យើងគួរតែបង្រៀនកូនៗឱ្យចេះរង់ចាំ និងអត់ធ្មត់ តាំងពីពួកគេមានអាយុតិច ដើម្បីឱ្យពេលពួកគេធំឡើងនៅជាមួយមិត្តភក្តិក្នុងសង្គម ពួកគេនឹងចេះរង់ចាំ និងអត់ធ្មត់ ពុំក្លាយជាមនុស្សឆេវឆាវ ។ បច្ចុប្បន្ន ពិភពលោកបានអភិវឌ្ឍន៍បច្ចេកវិទ្យាយ៉ាងឆាប់រហ័ស ព្រមទាំងមានការផលិតសម្ភារៈប្រើប្រាស់ទំនើបៗសម្បូរបែប ដែលធ្វើឱ្យក្មេងៗមានបញ្ហាក្នុងការរង់ចាំ និងពុំចេះអត់ធ្មត់ ។.png)
លើសពីនេះ ក្មេងៗមួយចំនួនមានទម្លាប់នឹងការចង់បានរបស់អ្វីមួយពីឪពុកម្តាយ គឺត្រូវតែបានភ្លាមៗ ។ ហេតុនេះ យើងជាឪពុកម្តាយគួរអប់រំកូនឱ្យចេះរង់ចាំ និងអត់ធ្មត់ ដើម្បីឱ្យពួកគេចេះគ្រប់គ្រងអារម្មណ៍របស់ខ្លួន ពុំក្លាយជាមនុស្សធ្វើតាមតែចិត្តខ្លួនឯង ឬឆេវឆាវ ។ តើមានវិធីណាខ្លះដើម្បីអប់រំកូនឱ្យចេះគ្រប់គ្រងអារម្មណ៍របស់ខ្លួន និងកុំចង់បានអ្វីភ្លាមៗ?
១-ឪពុកម្តាយធ្វើជាគំរូល្អដល់កូន ៖ យើងជាអ្នកនៅក្បែរកូនខ្លាំងបំផុត ហើយពួកគេតែងតែរៀនសូត្រធ្វើតាមឪពុកម្តាយ ព្រមទាំងរៀនអត់ធ្មត់ដូចយើង ។ ឧទាហរណ៍ ៖ យើងគួរឈរតម្រង់ជួរពេលទិញចំណីអាហារ ដើម្បីឱ្យកូនធ្វើតាមទម្លាប់ដ៏ល្អនេះពេលធំឡើង ។
២-បង្រៀនកូនដោយការនិទានរឿង ៖ ការនិទានរឿង គឺជាវិធីដ៏ល្អមួយដើម្បីឱ្យក្មេងបានយល់ និងឃើញរូបភាព ។ យើងគួរអានរឿននិទាននិយាយពីការអត់ធ្មត់ឱ្យកូនស្តាប់ ហើយឱ្យកូនរៀនសូត្រពីការអត់ធ្មត់ឱ្យបានច្រើន ។
៣-ប្រាប់ឱ្យច្បាស់ថា ការរង់ចាំនឹងបញ្ចប់ពេលណា ៖ ក្មេងនឹងមួរម៉ៅ បើពុំដឹងថា តើពួកគេត្រូវរង់ចាំរហូតដល់ពេលណា ។ ឪពុកម្តាយពុំគួរនិយាយពាក្យថា «ចាំតិច» ឬ «មួយស្របក់ទៀត» ប៉ុន្តែគួរនិយាយថា «ម៉ែសុំពេល៥នាទីទៀត» ។ ហេតុនេះ កូននឹងដឹងថា ៥នាទីទៀត ម៉ែនឹងមករកគេ និងគ្មានអារម្មណ៍មួរម៉ៅ ។
.jpg)
៤-ឱ្យកូនធ្វើអ្វីមួយក្នុងពេលរង់ចាំ ៖ ពេលកូនអង្គុយរង់ចាំស្ងៀមៗ ពួកគេអាចធុញទ្រាន់បាន ។ បើឱ្យកូនរង់ចាំរយៈពេលយូរ គួរតែឱ្យកូនធ្វើអ្វីផ្សេងៗ ដូចជា ៖ គូររូប និងផាត់ពណ៌ ដើម្បីឱ្យកូនមានអារម្មណ៍សប្បាយរីករាយ ។.jpg)
៥-សន្សំពិន្ទុ និងផ្តល់រង្វាន់ ៖ យើងអាចនិយាយជាមួយកូនថា ពេលពួកគេធ្វើអ្វីមួយជោគជ័យ យើងនឹងផ្តល់ពិន្ទុឱ្យ ហើយពួកគេត្រូវសន្សំពិន្ទុឱ្យច្រើនដើម្បីយករង្វាន់ ។ ទោះជាពួកគេធ្វើការងារតូចតាចក្តី ត្រូវតែផ្តល់រង្វាន់ឱ្យជានិច្ច ប៉ុន្តែហាមផ្តល់ឱ្យរង្វាន់ច្រើន ពីព្រោះកូននឹងមានទម្លាប់ធ្វើល្អចង់បានរង្វាន់ ហើយខុសពីគោលដៅការអប់រំរបស់យើង ។
ការអប់រំកូនឱ្យចេះរង់ចាំ និងអត់ធ្មត់ គឺពុំអាចអប់រំតែ១ថ្ងៃទេ ឪពុកម្តាយត្រូវអប់រំពួកគេតាំងពីនៅតូចៗ ។ រីឯការចំណាយពេលអប់រំកូនយូរឆាប់ប៉ុនណា គឺអាស្រ័យលើឪពុកម្តាយបង្រៀនឱ្យកូនយល់ដឹងកម្រិតណា?
