហាចរាចរណ៍ជាលទ្ធផលអ្នកសិល្បៈនៅពីក្រោយនាងត្រូវ បានបង្ខំឱ្យពន្យារពេលកម្មវិធីរបស់ពួកគេ។
ទោះជាយ៉ាងណាក៏ដោយ អ្នករៀបចំកម្មវិធីបាន បដិសេធមិនបោះបង់ពេលវេលាផ្សាយពាណិជ្ជកម្មរយៈពេល ២០ នាទីនោះទេ ហើយកន្លែង នោះបានកំណត់ថាត្រូវផ្តាច់ភ្លើងនៅម៉ោង ១០ យប់ ដែលនាំឱ្យមានភាពវឹកវរក្នុងការសម្តែង។

មិនត្រឹមតែ Zhao Lusi រងផលប៉ះពាល់ប៉ុណ្ណោះទេ សូម្បីតែតារាផ្សេងក៏ត្រូវបង្ខំចិត្ត បញ្ឈប់ការសម្តែង។ អ្នកគាំទ្រជាច្រើនរបស់ Zhao Lusi បានតម្រង់ជួរពេញមួយយប់ដើម្បីកក់កន្លែងមួយ ប៉ុន្តែនាងបានចាកចេញពីឆាកបន្ទាប់ពីច្រៀងបានត្រឹមតែ ៧ នាទីប៉ុណ្ណោះ ដែលធ្វើឲ្យអ្នកគាំទ្រ ជាច្រើនយំនៅនឹងកន្លែង ហើយមិនព្រមចាកចេញអស់រយៈពេលជាយូរ។

ទោះជា Zhao Lusi ប្តូរសម្លៀកបំពាក់ហើយ នាងក៏នៅតែរត់ត្រឡប់មកឆាកវិញ ដើម្បីលួងចិត្តអ្នកគាំទ្រ។ នាងបាននិយាយថា «ខ្ញុំត្រៀមឡើងឡានក្រុងហើយ។ ថ្ងៃនេះ ដំណើរការទាំងមូលត្រូវបានពន្យារពេល។ ខ្ញុំសូមទោស កុំយំអី អ្នកអាចប្រើសំបុត្ររបស់អ្នកដើម្បីផ្លាស់ប្តូរអំណោយជាមួយស្ទូឌីយោ»៕