ថ្មីៗប៉ុន្មានថ្ងៃចុងក្រោយនេះរឿងរ៉ាវរបស់តារាចម្រៀង ជី ដេវិត និង ទេព បូព្រឹក្ស បានបង្កឱ្យហ្វេនៗមានការពិភាក្សាគ្នាយ៉ាងទូលំទូលាយ ខណៈដែលតារាសម្តែង នី មុន្នីនាថ ចេញមកបញ្ជាក់ច្បាស់ៗថាប្តីប្រពន្ធមួយគូនេះជាមនុស្សល្អក្នុងសង្គមសិល្បៈ រួសរាយនិងជួបមុខសំពះជម្រាបសួររហូត។
ការមានរឿងចម្រូងចម្រាសទាំងបោះក្បាលមេក្រូនៅលើឆាក និងការនិយាយផាំងៗនៅលើឆាកទាក់ទងនឹងសំឡេងដែលនៅស្ទើរមិនច្បាស់ល្អស្នើឱ្យបែកធុងបាស់បានធ្វើឱ្យមតិមួយចំនួនគិតថាអត្តចរិតរបស់ ជី ដេវិត ហាក់ដូចជាមិនចេះគ្រប់គ្រងអារម្មណ៍របស់ខ្លួនធ្វើអ្វីស្រេចតែចិត្ត។ ទោះបីជាមានមតិខ្លះហាក់បង្ហាញថាសកម្មភាពរបស់ ជី ដេវិត មិនល្អបែបនេះ បែបនោះ ក្តីប៉ុន្តែអ្នកគាំទ្ររបស់លោកថាតារាចម្រៀងរូបនេះចូលចិត្តនិយាយត្រង់ៗនិងចង់ឱ្យហ្វេនៗរបស់លោកសប្បាយតែប៉ុណ្ណោះ។
ស្របពេលដែល ជី ដេវិត ត្រូវជួបនឹងរឿងអាស្រូវពីមួយទៅមួយតារាសម្តែង នី មុន្នីនាថ បានចេញមុខបញ្ជាក់ច្បាស់ៗថា ជី ដេវិត និង ទេព បូព្រឹក្ស ជាមនុស្សល្អ។ តារាសម្តែងទឹកភ្នែកដែលឃ្លាតឆ្ងាយពីវិស័យភាពយន្តងាកមកកិច្ចការមនុស្សធម៌រូបនេះបានសរសេរនៅលើបណ្តាញសង្គមរបស់ខ្លួនថា«អ្វីដែលខ្ញុំចងចាំតាំងពីខ្ញុំស្គាល់ដំបូង គឺដេវីត និង បូព្រឹក្ស គាត់ជាមនុស្សរួសរាយគួរអោយស្រលាញ់ណាស់ និងល្អនៅក្នុងសង្គមសិល្ប: ទៅណាជួបមុខ សំពះជម្រាបសួរហូត»។
ងាកទៅកាន់តារាចម្រៀង ជី ដេវិត វិញទោះបីជាការសម្តែងរបស់ខ្លួននិងការនិយាយអំពីសំឡេងនៅលើឆាកបានក្លាយជាប្រធានបទជជែកវែកញែកក្តីប៉ុន្តែលោកបានបង្ហាញថា មហាសង្ក្រាន្តបីថ្ងៃបញ្ចប់ទៅដោយភាពសប្បាយរីករាយព្រមទាំងជូនពរទស្សនិកជនឱ្យធ្វើដំណើរប្រកបដោយសុខសុវត្ថិភាពផងដែរ។ 
គួរឱ្យដឹងថា មិនត្រឹមតែតារាសម្តែង នី មុន្នីនាថ ប៉ុណ្ណោះទេបានពោលសរសើរអំពីចរិតល្អរបស់ ជី ដេវិត កន្លងមកនេះមានហ្វេនៗជាច្រើនបានបង្ហាញថាលោកនិង ទេព បូព្រឹក្ស ជាអាយដលដែលមានភាពរួសរាយជាមួយហ្វេនៗមិនប្រកាន់ខ្លួនឡើយ៕
