ស្ថានភាពផ្លូវចិត្តមិនមានលំនឹង Kim Soo Hyun ត្រូវគេបង្ហាញថាកំពុងស្ថិតក្រោមការមើលថែពីសមាជិកគ្រួសារ

អ្នកស្គាល់គ្នាជិតស្និទ្ធនឹងតារាសម្តែង Kim Soo Hyun បានបញ្ជាក់ប្រាប់ TV Report នៅថ្ងៃទី១៩ ខែមីនាថា Kim Soo Hyun បច្ចុប្បន្នកំពុងស្នាក់នៅជាមួយគ្រួសាររបស់លោក។ ស្ថានភាពនៅតែតានតឹងនេះ Kim Soo Hyun ត្រូវបានម្ចាស់ក្រុមហ៊ុនជាច្រើនបានបញ្ចប់ការផ្សាយពាណិជ្ជកម្មរបស់លោក។

ប្រភពដដែលបានបន្តទៀតថា «វាមិនច្បាស់ទេថាតើ Kim Soo Hyun នៅជាមួយបងប្អូនជីដូនមួយរបស់លោកឬក៏ឪពុករបស់ ប៉ុន្តែ Kim Soo Hyun កំពុងឆ្លៀតពេលមើលថែខ្លួនឯងដោយការស្នាក់នៅជិតក្រុមគ្រួសាររបស់លោក»។ ក្នុងនោះបញ្ជាក់ទៀតថា សេចក្តីថ្លែងការណ៍ផ្លូវការពីភ្នាក់ងាររបស់លោកគឺ Gold Medalist បានចេញផ្សាយបន្ទាប់ពីឆ្លងកាត់ការត្រួតពិនិត្យជាមួយ Kim Soo Hyun។

បច្ចុប្បន្ននេះ Kim Soo Hyun កំពុងមានភាពចម្រូងចម្រាសជុំវិញការចោទប្រកាន់ថាលោកបានណាត់ជួបជាមួយតារាសម្ដែង Kim Sae-ron នៅពេលនាងមិនទាន់គ្រប់អាយុ និងបានគាបសង្កត់នាងលើបំណុលដែលបណ្តាលមកពីគ្រោះថ្នាក់ចរាចរណ៍របស់នាងរហូតនាងចាកចេញទាំងវ័យក្មេងក្នុងវ័យ២៤ឆ្នាំ។

ទោះជាយ៉ាងណាក៏ដោយ Gold Medalist បានបដិសេធការចោទប្រកាន់នេះ ដោយបញ្ជាក់ថា Kim Soo Hyun បានណាត់ជួប Kim Sae-ron បន្ទាប់ពីនាងពេញវ័យ ហើយមិនដែលដាក់សម្ពាធលើនាងទាក់ទងនឹងបញ្ហាហិរញ្ញវត្ថុនោះទេ។ ទន្ទឹមនឹងនេះ ក្រុមគ្រួសាររបស់ Kim Sae-ron និង Channel YouTube របស់ Garo Sero Institute ទទូចថា Kim Soo Hyun គួរតែសារភាពចំពោះការចោទប្រកាន់ទាំងអស់ និងចេញការសូមទោសជាសាធារណៈ។

ភាពចម្រូងចម្រាសបានចាប់ផ្តើមនៅថ្ងៃទី ១០ ខែមីនា ដែលធ្វើឱ្យ Kim Soo Hyun ជួបរឿងអាស្រូវដ៏ធំសម្បើមក្នុងអាជីពរបស់ខ្លួនក្នុងរយៈពេល១៨ឆ្នាំមកនេះហើយបានធ្វើឱ្យលោកត្រូវបានក្រុមហ៊ុនជាច្រើនបញ្ចប់កុងត្រាការផ្សាយពាណិជ្ជរបស់លោក៕