ខេត្តកំពត ដែលជាតំបន់ទេសចរណ៍ដ៏មានសក្តានុពលបំផុតមួយនៅក្នុងប្រទេសកម្ពុជា បានកំពុងអភិវឌ្ឍតំបន់រមណីយដ្ឋានថ្មីៗជាច្រើននៅដើមឆ្នាំ ២០២៥ នេះជាមួយនឹងទេសភាពស្រស់ស្អាតខ្លាំង ត្រជាក់ភ្នែក ធ្វើឱ្យអារម្មណ៍ស្រស់ស្រាយរំសាយអស់ទុក្ខកង្វល់ ល្អបំផុតសម្រាប់ការជួបជុំគ្រួសារ មិត្តភក្តិ ឬមនុស្សពិសេស។
ជាក់ស្តែងបន្ទាប់ពីសេះសមុទ្របាញ់ទឹក នាឡិកាយក្ស សួនបាញ់ទឹករាំតាមចង្វាក់ភ្លេង អភិបាលខេត្តកំពត លោកម៉ៅ ធនិន មិនឈប់ត្រឹមហ្នឹងនោះទេ ដោយបច្ចុប្បន្នលោកកំពុងសាងសង់ស្ពានឬស្សីដ៏វែងមួយដើម្បីទាក់ទាញភ្ញៀវទេសចរជាតិ និងអន្តរជាតិ។ វត្តមានស្ពានឬស្សីបណ្តែតទឹកប្រវែង ៣២០ម៉ែត្រ កំពុងសាងសង់បានប្រហែល៦០% នៅសហគមន៍នេសាទកំពង់សាមគ្គី ដែលស្ថិតក្នុងស្រុកទឹកឈូ ខេត្តកំពត។
ស្ពានឬស្សីមួយនេះ នឹងសាងសង់ហើយ១០០% មុនពេលចូលឆ្នាំថ្មីប្រពៃណីជាតិខ្មែរខាងមុខនេះ ដែលបច្ចុប្បន្នគណៈកម្មការសហគមន៍បានកំពុងសាងសង់យ៉ាងយកចិត្តទុកដាក់ ដែលជាការឧបត្ថម្ភគាំទ្រដោយអង្គការ អេដ អេ អាកស្យុង។ ដូច្នេះគម្រោងអភិវឌ្ឍន៍ថ្មីៗដូចជា រូបសំណាកសេះសមុទ្រ ប៉មនាឡិកាយក្ស សួនបាញ់ទឹករាំតាមចង្វាក់ភ្លេង និងគម្រោងស្ពានឫស្សីបណ្តែតទឹក ត្រូវបានគេរំពឹងថានឹងទាក់ទាញភ្ញៀវទេសចរកាន់តែច្រើនឡើងបន្ថែមទៀតនៅឆ្នាំខាងមុខ។
គួរបញ្ជាក់ដែរថា កំពត គឺជាខេត្តមួយស្ថិតនៅប៉ែកខាងត្បូងនៃប្រទេសកម្ពុជា ដែលមានចម្ងាយ ១៤៨ គីឡូម៉ែត្រពីរាជធានីភ្នំពេញ ហើយក៏ជាខេត្តមួយដែលមានសក្តានុពលបំផុតខាងវិស័យទេសចរណ៍ និងវប្បធម៌ប្រវត្តិសាស្ត្រផងដែរ ដោយបានស្វាគមន៍ភ្ញៀវទេសចរគ្រប់ជាតិសាសន៍ឱ្យមកទស្សនាជារៀងរាល់ឆ្នាំ៕
