អ្នកវិទ្យាសាស្ត្របានព្រមានដល់អ្នកចូលចិត្តទំពារស្ករកៅស៊ូ និងផលប៉ះពាល់ដល់សុខភាព

មនុស្សរាប់លាននាក់ចូលចិត្តទំពារស្ករកៅស៊ូជារៀងរាល់ថ្ងៃ មិនថាដើម្បីតែដកដង្ហើមស្រស់ស្រាយ ឬគ្រាន់តែចលនានៃការទំពារនោះទេ។ ទោះជាយ៉ាងណា ការស្រាវជ្រាវថ្មីៗពីសាកលវិទ្យាល័យ Queen’s Belfast បានបង្ហាញនូវបញ្ហាបង្កប់ដ៏គួរឱ្យភ្ញាក់ផ្អើលមួយគឺ៖ ការទំពារស្ករកៅស៊ូនឹងបញ្ចេញមីក្រូប្លាស្ទិក ដែលជាបំណែកល្អិតតូចៗនៃប្លាស្ទិកចូលទៅក្នុងទឹកមាត់របស់យើង។

តើមីក្រូប្លាស្ទិកជាអ្វី? មីក្រូប្លាស្ទិក គឺជាភាគល្អិតប្លាស្ទិកតូចៗ ដែលមិនអាចមើលឃើញដោយភ្នែកទទេនោះទេ ដែលវាបានបង្កឱ្យមានការព្រួយបារម្ភជាសកល ដោយសារតែវត្តមានរបស់វានៅក្នុងអាហារ និងទឹក ហើយឥឡូវនេះសូម្បីតែការទំពារស្ករកៅស៊ូ។ នៅក្នុងការសិក្សានេះ អ្នកស្រាវជ្រាវបានប្រើបច្ចេកវិទ្យាទំនើបដែលហៅថា automated Raman spectroscopy ដើម្បីស្វែងយល់ថាតើមីក្រូប្លាស្ទិកប៉ុន្មានត្រូវបានបញ្ចេញក្នុងពេលទំពារ។

តួរលេខបង្ហាញថា ក្នុងរយៈពេលមួយម៉ោងនៃការទំពារ ភាគល្អិតមីក្រូប្លាស្ទិករហូតដល់ ២៥០០០០ បានបញ្ចេញហើយអាចចូលទៅក្នុងទឹកមាត់របស់អ្នក។ នោះជាចំនួនដ៏ច្រើនលើសលប់ដែលបានបញ្ចាញពីស្កកៅស៊ូតូចមួយនេះ ដែលមើលទៅហាក់ដូចជាគ្មានបង្ករគ្រោះថ្នាក់អ្វីសោះ ខណៈពេលដែលអ្នកវិទ្យាសាស្ត្រនៅតែមិនប្រាកដអំពីផលប៉ះពាល់រយៈពេលវែងនៃមីក្រូប្លាស្ទីកទាំងនេះលើសុខភាពមនុស្ស ការរកឃើញនេះកាន់តែធ្វើឲ្យប្រភពនៃការប៉ះពាល់ផ្លាស្ទិច ត្រូវបានមនុស្សជាច្រើនមើលរំលង។

ហេតុអ្វីយើងគួរយកចិត្តទុកដាក់ចំពោះបញ្ហានេះ? ការបំពុលដោយប្លាស្ទិកគឺជាការព្រួយបារម្ភពីបរិស្ថានកាន់តែខ្លាំងក្នុងពេលបច្ចុប្បន្ននេះ។ តាមរយៈការរកឃើញមីក្រូប្លាស្ទិកនៅក្នុងស្ករកៅស៊ូ ការសិក្សានេះមិនត្រឹមតែបង្កើនការយល់ដឹងប៉ុណ្ណោះទេ ប៉ុន្តែថែមទាំងបង្ហាញពីសារៈសំខាន់នៃការដោះស្រាយប្រភពនៃការប៉ះពាល់ដែលមើលរំលង—ប្រភពប៉ះពាល់ដែលយើងប្រហែលជាមិនបានចាប់អារម្មណ៍ពីមុនមក។

គួរបញ្ជាក់ផងដែរថា មីក្រូប្លាស្ទីកបង្កគ្រោះថ្នាក់ខ្លាំងដល់សុខភាព ដោយសារតែសមត្ថភាពរបស់វាក្នុងការចូលទៅក្នុងខ្លួនតាមរយៈការស្រូបចូល និងការប៉ះពាល់ស្បែក ដែលបង្ករបញ្ហាដូចជា៖ ខូចកោសិកា និងរលាក រំខានដល់ពោះវៀន អ័រម៉ូន បញ្ហាផ្លូវដង្ហើម រាងកាយមានជាតិពុល និងការកកកុញ ដោយសារមីក្រូប្លាស្ទីកអាចបង្កើតនៅក្នុងជាលិកា ហើយផ្ទុកនូវសារធាតុពុលផ្សេងៗដែលបង្កគ្រោះថ្នាក់។ ដូច្នេះ នៅពេលដែលអ្នកទំពារស្ករកៅស៊ូលើកក្រោយ សូមចាំថាវាមិនមែនគ្រាន់តែធ្វើឱ្យខ្យល់ដង្ហើមស្រស់ថ្លានោះទេ វាគឺជាផ្នែកមួយនៃការបំពុលដោយប្លាស្ទិកផងដែរ៕